NDAWI ENGGA 116 - Nanduk Ngget Tul Pidnak Wene

Wat yugwi inggem-nen mengga keya ibidnak pem erembel wanidnak ndawi

¹ Nagawan Indo-nen-e an nene kolosolat, an-nen nggi yidnak mende kwara nene koloso bem-e Nagawan Indo iri-ge an nindi kundik-nen yusu-o.

² An-nen pempa at eram wene mbo bil lasola-ge, pempa koloso-o.

³ An-e wat yugwi kere-nen kamarak nuburuk woralat, wat yugwi elem kwiye enaboro lera mboso iri na-ge an nebem woralat, an-e kwiye-nen mondok yamuksa woragit lag-o.

⁴ Iri kwarosolar-e, an-nen Nagawan Indo emengen mbarosolar-e: ”Nagawan Indo wa-e. Nimiri yonokluk-nen kemengen mbarusu-o!” luk yak tigi-o.

⁵ Nagawan Indo iri-ge enabuwa kasolat, ndemeret mot mot kwaroso-net yusu-o. Nit Nenmbal Pem Nagawan iri-ge enabuwa kaso elem-nen yusu-o.

⁶ It-nen kwarurak enmawi lak nab-e Nagawan Indo-net ndegel onposo-o. An namawi lak yidnak tarem-e at-nen nimiri yoso-o.

⁷ Nagawan Indo-ge an nimin konak kwaroso me, an-nen-e nindi tugup lak tak puruk worasu-o.

⁸ Nagawan Indo-nen-e lugwinikmu-nen nimiri yamu-o. At-nen nindi yangonosolat, wosa mbuwakluk keya nibigit lak yij-o.

⁹ Iri kwarosola, an-e Nagawan Indo erengen pem waring kasolar-e, ap woragwi sa nggweyakma yu me waring kasu-o.

¹⁰ An-nen yosolar-e: ”An-e mondok kwiye worak anggun panggun tak nibili-o” yosolar-et nde, an-e tugup lak irit Nagawan Indo bem nindi-ge wat tak puruk woragi-o.

¹¹ An-e kwiye yosolar-et nde, an-nen yosolar-e: ”Ap misiger-o luk mbi ebem nindi wat tak purag-e meya-o” luk yigi-o.

¹² Nagawan Indo-nen an konak kwat nubusu ereba na onggo-ge an-nen-e Nagawan Indo-ge no nggal wok timin-o?

¹³ At-nen yongga noroso ereba na bem wiwa-o yak tosolar-e, anggut engen amburu Nagawan Indo amanggim purak waruk lobok yimin-o.

¹⁴ At ilirak oboksa enlengen pem-et an-nen at imin ”Iniksa wok kirimin-o” luk urul yak tigi iri na-ge kwarimin-o.

¹⁵ Nagawan Indo-nen-e at-nen indi kundik woragwi nap wat yogola-ge, enabuwa kwarat kasu-o.

¹⁶ Nagawan Indo wa-e. An-e kat ndegel koboso nap-nen yusu-o. Niya-nen kwaroso nggal-et an-e ndegel kubusu-o. Kat-nen kere wisirik nibigenma-o.

¹⁷ An-nen-e kat wiwa-o yak korosolat, kat kamanggim wosa pugwi mende pimin-o. Iri yosolar-e, kat keram tepan yimin-o.

^18-19 Kat kilirak oboksa inmbiri bem-et Nagawan Indo uwi mborom Yerusalem siri enggendumu-net an-nen kat kimin urul pigi iri na-ge kwat kibimin-o. Nagawan Indo nap erembel wanurag-o!