NDANIEL 9 - Nanduk Ngget Tul Pidnak Wene

Ndaniel-nen at elem nap enmanggim tepan yidnak wene 9:1-19

^1-2 Nde, Agasuweros ambara Ndarius, Meria nap iri na Mbabilonia nap enanggul pem nagawan men yarik, Mbabilonia iri me tena buruk worala, olengen nandug-et at men yid iri na bem-e Ndaniel an-e aid wene engga mbarak ereba na mbenarosolat woragi-o. Nde, ereba na lombot posoma-ge, Nagawan Indo-nen at ene lomboksa yoso nap Yeremia yak tosolar-e: ”O Yerusalem siri iri-ge mondok ndamera nggururak irit woralat olengen tuju pulu (70) irit wolma-o” luk mbaridnak kagi-o.

³ Karug-e, mondok kiri keresa Nagawan Indo Mbal Pem Nagawan emengen mbarosolar-e: ”Nenabuwa ki-o” luk yak tigi-o. Iri kwarosolar-e, inndi puru yogolat-nen yurugwi karung sum iri na yutluk, mburu ninggit lak, tepan nak yosolat mabe bem irit koreyak woragi-o.

⁴ Iri yosolar-e, an nelem nap-nen meya kwarugwi ereba na-ge para Nagawan Indo Nembal Pem Nagawan yak tigi-o. Iri yosolat, an-nen yosolar-e: ”Nagawan Indo kar-e mondok nggok ala karuk, nir-e kat nak kek tak kibili-o. Kat-nen ’Kwat kinpimin-o’ luk urul yak indidnak ereba na-ge ndak ndag-et kwat onposolat, kat kabuwa kagolat, kat-nen it enpem pidnak ereba na ndak ndak kwarogolat yugwi nab-e kat-nen-e pempa enabuwa kaso-o.

⁵ Nir-e meya kwarogolat, nenlengen lamburak nak kwarogolat, lugud tak nak kwarogolat woragwi-o. Nir-e kat kimin eyak worogolat, kat-nen ’Iri nggal kwarogolat wolmomtag-o’ luk nenpem pidnak ereba na kwid turuk lugud tak nggwe mborogolat irit woragwi-o.

⁶ Nir-e kat ndegel kubugwi kene lomboksa yugwi nap ereba-nen kat kunu bem nit-nen idnak nagawan nagawan min nit-nen enne kulugwi nap min nit nonmborak min nit nenlem oboksa min wene yak unduwakluk kat-nen inpil lobok yigen ereba na-ge enne-ge kuligit lak yugwi-o.

⁷ Nagawan Indo wa-e. Kat-nen kwaroso-ge pempa ndemeret mot mot lud tak nak kwaroso-nen yusu-o. Alat nde, nit-nen-e nondomok ninnggiri rak purak mende nak kwatli-o. Nde, iri kwarugwi iri-ge nit Yurea woragwi nap oboksa min Yerusalem woragwi nap min nit nenlem nap oboksa-nen tugup lak kat-nen yidnak yidnak kwarigit lak yidnak pem kat-nen-e o erepma min koroga min ndibi ndi rak inpigen irir-o.

⁸ Nagawan Indo wa-e. Nit-nen idnak nagawan nagawan min nit-nen enne kulugwi nap min nonmborak min-nen-e it ondomok innggiri rak purak mende nak kwarogolat, kat kimin meya kwarogolat woragwi-o.

⁹ Nir-e kat kimin wim mbarogola-t nde, kar-e nit nunpud karuk, nit meya yidnak kamberam tak nonposo-nen yusu-o.

¹⁰ Nagawan Indo Nenmbal Pem Nagawan wa-e. Kat-nen nenpem posolar-e: ’An-nen kenpem pusu ndak ndag-et kwarogolat wolmer-o’ luk kat ndegel kubugwi kene lomboksa yugwi nap enpem-nen yak nondoso-t nde, kat kene-ge nir-e kwid tugwi-o.

¹¹ Nde, Isarael nap oboksa-nen kat-nen ’Iri nggal kwarogolat wolmomtag-o’ yidnak wene-ge kwid togolat, kat kene kulurak insili yugwi-o. Iri nggal kwarogolar-e, nir-e kat kimin meya kwarugwi-o. Iri kwarugwi iri bem-e imbiri lamut tak unpurak wene kat ndegel koboso nap Musa-nen mbaridnak engga arem mbarak worasu iri na-ge nit nenpem nde pusu-o.

¹² Kat-nen-e nit-nen idnak nagawan min nit min ’Kwat kinpimin-o’ luk urul yak nindigen ereba na ndak ndag-et kwat ninpigen-o. Iri kwat nonposolar-e, nggweyakma yu me-nen mbi o siri misik mbi yu nggal-e kwat inpigit lag-et nde, Yerusalem nenpem-e mondok angin worak irit mberak pigen-o.

¹³ Nde, ’Iri nggal kwarogolat wolmomtag-o’ luk, Musa-nen mbaridnak engga arem lak tak onposo mende mberak purak urul mbaridnak ereba na oboksa nit nenpem pusu-o. Iri kwat nunpusu-t nde, Nagawan Indo Nenmbal Pem Nagawan wa-e. Nir-e kat kalen tak purak mende-ge kwatli bug-er-o. Iri kwarogolar-e, nir-e meya nag-et kwat tenak woragolat, kat-nen mul nundurak wene kwara yebet kudtag-e ninsili rak pili-o.

¹⁴ Nagawan Indo Nenmbal Pem Nagawan wa-e. Lak tak onposo mende kat-nen lid lud tak pigen ereba na bem angin worak nenpem pigen-o. Kat-nen kwat ninpigen-e il pem lud tag-et kwat ninpigen-et nde, kat-nen yidnak wene-ge nir-e kwara kuligit lak yige-o.

¹⁵ Nagawan Indo Nenmbal Pem Nagawan wa-e. Kat kamawi mirik nonposolat, kat kamawi bem Mesira-nen lesa wok nunpuruk lobok yigen iri na-ge ninndi yeberag-et woragolar-et nde, nir-e meya kwarogolat, lugud tak nak irit kwarogolat woragwi-o.

¹⁶ Kar-e o nanduk ereba-net nit nenambigit nak yoso me, kisilepma Yerusalem ebem-e posolat wolmomtak pug-o. Yerusalem iri-ge kat kondomok kuwi siri min kondomok kondobo marak min-nen yusu-o. Nit min nonmborak min-nen meya kwaridnak iri na-nen ndowaga, nit nendam inggi inggi worali nap oboksa-nen-e kat kilirak min Yerusalem min yik eneyagolar-e, no mende nggal nde yik eneyali-o.

¹⁷ Nenmbal Pem Nagawan wa-e. An-nen tepan yusu min nggi yak kurusu min-e kwara kuli-o. Kat kuwi abu lak tak piga iri-ge tuguruk wiri-o. Ap oboksa-nen kar-e ndemeret Mbal Pem Nagawan-net yusu-o luk enaru yuwaklug-e, kat-nen kuwi iri-ge tuguruk koni-o.

¹⁸ Mbal Pem Nagawan wa-e. Nit nenne kwara kuli-o. Kat-nen kwara yik neneyaruk, nit-nen andi bandi kali yeba-ge kwara lombot nonposolat, o siri kat kunu luk ’Kwendeknak uwi siri-o’ yugwi siri iri min-et kwara lombot pi-o. Nit-nen tepan kat kemengen mbatli-ge nit-nen konak kwaridnak pem-e lag-et nde, kat-nen kwara nunpud kaso iri na bem-net keram tepan yili-o.

¹⁹ Nagawan Indo wa-e. Nenne kuli-o. Nagawan Indo wa-e. Nit meya yidnak kamberam tak pi-o. Nagawan Indo wa-e. Kwara lombot nunpuruk, ndag-et nak kwat ninpi-o! Nde, Yerusalem min kat kilirak min iri-ge kat kondomok karengge me, ap oboksa-nen enaru yogolar-e, kar-e ndemeret Mbal Pem Nagawan-net yusu-o yuwakluk, ndag-et nak yongga nindi-o!” luk tepan yigi-o.

Aid nap Nggabiriel-nen nabi bem nggal yik kagaid iri na iri nggal-o luk mbena yidnak wene 9:20-27

²⁰ An-e tepan kundugu woralar-e, an min an nelem nap Isarael nap min-nen meya kwarugwi ereba na-ge para yak tosolat, Nagawan Indo uwi marak iri na nanduk-nen woraso nggal tuguruk wuruwakluk Nagawan Indo Nembal Pem Nagawan emengen mbarosolat woragi-o.

²¹ An tepan yosoma-ge, nanduk nabi nggal pem aid nap Nggabiriel kagi iri na-ge an nambigit pubu lobok yij-o. Iri kwarid iri-ge keyama nggwe Mbal Pem Nagawan amanggim wam wosa kan pugwi ndak ndak pem-et kwarij-o.

²² Nde, Nggabiriel iri na-nen yosolar-e: ”Ndaniel wa-e. Kat-nen nabi nggal pem kaigen iri na-ge yebet kanok-nen ebe-ge iri nggal-o luk yak kururak pem-nen lobok yigi-o.

²³ Kat-nen Mbal Pem Nagawan emengen mbaroso tel korosola, at-nen-e kene erep nggarij-o. At-nen kat kabuwa karuk, kat-nen nabi bem nggal kaigen ebe-ge iri nggal-o luk yak kereyekluk lobok yigi-o. Iri bem-e an-nen kat-nen nabi nggal pem kaigen iri na-ge iri nggal-o luk yak korosola-ge, kar-e kwara kuli-o.

²⁴ Olengen tuju kali tuju pulu ereya worarug-e, Mbal Pem Nagawan-nen kat kelem nap min kuwi siri marak iri min-e yi meya ndi meya kwarugwi min meya kwarugwi elem min arem-nen wesera keya unpurak irit wat tak pidnak worasu-o. Nde, yi meya ndi meya oboksa amberam tak posolat, pempa lud tak mot mot kwarugwi nak nggok tak puwa-o. Iri kwat yosola-ge, kat-nen nabi bem nggal kaigen iri na min ebe-ge iri nggal-nen yusu-o luk yidnak min-e ndak ndak irit kwat ma-o. Iri yosolar-e, Nagawan Indo uwi marak iri na-ge tuguruk Nagawan Indo erembel wanugwi rak puwa-o.

²⁵ Yu-ge kwara karu yosolat, kwara yebet ki-o. O Yerusalem iri na tuguruk wururak wene wirik posola tarem-nen ap lit unpuruk mbururak nap Mbal Pem Nagawan-nen lenak pidnak nap lobok yuwa kuri-ge olengen tuju kali tuju irit wolma-o. Nde, Yerusalem iri me tuguruk worogolar-e, tula ereba na-ge tuguruk yakolat, kurak yil mburugwi ondoro ereba na-ge tuguruk worogolat wolmarik, olengen tuju kali enam pulu dua (62) ereya wolma-t nde, ereya tarem-e mondok angin worak tarem-er-o.

²⁶ Angin worak tarem ereya woraruk, worok yosola-ge, Mbal Pem Nagawan-nen lena pil lobok yidnak ap lit unpuruk noso nap iri na-ge ar-e meya kwarigit lag-et nde, wuruwa-o. Worogola-ge, nagawan misik-nen idnak esan ombo lobok yogolar-e, Yerusalem iri na min Nagawan Indo wi iri na min-e mondok ondoro min abu lak tak puwa-o. Iri kwatluk ombol nggwe-ge Mbal Pem Nagawan-nen ’Iri nggal-et kwaruwa-o’ luk lud tak pid iri na ndak ndag-et wim nab-e yi ebe nggal irit lobok yogolat inmin wim mborogolat, yigisa lak tak unpuwa-o.

²⁷ Olengen tuju ereya arem woragolar-e, nagawan iri na-nen-e ap kwarat inmin kondosolar-e: ’An-e kinmin kundik irit woramin-o’ luk kundik wolmomtak wene irit yak unduwa-o. Ereya na woragolat olengen enggendumu-ge Mbal Pem Nagawan amanggim wam wosa kan pogolat, amanggim pogolat kwarugwi ereba na-ge lak tak puwa-o. Iri kwarosolar-e, at-nen-e unu-ge unmunggum lera mboso mende unu-ge meya, enlengen lamburak nak kwarugwi mende iri na Nagawan Indo ama iri na me puwama, pempa iri me meya kwat tenak irit worakmu, iri-net meya iri iri me puwa nap iri na amanggim Mbal Pem Nagawan-nen lak tak onposo mende at lak tak uburak lid lud tak pidnak iri na ebem mberak puwa kuri-net lak ma-o” luk yij-o.