NDAWI ENGGA 115 - Nanduk Ngget Tul Pidnak Wene

Mbal Pem Nagawan Mondok Amawi Worak erembel wanugwi ndawi

¹ Nit kek tak nunpurag-e lag-o. Nagawan Indo wa-e. Nit kek tak nunpurag-e lag-o. Kar-e pempa tugup lak nenabuwa kaso me, mondok kat nak kek tak kuburag-o.

² Noluk-nen ap enlem ereba na-nen yogolar-e: ”It Enmbal Pem Nagawan-e ngge me worasu-o?” luk yili-o?

³ Nit Nenmbal Pem Nagawan-e aid arem worasu-o. At-nen-e at indi-nen pidnak irit kwarusu-o.

⁴ It unkugwiwak emas min perak min-nen konidnak ereba-ge ininggi-nen konidnak mende-nen yusu-o.

⁵ Kugwiwak ereba-ge enemnde-ge worasu-t nde, wene-ge yoso buk-nen yusu-o. Erengen-e worasu-t nde, eneyaso buk-nen yusu-o.

⁶ Eyanggo-ge worasu-t nde, wene koloso buk-nen yusu-o. Abiru-ge worag-et nde, emben kaso buk-nen yusu-o.

⁷ Inggi-ge worasu-t nde, tenakwi buk-nen yusu-o. Ijog-e worasu-t nde, tula mboroso buk-nen yusu-o. Emndam nggwe-nen-e ene-ge mondok wirik poso buk-nen yusu-o.

⁸ Kugwiwak ereba ndak worak puruk, ebem inndi wat tak puruk woragwi nap oboksa-ge at nggal-et kwat mag-o.

⁹ Isarael nap wa-e. Nagawan Indo nak-nen yongga kondosolat, nggetlel konposolat kwaroso me, at ebem nak kinndi wat tak puruk wolmer-o.

¹⁰ Kit tepan ombo wa-e. Nagawan Indo nak-nen yongga kondosolat, nggetlel konposolat kwaroso me, at ebem nak kinndi wat tak puruk wolmer-o.

¹¹ Nagawan Indo aye worak woragwi nap wa-e. Nagawan Indo nak-nen yongga kondosolat, nggetlel konposolat kwaroso me, at ebem nak kinndi wat tak puruk wolmer-o.

¹² Nagawan Indo-nen indi yebet neneyarug-e, at-nen imbiringgat tak nunpuwa-o. At-nen Isarael nap min tepan ombo Arun-nen wigarak oboksa min imbiringgat tak unpuwa-o.

¹³ At-nen-e at indi aye worak woragwi nab-e nggok-nen marik-nen oboksa imbiringgat tak unpuwa-o.

¹⁴ Nagawan Indo-nen kit min kit-nen wigarak min wok kondosolar-e, kinlirag-e kwarat tak puwag-o.

¹⁵ Mbal min nggweyak min ndak worak pid Nagawan Indo-nen-e imbiringgat tak kunpuwag-o!

¹⁶ Mbal iri-ge Nagawan Indo arengge-t nde, nggweyak perak nggweyakma nap wok endamu-o.

¹⁷ Wat yidnak nap min inni enne lak ma ud me mbidnak nap min-nen-e Nagawan Indo kek tak ubugwi bug-o.

¹⁸ Alat nde, nit nunluk worali yeba-nen-e yawo-nen na irit, pem woragolat-nen na irit, at nak wiwa-o yak togolat wulmul-o. Nagawan Indo nak erembel wanurag-o!