NDAWI ENGGA 107 - Nanduk Ngget Tul Pidnak Wene

Buku 5: Ndawi 107-150 Nagawan Indo-nen konak kwaroso bem erembel wanidnak wene

¹ ”Nagawan Indo iri-ge mondok konak, at-nen-e pem irit enabuwa kaso me, at nak wiwa-o yak turag-o.”

² Kit anggun panggun tak kunpugwi sa-nen wisirik kinpidnak nap-nen-e iri nggal-et tugurug-et kundugu yogolat wolmer-o.

³ Kit o nin me nan me woragwi iri na-ge ndok wosa keya konposolar-e, mo luwaso (timur) nggwe-nen na, mo mboso (barat) nggwe-nen na abare ponok ponok (utara dan selatan) nggwe-nen na ndok wosa keya kinpij-o.

⁴ Ereb-e nembaga ereba nak waring kagolat woragolar-e, o silmu mburugwi tu nggambut tet kabak yogolat woraiga-o.

⁵ Ir-e nunggwi mende nere min yi nere min enpem mbosolar-e, ”Ngge kwarul-o?” luk inndi kabak yogolat woraiga-o.

⁶ Anggun panggun iri nggal woragolar-e, it-nen Nagawan Indo eram wene mbo bil lagola-ge, Nagawan Indo-nen anggun panggun iri nggal arem-nen inmiri yij-o.

⁷ At-nen-e tula mot mot nggwe-t lit unpuruk mborosolar-e, o silmu nggwe-t inpil mberamu-o.

⁸ Nagawan Indo-nen it enabuwa kaso bem min nggweyakma nap enmanggim wi yurak mende kwat onposo bem min it-nen-e at imin wiwa-o luk yak turak iri-ge ndak-net yusu-o.

⁹ At-nen-e yi nere kali nab-e yi mak ondosolat, nere enpem mbidnak nab-e at-nen kwaroso konak mende-ge ndak yaga wok ondosolat kwaroso-o.

¹⁰ Ap ereb-e ndamuk mom ndirik arem ereba na woragolar-e, posid kere-nen kamarak o kubu me yane wat tenak woraiga-o.

¹¹ Iri nggal kwasa woraiga iri-ge, it-nen Mbal Pem Nagawan ene tarogolat, Mbal Pem Nagawan Mondok Kek tak iri na-nen ”Irit kwarurag-o” luk enpem pidnak ereba na kwarigit lak yogolat pem-net woraiga-o.

¹² Yabu angin worak enpem pugwi iri bem-net at-nen inndi abi kalak posola, it mboloksa mbud yogola-ge, yongga indigit lak woraiga-o.

¹³ Anggun panggun iri nggal kagolat-nen it-nen Nagawan Indo eram wene pil lagola-ge, at-nen-e inndi kabak yosola, inmiri yij-o.

¹⁴ At-nen-e ndamuk mom ndirik arem-nen lesa wok unpuruk, it kamarak inpidnak kere iri na ndela keya bij-o.

¹⁵ Nagawan Indo-nen it enabuwa kasolat, at-nen nggweyakma nap enmanggim kwiye worak mende kwarat kwarosolat kwaroso bem it-nen at wiwa-o yak turak iri-ge ndak-net yusu-o.

¹⁶ Inmiri yosolar-e, at-nen tembaga posid-nen konidnak tumende yoroksa keya bosolat, tumid mbesi owak ereba na yigisa keya bosolat kwaroso-o.

¹⁷ Ap ereb-e it-nen meya kwarugwi bem wid inndi lak nggal tak onposolat, it-nen lugud tak kwarugwi bem andi bandi kaiga-o.

¹⁸ It-nen nunggwi mende yik kudtag-e insili yogolat, it wat momtag-e poro yij-o.

¹⁹ Anggun panggun iri nggal kagolat-nen it-nen Nagawan Indo eram wene pil lagola-ge, at-nen-e inndi kabak yogola, inmiri yij-o.

²⁰ At-nen-e wirik pidnak wene bem-net ki rak onposolat, abu yapma-nen keyara inpil luwasolat kwarij-o.

²¹ Nagawan Indo-nen it enabuwa kasolat, at-nen nggweyakma nap enmanggim kwiye worak mende kwarat kwarosolat kwaroso bem it-nen-e at wiwa-o yak turak iri-ge ndak-net yusu-o.

²² It-nen at wiwa-o yak togolar-e, at amanggim pugwi mende pogolat, at-nen kwat onposo-ge enalen kagolat-nen yugwi ndawi bem wigarurag-e ndak-net yusu-o.

²³ Ap ereb-e koma bem yi koma ombol pem mborogolar-e, yi koma nggok ma sa it norak mende kore yil mburugwi-o.

²⁴ It-nen-e Nagawan Indo-nen kwaridnak mende ereba na kagolat, at-nen yi koma iri me kwiye worak kwasa pidnak ereba na kaiga-o.

²⁵ At-nen yidnak pem-et wijakni puk kil lobok yosolar-e, yi koma-ge nggweyerep nggwayerep tak pij-o.

²⁶ Yi koma bem mburugwi koma ereba na-ge kudsa teram abu mbo bil laruk, yi koma yiriwak pem ud me mberak pil mbij-o. Kwiye worak iri nggal kwat onposola-ge, ir-e mondok kwiye kwarat yiga-o.

²⁷ Iri kwat onposola-ge, ir-e inndi lak yosolat, inndi nden kaso yi ninggidnak nap nggal landok wandok niga-o.

²⁸ Anggun panggun iri nggal woragolar-e, it-nen Nagawan Indo eram wene mbo bil lagola-ge, Nagawan Indo-nen-e anggun panggun iri nggal arem-nen inmiri yij-o.

²⁹ Wijakni-nen enpem mbud yid iri na-ge kondok tak posola, yi koma saberep mbaberep lobok yid ereba na-ge usune lak yij-o.

³⁰ It na-ge wijakni iri na lak yosoloma-ge, enalen kagola-ge, wok unpuruk o it mbururak sa e koma pugwi sa iri na me-t inpil mbirij-o.

³¹ Nagawan Indo-nen it enabuwa kasolat, at-nen nggweyakma nap enmanggim kwiye worak mende kwarat kwarosolat kwaroso bem it-nen-e at wiwa-o yak turak iri-ge ndak-net yusu-o.

³² It-nen-e Nagawan Indo-nen kek tak woraso obog-e at ilirak ennggendumu wigarogolat, enne kulugwi nap at ilirak ennggendumu-nen na at erembel wanurag-e ndak-net yusu-o.

³³ Nagawan Indo-nen-e yi ereba na-ge yi lak nembaga kwarak posolat, yi ulusu ereba na-ge eberek luk nggweyak nak le rak paga keya bij-o.

³⁴ Iri me woragwi nap ereba-nen meya kwarugwi ereba na-n ndowaga nggweyak amburu worag-et nde, nggweyak amburu lak tak posolat arek tak pij-o.

³⁵ Yi lak nembaga ereba na-ge nden yaga yi ugup kwarak posolat, nggweyak lerak ereba na-ge yi ulusu kwarak posolat kwarij-o.

³⁶ Nere woragwi nab-e iri me inpij-o. Enpamu, it-nen-e it wolmomtak o siri irit piga-o.

³⁷ It eneyapmu-ge yakwi mende engen pil kagolat, anggut uwi min yakolat kwarogolar-e, yagidnak ereba na ebe-ge mondok kwarat mbara ndok wiriga-o.

³⁸ Nagawan Indo-nen imbiringgat tak onposolar-e, inlirak kwarat ndaiga-o. Iri-nen it-nen parugu woragwi mende usu worak na kwarat ijak wosa keya bij-o.

³⁹ Alat nde, Mbal Pem Nagawan ilirak iri na-ge ap-nen insilepma bem anggun panggun tak onpogolat, urugwe nggwe rak onpogolar-e, enpe-ge marig-et tak inpiga-o.

⁴⁰ Iri ala karuk, Nagawan Indo-nen-e nagawan ereba na-ge teberak unpuruk, ”Kir-e kasaru nembaga yeba waring kagolat wolmer-o” luk yak indij-o.

⁴¹ Alat nde, insilobulo lak nab-e it enlengenma lak woragwi iri na-ge imbiringgat tak onposolat, it inlirag-e kwarat tak onposolat, lomba wam oro nggal kwarat tak inpij-o.

⁴² Mot mot nak kwarugwi nap-nen-e iri kwat inpidnak ereba karug-e enalen kali-t nde, meya kwarugwi nab-e enemnde nggelak pusu-o.

⁴³ Inndi nggat nggat worak nap-nen-e wene iri-ge yebet kagolar-e: ”Ndemeret Nagawan Indo-ge nenabuwa pem kasolat woraso-nen yusu-o” luk yebet kagolat wolmag-o.