NDAWI ENGGA 104 - Nanduk Ngget Tul Pidnak Wene

Ndak Woroso Nap erembel wanidnak wene

¹ Nindi wa-e. Nagawan Indo nak erembel wani-o! Nagawan Indo Nembal Pem Nagawan wa-e. Kar-e mondok nggok lombok-nen yusu-o! Kar-e kek tak yaya worak woragwi sum yutluk worasu-o.

² Kar-e keyaya nak-nen muruk tak worasu-o. Kat-nen mbal-e o lije sum wi nggal laruksa mbeyoksa pigen-o.

³ Kat kuwi-ge mbal pem teram eid me yi ombolwak pem wirigen-o. Nggan nggan-e kat-nen konggweyak koma nggal tak puruk, o wija isiyamu bem koreluk mburusu-o.

⁴ Nde, kat-nen-e o wija-ge kat-nen lena wirik pidnak nap nggal tak pusu-o. O pinel-e kat ndegel koboso nap nggal kwarak pusu-o.

⁵ O yu-ge kat-nen-e mabin tugup lak pem-et pigenma-o. Iri rak pigenma, woralar-e, tugup lak, sil kudtak puk irit pem wolma-o.

⁶ O yu-ge kat-nen yi koma nak-nen muruksa pigenma-o. Iri rak pigenma, yi-ge ndobo oboksa yemnda keya bij-o.

⁷ Kat kene o nggu nggal iri bem-nen kene amawi bem met posola-ge, yi-ge ombolwak mboroso agaij-o.

⁸ Yi-ge ndobo bem-nen puluruk, nggweyak yamuk tak nggwe mborosolar-e, kat-nen at ondoro lid lud tak pigen sa-t mberamu-o.

⁹ Kat-nen-e yi-ge nggweyak yu tuguruk kobong ma naru, ”Ya nggwe-ge mbururak pug-o” luk mondok kuri wosa pigenma-o.

¹⁰ Kat-nen-e yi ulusu-ge nggweyak yamuk tak nggwe pilana pil luwasolat, Yi warug-e ndobo enggenggerak-nen wirik posolat kwarusu-o.

¹¹ Iri kwarusu iri-ge, walma woraso towe mena yi nasolat, kelerai walma mende yi nere laksa ebem yamuk tak obosolat makluk, wirik pusu-o.

¹² Eyak pem-e towe pubu noso uwi worosolat, e inggi bem-nen towe-ge ene bem lek kujwe yoso-o.

¹³ Kat-nen-e mbal pem-nen talme-ge o ndobo worak sa mberak pil mbuwala, nggweyakma yu me-ge kat kimbiringgat-nen wok ondoso mende-ge kwarat kobong yusu-o.

¹⁴ Kat-nen-e lok lok noso mende amanggim tusuangge wirik posolat, ap-nen yagurak mende wirik posola-ge, ap-nen-e yabu wanuruk, uwi yagili-o.

¹⁵ Iri-nen inndi alen tak poso anggut amburu kwarak posolat, saitun amburu-nen entare mbenak poso kwarak posolat, nunggwi mende nonggola, ap enmawi rak poso kwarak posolat kwarigen-o.

¹⁶ Nagawan Indo-nen idnak e-ge talme kwarat ebem mbosolat, nde, e semara Libanon woraso-ge Nagawan Indo ondomok-nen yagij-o.

¹⁷ E ereba na bem towe-nen uwi worosolat, e ereba na usuaret ma-ge towe mbuwa waru-nen uwi wurusu-o.

¹⁸ Ndobo nggok ereba na-ge walma woraso kambing ondoro kwat yosolat, namok ereba na-ge kerep tumbu arem kurak yosolat kwarusu-o.

¹⁹ Wolmomtak tarem ereba na nenaru rak purak pem kat-nen waneya ndak worak pigen-o. Mo-nen at wusa nggurak tarem iri aru yusu-o.

²⁰ Kat-nen ndamuk mberak pil mbuwasola-ge, o kubu yusu-o. Iri yosola-ge, urugup worak walma woraso-ge tu waring kil nusu-o.

²¹ Singa sujwe ereba-nen-e eyok nere-nen kore ene ngolo arem waring kasu-o. Mbal Pem Nagawan-nen at amanggim naso mende lid lud tak pid ereba na nggi yusu-o.

²² Mo pil wasola-ge, singa ereba na-ge inggi mbara mborosolar-e, at kura woraso sa nene yil lobok yusu-o.

²³ Iri kwarosola-ge, ab-e yabu wanuwokluk mborogolar-e, yabu wok tenak irit worakmu o ndamuk yusu-o.

²⁴ Nagawan Indo wa-e. Kat-nen-e mondok kwarat ndak worak pigenma-o. Ereba oboksa-ge kat-nen-e kindi-net kwara yebet karuk, ndak worak pigenma-o. O yu-ge kat-nen ndak wiridnak mende nak-nen kobong yusu-o.

²⁵ Yi koma nggok yemarak worala, arem woraso mende nggok-nen marik-nen wonarurak puk worasu ereba yik ker-o.

²⁶ Yi koma iri na ombol pem-e koma nosolat, kat-nen ndak worak pidnak Lewiatan nanggu na yi koma arem keyari posolat worasu-o.

²⁷ Ereba oboksa-ge nunggwi mende mak undurak pem-e indi-ge kat kebem nak wat tak puruk worali-o.

²⁸ Kat-nen wok ondosola-ge, it-nen-e waga pili-o. Kat-nen nunggwi mende lid lud tak posoma, ir-e ndonggosa nili-o.

²⁹ Kat-nen nden karuk, kombol wok ondosola-ge, ir-e kwiye kwarat yili-o. Kat-nen indisep wanosola-ge, ir-e wat yogolar-e, tuguruk ondolma nggweyak kwat yili-o.

³⁰ Alat nde, kat-nen indisep wok ondosola-net it iri-ge ndak wosa labuk yili-o. Kat-nen o yu-ge tuguruk ngget tak pusu-o.

³¹ Nagawan Indo-nen kek tak woraso-ge pem irit wolmag-o! Ar-e at-nen ndak worak pidnak mende bem alen kasolat wolmag-o!

³² At-nen o yu yik kasola-ge, kwiye-nen tugup yosolat, at imin ndobo ebem posola-ge, ndobo arem-nen kule lasolat yusu-o.

³³ An nuruk ya woralar-e, Nagawan Indo amanggim nak ndawi yosolat woramin-o. An woralar-e, Nembal Pem Nagawan nak ebem ndawi ngarosolat woramin-o.

³⁴ At nak-nen nindi alen tak posolat woraso me, an nendawi-nen-e at alen tak posolat wolmag-o.

³⁵ Meya kwarugwi nab-e nggweyakma yu me-nen mondok lak tak unpuwag-o. Meya yugwi nab-e ondoro rak unpuwag-o. Nindi wa-e. Nagawan Indo nak erembel wani-o! Nagawan Indo nak erembel wanurag-o!