NDANIEL 7 - Nanduk Ngget Tul Pidnak Wene

Ndaniel-nen at-nen nabi bem nggal kaidnak ndindera yidnak wene 7:1–12:13 Ndaniel-nen nabi bem nggal lok lok noso empat kaidnak wene 7:1-8

^1-2 Nde, misik tarem kubu nggeret Nagawan Mbelsiasat iri na Mbabilonia nagawan men yid olengen iri bem-e Ndaniel an-nen nabi kasolat-nen nabi bem yik kagi-o. Nde, nabi kagi iri na-ge engga bem mbarigi-o. Nde, nabi kagi engga bem mbarigi na-ge yu-o: O wija ponok ponok, abare abam nggwe, ena nggwe, mo mboso nggwe, mo luwaso nggwe, mondok kwiye worak puk kasolar-e, iri-nen ndowaga yi koma nden penden kasolat, saberep mbaberep mbij-o.

³ Iri yosolar-e, lok lok noso empat mondok nggok meya irit yi koma arem-nen pilana nam yij-o. Nde, ereya-ge abage-ge arik tak irit nam yij-o.

⁴ Nde, nandug-et iri na abage-ge singa abage nggal-et nde, isiyamu-ge towe ud isiyamu nggal-o. Nde, an nerengen yik karok worasoma-ge, isiyamu iri na-ge konoksa mbij-o. Iri yosola-ge, at iri na-ge kudsa mendak pamu, ap mendak woragwi nggal mendak woragij-o. Iri rak purug-e, indi-ge ap inndi nggal irit wok tij-o.

⁵ Nde, lok lok noso misik imbirik iri na-ge isilepma worak mberuang ndakngge nggal mondok nggok irit kagi-o. Nde, iri-ge ijok mberen pem-nen mendag-o. Nde, uno ebelwak mbarak kenan eyakma puksa kagi-o. An kuliginggal mberuang ndakngge iri na yak tosolat, enne misik-nen yosolar-e: ”Kat-nen uno norak ala-ge, norak nag-o!” yak tij-o.

⁶ Nde, an-e kwara lombot posolat worasoma-ge, lok lok noso misik imbirig-et nam yij-o. Nde, iri abage-ge masan tutul iri-ge pus nggal nggok-net nde, erawak pem-e towe isiyamu nggal-et nde, isiyamu empat worag-o. Anggul na empat worag-o. Nde, yik kagolar-e, at iri-ge mondok amawi worak kek tak nggal-o.

⁷ Nde, an-e yik karok worasoma-ge, empat pem tak posolat lok lok noso imbirik misik nam yij-o. Iri-ge mondok kwiye worak-nen amawi worak yik karug-e, enaboro min wat yoso irit nam yij-o. Nde, eyag-e nggok-nen mbesi amawi worak iri na bem-e at-nen wosa naso mende ereba na-ge leraben wanosolat ndamera lak tak pij-o. Iri yosolar-e, eyak ngen ereba na-ge ijok-nen lul lul wirij-o. Nde, iri-ge nanduk luwagid ereya na nggal-e lag-o. Iri-ge arig-et anggul ambo-ge sepulu worag-o.

⁸ Nde, an-e anggul ambo ereya na yik karok lombot posolat worasoma-ge, mimo ereya na-t anggul ambo ereba na enggendumu anggul ambo misik lagaij-o. Nde, anggul ambo iri-ge marig-et nde, iri na-nen wat kasolar-e, anggul ambo ereba na enggendumu kenan-e pip kona keya bij-o. Nde, anggul ambo marik iri na-ge erengen-e ap enlengen nggal-o. Nde, emnde nggwe-nen-e indi kek tak pem wene yosola kagi-o.

At pem-et uruk nak woraso iri na owene nabi bem nggal pem yik kagaid wene 7:9-14

⁹ Nde, an mondok yik kaginggal-e ap kek tak-nen koreyak woragwi ondoro siyak pogola yik kagi-o. Pogola-ge, pem-et uruk nak woraso iri na-ge ap kek tak-nen koreyak woragwi ereya na misik pem kore yosola, kagi-o. Nde, at iri usum min anggulsu min-e mondok loro yeben mbin nggal irit kagi-o. Nde, at koreyak woraso iri na min koreyak woraso ijok wukoma ijok nggal iri na min-e kanduk nggal kere yosolat, amare yirip wirip mbosola kagi-o.

¹⁰ Nde, at koreyak woraso ondoro iri me-nen-e kanduk misik yi nggal urusu kundugu mborosola kagi-o. Nde, ap kwarat (ribuan)-nen-e at ndegel obogola eneyagi-o. Ap mondok kwarat (jutaan)-nen-e at eram mendak woragola eneyagi-o. Woragolar-e, ap enpem wene mbarugwi tel korogolar-e, engga ereba na-ge pinggiril lobok yiga-o.

¹¹ An yik karok worasoma-ge, indi kek tak pogolat-nen yugwi wene-ge anggul ambo marik iri na-nen indi kek tak pem wene-ge kwarat wirik posola kuligi-o. Iri luk, imbirig-e lok lok noso mende empat tak posolat nam yid iri na-ge wutluk, wosa kanma pil nggwikma, kan-nen nuruk, lak tak pij-o.

¹² Nde, lok lok noso mende erep ereba na-ge amawi elem ereba na-ge tuguruk lesa wanuruk, ”Kenpe-ge ereya nggal kuri nak kunluk wolmomtag-o” luk, wat tak paga yak indij-o.

¹³ Iri tarem kubu nabi nggal pem yik kaginggal-e ap nggal misik kagi-o. At iri-ge nggan nggan-nen lop lop worak irit lobok yarig-e, pem-et uruk nak woraso iri na eram wok yosola-ge, ”At yu na lobok yij-o” luk pem-et uruk nak woraso irit aru rak piga-o.

¹⁴ At iri wok tosolar-e, kek tak obosolat, nagawan o tena wolmomtak amawi irit inggem pidnak me, yi nap ndi nap enlem oboksa, enne lombok, enlem lombok oboksa-nen at ndak ndegel obogolat woraiga-o. Nde, at-nen nagawan woralat, pem irit o tena wolma-o. Nde, o tena wolma iri na-ge mondok lak tak puwa bug-o.

Nabi bem nggal kagaid iri na ebe-ge iri nggal-o luk mbena yidnak wene 7:15-28

¹⁵ Nabi bem nggal ereba na yik kasolar-e, nindi kabak yosolat, mondok kwiye kwarat kagi-o.

¹⁶ Iri ala karuk, an-e ap mendak worali ereba na misik eram mbirigirik, ”Nabi bem nggal kagi ereba na-ge oboksa ngge nggal kwarag-o?” luk kin wanigi-o. Kin wok obosola-ge, at-nen-e iri nggal-o luk mbena yak nirij-o.

¹⁷ At-nen yak norosolar-e: ”Lok lok noso mende mondok nggok meya empat ereya-ge nggweyakma yu me nagawan empat men marik o tena wolmomtak ndak ndag-et kaigen-o.

¹⁸ Alat nde, Mbal Pem Nagawan Mondok Kek tak ilirak-nen-e o tena buruk wolmomtak amawi iri-ge ininggem-et puwa-o. Nde, it-nen o tena buruk woragolar-e, pem irit tena wolma-o” luk yak nirij-o.

¹⁹ Iri lug-e lok lok noso mende misig-e empat tak posolat nam yid iri na abage-ge misiget ereb-e lak, arik tak-nen ebe na mondok aye worak, at naso mende wosa nasolar-e, ijok abis tembaga min eyak mbesi min ereya na bem-nen yigisa keya buruk, leraben waga nasolat, eyak ngen-e lul lul wosa keya bosolat kwarosola kagi ereya na-ge ebe-ge no min ndak ndag-o luk naru yurak irit peragi-o.

²⁰ Iri-nen iri na anggulwak ambo sepulu ereya na min anggul ambo marik misik lasolar-e, anggul ambo kenan woraso ereya na pip konoksa mberak pid ereya na wene min anggul ambo marik iri na-ge erengen worak, emnde worak, indi kek tak pem wene wirik poso iri na-ge anggul ambo erep ereba na-ge aye lag-et nde, marik iri-ge yik kagolar-e, onowak min lera mboso kagi na min wene-ge naru yurak irit peragi-o.

²¹ Nde, an-nen anggul ambo marik iri na yik kaginggal-e Mbal Pem Nagawan ilirak inmin wim mbarosolar-e, urugwe nggwe rak onposola kagi-o.

²² Iri kwarosola-ge, at pem-et uruk nak woraso iri na lobok yarik, wene mbenarosolar-e: ”Mbal Pem Nagawan Mondok Kek tak iri na ilirag-e ndemeret mot mor-et yili-o” luk mbarij-o. Mbaramu-ge, Mbal Pem Nagawan ilirak-nen o tena wolmomtak amawi wanurak tarem-e wok yij-o.

²³ Nde, iri nggal-o luk yak niridnak wene-ge yu-o: ”Lok lok noso mende empat tak posolat nam yid iri-ge nggweyakma yu me nagawan empat men ma iri empat tak posolat nagawan men ma-nen yusu-o. Nde, at-nen tenaguwa wi-o it erep ereya ndak ndag-e lag-o. Arik tak irit wolma-o. At yu-nen tenagidnak wi iri-nen-e yi wi ndi wi oboksa yigisa aben nuruk keya bosolar-e, ereb-e ijok-nen lul lul wuruwa-o.

²⁴ Nde, anggul ambo sepulu kaigen iri-ge nagawan sepulu-nen abok o tena wolma ereya ndak ndag-er-o. Iri woraruk ombol nggwe-ge nagawan ereya na nggal-e lag-o. Are, abage nin arik irit nagawan misik nam yosolar-e, nagawan kenan ereya na urugwe nggwe rak irit unpuwa-o.

²⁵ Nde, at iri-nen-e Mbal Pem Nagawan Mondok Kek tak iri na obok mbarosolat, Mbal Pem Nagawan ilirak anggun panggun tak unpuwa-o. At-nen-e imiri mbarak pidnak wene ereba na nden yaga nin tak posolat, Mbal Pem Nagawan ilirak-nen Nagawan Indo erembel wanogolat nggok sakwi tarem sakwi ereba na nden kudtak yebet kasolat ma-o. Iri kwarosolat, Mbal Pem Nagawan ilirak yemndak unpuruk woralar-e, olengen kenan tak puruk, misig-e ngaksa waneya enam irit wolma-o.

²⁶ Iri na worasoma-ge, aid arem-nen ap enpem wene mot mot mbarugwi sa iri na me-nen wene mbatlug-e, at-nen o tena woraso amawi iri na-ge waburuk, at iri na ebe-ge yigisa lak tak puwa-o.

²⁷ Nggweyakma yu me tena woragwi amawi min nggok kek tak woragwi oboksa min ereba na-ge Mbal Pem Nagawan Mondok Kek tak iri na ilirak wok unduwa-o. Nde, it-nen o tena woragwi amawi iri na-ge lak ma bug-o. Nggweyakma nap nagawan oboksa-ge tugup lak it nak ndegel onpogolat it-nen yidnak yidnak kwarogolat wolma-o” luk yak nirij-o.

²⁸ Iri wene-ge irir-o. Nde, an-e mondok kwiye kwarat kasolat, nerare nin agaij-et nde, wene ereba oboksa-ge ap misiger-o luk mbi mondok yak indigit lag-o.