NDAWI ENGGA 111 - Nanduk Ngget Tul Pidnak Wene

Nagawan Indo erembel wanugwi ndawi Nagawan Indo nak erembel wanurag-o!

¹ An-e at ilirak ndok worak ennggendumu-nen nindi ebis-et-nen Nagawan Indo nak wiwa-o yak timin-o.

² Nagawan Indo-nen kwaroso iri-ge ndemeret wi yurak mende-nen yusu-o. At-nen kwiye worak kwaroso ereba na indingen kali nap-nen-e iri na lumbunurag-e ndak-net yusu-o.

³ Nagawan Indo-nen kwaroso iri-ge nggok erembel wanurak-nen yusu-o. At-nen mot mot kwaroso-ge pem irit woralik nalik woraso-nen yusu-o.

⁴ Nagawan Indo iri-ge unpud kasolat, enabuwa kasolat yoso-nen yusu-o. Nit ninndi yeberak wolmakluk at-nen kwaroso-ge wi yurak nak kwaroso-nen yusu-o.

⁵ At iri-ge at-nen ”Kwat kinpimin-o” luk urul pidnak ereba na pempa indi yeberak woralat, at indi aye worak woragwi nab-e nunggwi mende mak ondosolat woraso-o.

⁶ At-nen at amawi at ilirak inmbiri bem nuk kasolar-e, ap enlem nin nap unuwi nggweyag-et nde, at ilirak wok endamu-o.

⁷ Nagawan Indo iri-ge at-nen kwaroso-ge tugup lak mot mot nak kwaroso-nen yusu-o. At-nen ”Iri nggal kwarurag-o” yidnak wene-ge ap-nen ebem inndi wat tak puruk woragwi-nen yusu-o.

⁸ At-nen imiri mbarak pidnak wene-ge lak yigit lak, pem irit woraso-nen yusu-o. At-nen imiri mbarak pidnak wene-ge ndemeret mot mot irit wok endamu-o.

⁹ At-nen at ilirak wisirik onposolar-e, pem irit inmin kundik wolmomtak urul yak indij-o. Ar-e Nagawan Indo kek tak amawi worak-nen yusu-o!

¹⁰ Ta-nen nde indi nggat nggat worak kwat momtak perasolar-e, Nagawan Indo nak kek tak uburag-o. At iri-ge at-nen yidnak yidnak kwarugwi nap oboksa inndi tenggerak paga wok ondoso-nen yusu-o. Mondok pem irit woragolat Nagawan Indo nak kek tak pogolat wolmomtag-o!