NDANIEL 8 - Nanduk Ngget Tul Pidnak Wene

Ndaniei-nen nabi bem nggal lomba kusi min kambing kusi min kaidnak wene 8:1-14

¹ Mbelsiasat-nen o tena woralat olengen kenan tak posoma-ge, an-e mberen pem tak posolat nabi bem nggal yik kagi-o.

² Nde, nabi bem nggal-nen yik kasolar-e, an-e ngguberenot-nen tenagidnak wi Elam-nen Perisia iri me-nen o siri nggok Susan iri me worala kagi-o. An-e iri me woralar-e, Yi Ulai eyak pem mendak woragi-o.

³ Nde, yi iri na eyak pem-e lomba kusi misik anggul ambo-ge mot mberen worak kagi-o. Nde, anggul ambo misik ponok nggwe iri na-ge emesiyag-et nde, misik iri na-ge ngget-nen mondok mot irit kagi-o.

⁴ Yik kaginggal-e lomba kusi iri na-nen-e anggul ambo Iri na-nen mo mboso (barat) nggwe ambigit min abare abam (utara) nggwe ambigit min abare ena (selatan) nggwe ambigit min anggul ambo-nen wiril lobok yosola kagi-o. Lok lok noso mende misiger-o luk mbi-nen lomba kusi iri imin pak turak na meya, iri-nen inggem mangga mbururak na meya irit kagi-o. Lomba iri-ge at indi-n pidnak nak kwarosolar-e, indi kek yij-o.

⁵ Iri kwarosola, an-e yik karok worasoma-ge, kambing kusi misik mo mboso (barat) nggwe-nen pong kil lobok yosolar-e, ijog-e mengesa nggweyak pem-e yemen kagit lag-o. Kasoma-ge, erengen ponok ponok enggendumu anggul ambo nggok misiget kagi-o.

⁶ Nde, kambing kusi iri na-ge yi eyak pem kagi lomba kusi iri na eram lobok yosolar-e, ebem kore yil isilepma kunduruk ambigit nggwe-t lobok yij-o.

⁷ Nde, lomba kusi iri na worosola, an yik karok worasoma-ge, kambing kusi iri na-nen isilepma min lomba kusi iri na ebem mbud yosolar-e, lomba kusi anggul ambo mberen ereya na-ge tenggerak pij-o. Iri rak posoloma-ge, lomba kusi iri na-ge kambing iri na wururag-e amawi lak yij-o. Iri kwasa wosa mbud tak puruk, ijok-nen lul lul worosola, ap misiger-o luk mbi-nen imiri yurag-e meya yij-o.

⁸ Nde, kambing kusi iri na-ge indi-nen kek yosolat woragij-et nde, mondok o obok tena bosoma-ge, anggul ambo nggok iri na-ge tenggesa labuk yij-o. Tengge yosoloma-ge, tengge yid iri na ondolma-ge anggul ambo empat irit lagaij-o. Nde, anggul ambo ereya na lasolar-e, abi-ge arik tak nin nggwe nan nggwe ambigit ndogara irit lagaij-o.

⁹ Nde, anggul ambo ereya na enggendumu misik iri na bem-nen-e anggul ambo marik misik pararik lasolar-e, mondok nggok irit lasolar-e, at-nen tenagidnak amawi-ge abare ena (selatan) nggwe-nen mo luwaso (timur) nggwe-nen Tul Pidnak Nggweyak ambigit nggwe-nen oboksa tenagil mbirij-o.

¹⁰ Nde, anggul ambo iri na-ge nggog-et yosolar-e, aid arem woragwi san ombo wonaru ereba na imin wim mbarij-o. Nde, wonaru ereb-e lembera nggweyakma mberak pil mbuwaruk, ijok-nen lul lul wirij-o.

¹¹ Iri-nen at-nen-e aid arem woraso san ombo onowe iri na min-et ebem mbud yij-o. Iri yosolar-e, o nda yidnak ndak wosa aid arem woraso san ombo onowe iri amanggim wosa amanggim pugwi ereba na tet lak tak posolat, at erembel wanugwi o iri na tet tud tak posolat kwarij-o.

¹² Iri kwarosola-ge, iri me woragwi nap-nen-e meya nak kwarogola, ”At amanggim pogolat wolmomtag-o” luk enpem pidnak ereba na-ge pigit lak yiga-o. Iri kwarogolar-e, it-nen Nagawan Indo ebem inndi angin tubu yugwi ndemeret iri na-ge nggweyakma mbo bij-o. Nde, anggul ambo iri na-nen kwaridnak nak ebe kwat yosolat woragij-o.

¹³ Iri luk, an-nen kuliginggal, aid nap misik-nen aid nap misik yak tosolar-e: ”Nabi nggal pem kasu ereba kwat tenak worasolar-e, nunggwirik tarem nggal wolma-o? Nde, o nda yidnak irit wosa Mbal Pem Nagawan amanggim wosa kan pugwi iri na meya nggok kwarogolar-e, nunggwirik tarem nggal wolma-o? Nde, san ombo aid arem woragwi min Nagawan Indo erembel wanugwi o iri min-e nunggwirik tarem nggal lul lul wat tenak wolma-o?” luk yij-o.

¹⁴ Yosoloma, kuliginggal-e, aid nap misik iri na-nen wene onggo yosolar-e: ”Iri-ge, 1.150 pem ereya woragolar-e, Mbal Pem Nagawan amanggim keyama wosa pugwi min kuplila wosa pugwi min-e pigit lak wolma-o. Nde, iri woraruk ombol nggwe-nen perak Nagawan Indo erembel wanugwi o iri na-ge tuguruk ngget tak puwa-o” luk yij-o.

Aid nap Nggabiriel-nen nabi bem nggal kagaid iri na ebe-ge iri nggal-o luk nam para yak tidnak wene 8:15-27

¹⁵ Nde, an-nen nabi bem nggal kagi iri na ebe-ge no kagi-o luk nindi mbel tenak worasoma-ge, an nerare bem-e ap nggal misik mimo men yij-o.

¹⁶ An-nen kuliginggal-e Yi Ulai iri na eyak ele bem-nen ene nggoksa yosolar-e: ”Nggabiriel wa-e. At iri-nen nabi bem nggal kagaid iri-ge ebe-ge iri nggal-o luk kerengga yak ti-o” luk yij-o.

¹⁷ Yosoloma, aid nap Nggabiriel an nerare bem mendak iri na neram panggosa lobok yosola-ge, an-e kwiye-nen-e mbud yigi-o. Nde, Nggabiriel iri na-nen an yak norosolar-e: ”Lak yoso nggweyakma nap wa-e. Nabi bem nggal kaigen iri-ge ’Abok worok tak posolat-nen kwat momtag-et kagi-o’ luk kar-e karu yurag-o” luk yak nirij-o.

¹⁸ Nggabiriel-nen an nimin wene yosola ereya na-net an-e nindi laksa worak woragi-t nde, at-nen-e ninggi waga mendak nibij-o.

¹⁹ Mendak nuburuk, at-nen yosolar-e: ”Mbal Pem Nagawan isilepma yosolar-e, iri na-nen ndowaga abok-nen kwat ma mende-ge an-nen yak kirimin-o. Nde, kat-nen nabi bem nggal kaigen iri-ge abok-nen kwat momtak irit kaigen-o.

²⁰ Kat-nen lomba kusi anggul ambo mberen kaigen iri-ge nagawan Meria min Perisia min-nen tenagidnak wi ut mimirig-et kaigen-o.

²¹ Nde, kambing kusi iri-ge Yunani nagawan-nen tenagidnak wi ut mimirig-et kaigen-o. Nde, erengen mberen ereya na enggendumu anggul ambo nggok kaigen iri-ge mondog-et tel korosolat Yunani nagawan men ma iri ut mimirik-nen yusu-o.

²² Nde, anggul ambo nanduk iri na tengge yosola, anggul ambo empat lagaid ereya-ge Yunani nagawan-nen tenagidnak wi iri-ge menggesa empat kwat ma-o. Alat nde, ereya-nen-e nagawan nanduk woragid amawi nggal ndak ndag-e wolma bug-o.

²³ Nagawan ereya-nen tenagidnak wi ereba na woroksiyem wok yosola-ge, meya kwarugwi-t mondok nggok ma-o. Meya kwarugwi nggok yosola-ge, ap nagawan wene koloso buk, ap enmberam laso misik men ma-o.

²⁴ At iri-ge mondok amawi kwarat ma-o. Alat nde, at ondomok amawi-ge lag-o. At-nen-e lak tak onposo mende kwiye worak irit pil lobok yosolat, at-nen kwaruwa mende-ge oboksa ombol nggwe nak ma-o. At-nen-e enmawi worak nap min Mbal Pem Nagawan ilirak min-e mondok lak tak unpuwa-o.

²⁵ Ar-e indi tenggerak me, at-nen ap enmberam lasolar-e, mondok ombol nggwe nak yosolat wolma-o. Ar-e ondomok-nen kek yosolat, kirimbi yak indigit lak-nen ap kwarat lak tak onposolat wolma-o. Iri-nen nagawan mondok kek tak nggok iri na-t nde, kwiye lag-et imin wim mbaruwa-o. Alat nde, at yigisa lak tak puwa iri-ge ki nap enmawi bem-nen-e lak tak ubuwa bug-o.

²⁶ Mbal Pem Nagawan amanggim keyama min kuplila min wosa purak wene nabi bem nggal kaigen wene kerengga kat yak kiriga iri na-ge ndemeret kwar-et ma-t nde, iri kwarurak tarem-e abok ereba-nen kwat momtak awo worasu-o. Iri ala-ge, iri wene-ge ap misiger-o luk mbi mondok yak undurak pug-o” luk yij-o.

²⁷ Iri luk abok nggwe-ge an-e namawi lak luk, kugwi neramu siyak woragi-o. Op luk, men yosolar-e, nagawan amanggim an nebem pidnak yabu ereba na wanigi-o. Iri yosolar-et nde, an-e nabi bem nggal kagi iri na ngge kagi-o luk yebet kerenak woragi-t nde, ebe-ge iri nggal-o luk mbi naru yigit lag-o.