NDAWI ENGGA 105 - Nanduk Ngget Tul Pidnak Wene

Mbal Pem Nagawan-nen kwiye worak Isarael nap kwat inpidnak wene

¹ Nagawan Indo nak wiwa-o yak togolat, at-nen kek tak woraso iri na wigarer-o. At-nen kwaroso iri-ge ap enlem oboksa ndindera yak ender-o.

² Nagawan Indo nak erembel wanogolat ndawi yer-o. At-nen kwiye worak kwaroso wene-ge ap yak ender-o.

³ At iri-ge Nagawan Indo mondok misiget nak-nen yusu-o. Nir-e at arengge me, nenalin nenalen kagolat wolmog-o. Nagawan Indo erembel wanogolat tebe yili nab-e enalen kagolat wolmag-o.

⁴ At ebem amawi nggi yogolat, pempa at nak erembel wanogolat wolmer-o.

^5-6 Nagawan Indo ndegel oboso nap Abarakam-nen wigarak wa-e. At-nen lenak pidnak nap Yakup-nen wigarak wa-e. At-nen kwiye worak mende kwarid mirid ereba na-ge kinndi yebet yebet tak wolmer-o. At-nen wat tak pidnak wene-ge meme rak purak pug-o.

⁷ Nagawan Indo iri-ge nit Nenmbal Pem Nagawan-nen yusu-o. At-nen wat tak pidnak wene-ge yi wi ndi wi oboksa-nen kwat tenak wolmag-o.

⁸ Ar-e at-nen ”Irit kwarimin-o” luk urul pidnak wene-ge pempa indi yeberak wolma-o. At-nen urul pidnak wene-ge pem irit wolma-o.

⁹ At-nen urul pid iri-ge nandug-er-e Abarakam imin urul puruk, imbirig-e Isak imin pij-o.

¹⁰ Iri luk, urul pid iri na mondok tugup lak tak posolar-e, Yakup imin pij-o. Nde, iri pid iri-ge Isarael nap-nen pem irit tena wolmomtak irit urul pij-o.

¹¹ At-nen yosolar-e: ”Kanaan nggweyak iri-ge kat wok kirimin-o. Iri yumu, keid imining angge nggal kat karengge kwat ma-o” luk yak tij-o.

¹² Nandug-e Mbal Pem Nagawan ilirag-e o iri me-ge ap sal nggal woraiga-o. Nde, iri me-ge ap enpe-ge marig-et nak-nen woraiga-o.

¹³ Iri kwasa woragolar-e, ap enlem erep endam-nen-e ap enlem erep endam, nde, o misik me-nen-e o misik me, iri nggal nak kwaril waring tenak woraiga-o.

¹⁴ Alat nde, Nagawan Indo-nen-e ap misiger-o luk mbi-nen anggun panggun tak unpuwakluk mondok keya inpigit lag-o. It inmiri-nen nagawan nagawan ereba na met onposolat-nen yak ondosolar-e:

¹⁵ ”An-nen lenak inpidnak nab-e sil eneyali-ge meyog-o. An nene lomboksa yugwi nab-e lel mberel unpurak pug-o” luk yak indij-o.

¹⁶ Nagawan Indo-nen-e o iri na me nogoro nggok irit pil lobok yosolat, nunggwi mende lid lud tak pidnak ereba na oboksa lak tak pij-o.

¹⁷ Alat nde, at-nen it mbirigit lak ma nandug-et ap misik ibil mbirid Yusup iri na-ge ap ndegel onposolat wolmakluk ap enpem onggo waniga-o.

¹⁸ Ijog-e posid kere bem kamarak pogolat, umukmu-ge posid kere-nen yilik puruk kago wosa keya biga-o.

¹⁹ Nde, abok nggwe-nen-e at-nen ”Iri nggal ma-o” yid iri na ndak ndag-et kwat yosola, at iri-ge Nagawan Indo-nen yidnak wene-nen-e ndemeret mot mot yoso nap tak irit pij-o.

²⁰ Iri lug-e, Mesira nagawan, yi nap ndi nap tena unpuruk woraso iri na-nen-e ”At iri-ge o kubu me-nen wisirik uburag-o” luk yij-o.

²¹ Nagawan iri na-nen-e at woraso sa iri me yabu ereba na-ge Yusup inggem posolat, at-nen idnak isilobulo ereba na tena wolmomtak yabu-ge at inggem posolat irit kwarij-o.

²² Iri-nen Piraon eyabu wanugwi nap ereba na kwat unpurak yabu min enne kulugwi nap ereba na mul undurak yabu min-et at inggem pij-o.

²³ Iri yamu worala-ge, Yakup iri na-ge Mesira mberarik, ap sal nggal irit Mesira woragij-o.

²⁴ Nagawan Indo-nen-e at ilirag-e mondok kwarat tak onposolar-e, it inmin sirid nab-e enmawi worag-et nde, it enmawi-ge kwarat tak pij-o.

²⁵ Nagawan Indo-nen Mesira nap enarem yabu wanosola-ge, it Mesira nap-nen-e at ilirag-e insili rak onpogolat, at ndegel ubugwi nap na onmbol pem lagolat woraiga-o.

²⁶ Iri kwat onpogola karuk, Nagawan Indo-nen-e at ndegel oboso nap Musa min at-nen lenak pidnak nap Arun min lena wirik inpij-o.

²⁷ Wirik enpamu, Mesira iri me-nen-e kwiye worak mende Nagawan Indo-nen kwaroso mende ereba na-ge Musa min Arun min-nen kwarogolat woraiga-o.

²⁸ It-nen-e Nagawan Indo-nen enpem pidnak ndak ndag-et kwarogola-ge, Nagawan Indo-nen-e o ereba na me-ge mondok ndamuk tak pamu-o.

²⁹ Mesira nap inid oboksa eyabi worak tak pamu, keyane oboksa mondok lak yij-o.

³⁰ It enma ereba me-ge mangge-nen mik mak mbosolat, nagawan woraso sa min-et mondok nggwij-er-o.

³¹ Mbal Pem Nagawan-nen yidnak pem-et mirabon na kwarat lobok yosolat, nggurun na o ereba na oboksa-nen mondok yebet luk keya bij-o.

³² At-nen-e talme engen nggog-e talme nggal nggilara mberak pil mbuwalat, o pinel yebek mbebek tak posolat kwarij-o.

³³ At-nen-e anggut ari min e ara min ereba na-ge tudsa keya bil lobok yosolat, it-nen yagidnak e oboksa langgona mbud tak pil lobok yij-o.

³⁴ Nagawan Indo-nen yidnak pem-et sil kwarat lobok yij-o. Nde, sil ereba-ge wonarurak puk irit lobok yij-o.

³⁵ Sil ereba na-nen-e yapmu yagidnak mende oboksa leraben nasolat, yak yoso mende oboksa ndegera nasolat kwarij-o.

³⁶ Iri luk imbirig-e, Mesira iri me woragwi oboksa enmbararak manggiya nderak mondok oboksa ndegera indij-o.

³⁷ Iri rak purug-e, Isarael nab-e lesa inmin mborosola-ge, Isarael nab-e emas min perak min waruk mbiriga-o. Enpe na oboksa konak enmawi min irit mbiriga-o.

³⁸ Mesira nap ereba na-ge it enaye-nen enaboro wat yamu inmi linggirik nak woragolat me, it mborogola-ge, enalen kaiga-o.

³⁹ Mbal Pem Nagawan-nen-e at ilirak kura onposolar-e, nggan nggan muruk tak pij-o. Nde, it kubu yaya bem mburuwaklug-e kanduk pij-o.

⁴⁰ Nde, at ilirak-nen nggi yogola-ge, Nagawan Indo-nen-e towe yi ma woraso waru nggal ereba na wok indij-o. Iri-nen aid arem-nen mana mburu wok endamu, inmbitsa nonggolat woraiga-o.

⁴¹ At-nen-e kerep ngara keya buruk, yi-ge pilana wasolar-e, nembaga iri me yi mbirij-o.

⁴² Iri kwarid iri-ge Nagawan Indo-nen at ndegel oboso nap Abarakam imin ”Iri kwat kibimin-o” luk urul yak tid iri na indi yebet kasolat-nen kwarij-o.

⁴³ At-nen at ilirak ndegel unpuruk mborosola, enalen min-et mborogolat, nde, at-nen len inpidnak nap lit unpuruk mborosola, enalen-nen kek kok pem-et mbiriga-o.

⁴⁴ Ap enlem erep ereba na unuwi nggweyag-e it wok ondosolat, it eneyabu min-et at ilirak enarengge rak posolat kwarij-o.

⁴⁵ Iri kwarid iri-ge at ilirak-nen at-nen imiri mbarak pidnak wene wok indid iri na-nen yidnak yidnag-et kwarogolat, at-nen ”Irit kwarurag-o” luk enpem pidnak ereba na ndak ndag-et kwarogolat wolmakluk-nen kwarij-o. Nagawan Indo nak erembel wanurag-o!