NDAWI ENGGA 112 - Nanduk Ngget Tul Pidnak Wene

Konak nap-nen enalen pem woragwi wene Nagawan Indo nak erembel wanurag-o!

¹ Nagawan Indo-nen ”Iri nggal kwarurag-o” yidnak ereba na bem inndi kundugu woragolat, at indi aye worak worali nab-e enalen kagolat wolmag-o.

² It inlirak-nen-e nggweyak yu tena buruk wolma-o. Konak kwarugwi nap-nen nderag-e Nagawan Indo-nen inmbiringgat tak unpuwa-o.

³ It enma lombok insilobulo worak irit woragolat, mondok ndak irit wolma-o. Konak enalen pem nak woralik nalik wolma-o.

⁴ Mot mot kwarugwi nap min ndak ndak kwarugwi nap min unpud kagwi nap min enabuwa kagwi nap min enambigir-e ndamuk arem-net nde, yaya abinal-e enpem poso-o.

⁵ Tuguruk ondolma purak pem enpem nggi yogola, wok undugwi inndi konak woragolat, yi wene ndi wene bem lugud tak kwarigit lak, mondok mot mot nak kwarogolat worali nab-e mondok enalen kagolat wolmag-o.

⁶ Konak nab-e konak tugup lak irit wolma-o. Worala-ge, inndi-ge pempa at ebem nak yeberak wolma-o.

⁷ At indi-ge tugup lak Nagawan Indo ebem wat tak puruk woralar-e, meya wene kuluwa-t nde, kwiye lag-et wolma-o.

⁸ At-nen at imin sirid nab-e ”Ndemeret urugwe nggwe rak inpimin-o” perarug-e, umud lak, tugup lak irit wolma-o.

⁹ At arengge-ge we irit insilobulo lak nap tembesa wok undusu-o. Ar-e pempa konak nak kwarosolat me, at nak mondok kek tak obogolat wolma-o.

¹⁰ Meya yugwi nap-nen at yik karug-e, insilepma ebem pogolat, insili rak obogolat, eneyak ene nggiritmak mbogolar-e, lak yili-o. It inndi mbung mbung tak woragwi ereba na mondok lak yusu-o.