NDAWI ENGGA 102 - Nanduk Ngget Tul Pidnak Wene

Anggun panggun arem woralat tepan yidnak wene Ap anggun panggun woragolat enarem yip togolat-nen Nagawan Indo eram tepan yidnak wene.

¹ Nagawan Indo wa-e. An-nen tepan yusu-ge kuli-o. An-nen wene mbo kubusu-ge kat keyanggoma ngguwag-o.

² An anggun panggun arem worala-ge kombol wok nururak pug-o. An-nen kat keram wene pil luwasola-ge, nene kuluruk, ndag-et nak erep nggari-o.

³ An worasu-ge kule nggal ndag-et nak lak yoso-nen yusu-o. An nowag-e kanduk nggal kere yil lobok yusu-o.

⁴ An-e tusuangge lerak nggal namawi lak yosolat, nunggwi mende norag-e nisili yusu-o.

⁵ An-e yane nggwa renak mbot mondok lisa labuk yusu-o.

⁶ An-e nembaga woraso towe wunun min o lun nggwe woraso towe konamburu min nggal worasu-o.

⁷ An-e mondok nene yurag-e meya-o. Towe misik arig-et nak o ngguwa bem pak tak woraso nggal worasu-o.

⁸ Pempa an nuwim nap-nen pesel neberenak woragolar-e, it an nimin insilepma nibili ereba na-nen-e an nunu-ge imbiri lamut tak pili-o.

⁹ An-e nunggwi mende nggal-e o liri nde nasu-o. Nde, yi-ge yiplengen min nasu-o.

¹⁰ Iri kwarusu iri-ge kat kisilepma mondok kwiye worak iri bem lomboksa mbo nibigenma woralat-nen kwarusu-o.

¹¹ An worasu-ge enamorok keyama nggwe nggal lak yusu-o. An-e tusuangge nggal terabet yusu-o.

¹² Alat nde, Nagawan Indo wa-e. Kar-e nagawan pem irit woralik nalik woraso-nen yusu-o. Pem ap pem lud irit woragolat inndi yebet keyagolat wolma-o.

¹³ Kat abok ndirik yosolar-e, Sion abuwa yugun-o. Nde, at ubud kudtak tarem-e panggorak worasu-o.

¹⁴ Sion iri-ge tudsa nggilara ngguru ma-t nde, ndegel kubugwi nap-nen-e imin inndi kundugu irit wolma-o. At iri-ge mabe nggal yigisa labuk ma-t nde, it-nen-e ubud kagolat wolma-o.

¹⁵ Ap enlem oboksa-nen Nagawan Indo-nen kwarusu amawi iri na-ge kwiye yuwa-o. At mondok amawi worak woraso iri-ge nagawan nagawan oboksa-nen kwiye yuwa-o.

¹⁶ Nagawan Indo-nen Sion iri na tuguruk mendak posolar-e, kek tak abinal worak pem kwarosola, kujwa-o.

¹⁷ At-nen-e at ilirak pul yidnak woragwi ereba-nen tepan yidnak kolosolat, it-nen nggi yidnag-e ene kola keya buwa bug-o.

¹⁸ Ap abok ndesa mbuwa-nen karuk, at erembel wanuwakluk, Nagawan Indo-nen kwaroso-ge ap abok wolma enmanggim engga bem mbarer-o.

¹⁹ Nagawan Indo-nen-e at woraso sa mondok marak teram eid me-nen mbel kasu-o. Aid arem-nen urusuwak wo sa yu me mbel kil mbuwasu-o.

²⁰ Iri kwarusu iri-ge o kubu me worasolat, enarem yip tili nap enne kolosolat, unduwokluk o kubu me inpidnak nap wisirik onposolat yurak pem-nen kwarusu-o.

²¹ Iri yosola-ge, at unu-ge Sion iri me wigaruwa-o. Yerusalem-nen erembel wanogolat wolma-o.

²² Iri kwaruwa iri-ge ap enlem oboksa min nggweyakma yu me-nen tenagidnak wi woragwi nap min oboksa Nagawan Indo erembel wanuwokluk, Yerusalem ndok worogolat iri-nen at erembel wanuwa-o.

²³ Nagawan Indo-nen-e an-e nusujwe ma-t nde, namawi lak tak puruk, an nuruk wolmomtag-e poro rak pusu-o.

²⁴ Iri yosola, an-nen Mbal Pem Nagawan yak tosolar-e: ”An-e awo ap nindi worak yigit lak ma nindi wanurak pug-o” yak tigi-o. Nagawan Indo wa-e. Kar-e pem irit kuruk nak irit woraso-o.

²⁵ Nanduk o yu ndak worak pigen kuri-net kar-e woraso-nen yusu-o. Nde, mbal na kat kinggi-nen ndak worak pidnak-nen yusu-o.

²⁶ Alat nde, ereba-ge oboksa lak ma-t nde, kar-e pem irit woragun-o. Nde, ereba oboksa-ge sum erare ngget lak yosolat umbuk yoso nggal ma-o. Iri yosola-ge, kat-nen-e sum umbuk mbo bidnak nggal mbo bugunmu, oboksa lak ma-o.

²⁷ Alat nde, kar-e pem worasu iri nggal nag-et woragun-o. Kar-e lak yugun pug-o.

²⁸ Nit ninlirak-nen nderag-e pempa kona yamuksa wolma-o. Kat-nen nggetlel unpurak worasola, konak wolma-o.