NDANIEL 6 - Nanduk Ngget Tul Pidnak Wene

Ndaniel iri na singa ndakngge emndam mbunmu mberak pidnak wene 6:1-29

¹ Nde, Mbelsiasat iri na wutlug-e, Meria nap Ndarius-nen-e Mbelsiasat-nen tenagidnak wi iri na-ge wanij-o. Nde, iri tarem-e Ndarius na-ge olengen enam pulu dua (62) worasolat-nen wanij-o.

² Nde, Ndarius-nen-e at-nen tenagidnak wi iri na-ge tembesa keya buruk, at indipma ngguberenot seratus dua pulu (120) mendak inpil lobok yamu, ngguberenot-nen ondomok tak tenagil lobok yiga-o.

³ Nde, at eyabu kona wanuwakluk, nagawan iri na-nen-e Ndaniel min ap mberen nap min-e it ngguberenot ereba na yik eneyarok wolmakluk lesa mendak inpij-o.

⁴ Iri yamu, Ndaniel-nen kwaridnag-e ngguberenot min it yik eneyarok woragwi nap erep ereya na min-nen kwarugwi nggal-e lak, mondok konak irit kagaij-o. Iri ala karug-e, nagawan iri na-nen-e at-nen tenagidnak wi ereba na enanggul pem tena unpuruk wolmomtak irit Ndaniel mendak uburak yebet kagaij-o.

⁵ Alat nde, it ngguberenot min it yik eneyarok woragwi nap erep min-nen-e meya rak puwokluk tula kore yogolar-e, Ndaniel-nen o tena woralat yabu lugud tak kwaridnak nde kul, lak? luk mbenat obogolat woraiga-t nde, Ndaniel iri-ge ndemeret tugup lak, mot mot nak kwarosolat, lugud tak na mariget tet mondok kwarigit lak me, it-nen meya rak puwokluk yiga na-ge yugwi rugwi yij-o.

⁶ Iri ala karuk, it-nen yak kerak mbogolar-e: ”Ndaniel-nen lugud tak kwaroso buk me, at Embal Pem Nagawan erembel wanoso iri bem-net at meya rak purak nde ma-o” luk yiga-o.

⁷ Iri luk, it-nen nagawan eram mborogolat-nen yogolar-e: ”Nagawan Ndarius wa-e. Nagawan kar-e mondok pem irit kurug-et wolmin-o!

⁸ Nap kat-nen tenagidnak wi tena worali nap nit oboksa-ge yik eneyarok woragwi nap-nen na irit, ngguberenot-nen na irit, ngguberenot indipma nap-nen na irit, iri-nen yabu tena woragwi nap erep-nen na irit, nit oboksa-nen wene mbarak puruk yak kitli-o. Kat-nen engga mbara wirik posolar-e: ’Mondok ndemeret iri nggal-et kwarogolat wolmomtag-o’ luk, engga mbara wirik posolar-e: ’Nde, tiga pulu tarem ya woragolar-e, ap misiger-o luk mbi-nen kugwiwak ala na, ki nap ala na, mondok emengen mbarurak pug-o. Are, an nak nemengen mbarurag-o. Ta-nen nde wene iri nde kwid tuwa nab-e singa ndakngge emndam mbunmu mberak purag-o’ luk wene wirik pi-o.

⁹ Nde, mbarugun wene iri na-ge nagawan Meria min Perisia min-nen pempa kwarogolat wolmomtak lak tak purak na lag-o luk watsa posolar-e, kat kinggi amburu purag-o” luk yak tiga-o.

¹⁰ Yogoloma-ge, Nagawan Ndarius-nen-e: ”Iri nggal-et kwarogolat wolmomtag-o” luk mbaridnak pem at inggi amburu pij-o.

¹¹ Nde, ”Iri nggal kwarogolat wolmomtag-o” yidnak engga iri na bem nagawan-nen inggi amburu pidnak wene Ndaniel-nen kulurug-e, ama mbirij-o. Mberarig-e, at woraso ondoro teram papalo tumende Yerusalem ambigit pilidnak ereba na manda at-nen pem kwaroso nggal kwarosolar-e, endaru yunggusa, anggul Yerusalem ambigit ndimirik purug-e, o misik tarem-e kenan pem Embal Pem Nagawan eram tepan yosolat, erembel wanosolat yoso irit papalo tumende kuwarak ereba na manda yunggusa labuk luk, tepan yosolat woragij-o.

¹² Nde, Ndaniel iri na at Embal Pem Nagawan iri na eram tepan yosoma-ge, at imin sirid nap-nen-e kaiga-o.

¹³ Karug-e, it ereba na-ge Ndaniel obok waruk nagawan iri na eram mbirigarik-nen yogolar-e: ”’Tiga pulu tarem ya bem woragolar-e, kugwiwak emengen mbatlik, ki nap mbi enmengen mbatlik iri-ge mondok yurak pug-o. Are, nagawan kat nak kemengen mbarurag-o. Ta-nen nde wene mbaridnak iri na nde kwid tosola-ge, singa ndakngge emndam mbunmu mberak purag-o’ luk yidnak engga iri na bem kat-nen kinggi amburu pigen na-ge lag-a?” luk yiga-o. Yogola-ge nagawan iri na-nen onggo yosolar-e: ”Iri-ge ndemerer-o. Wene iri-ge tuguruk lak tak purak wene-ge lag-o. Meria min Perisia min-nen pempa kwarogolat wolmomtak watsa pidnak wene-net yusu-o” luk yij-o.

¹⁴ Yosoloma, it-nen nagawan iri na yak togolar-e: ”Yewura-nen waga mbo bil lobok yidnak nap Ndaniel iri na-ge nagawan kar-e erengenma nggal tak kobosolat, kat-nen wirik pidnak wene min-et te rak pusu-o. Iri kwarosolar-e, tepan yosolar-e, misik tarem-e kenan pem-et pempa tepan yik tenak worasu-o” luk yak tiga-o.

¹⁵ Iri yak togola kulurug-e, nagawan iri na-ge indi puru luk, ”Ngge kwarimin-o?” luk umud irit kagaij-o. Iri yosolar-e: ”Nggesa-nen Ndaniel iri-ge imiri yimin-o?” luk kwarat tu kore yij-o. Iri kwarosolar-e, mondok o keyama yij-o.

¹⁶ Nde, ap ereba na nagawan eram tuguruk wok yogolat-nen yogolar-e: ”Nagawan wa-e. Meria min Perisia min-nen pempa kwarogolat wolmomtak watsa pidnak wene ereba na bem-nen nagawan kat-nen wirik pidnak wene-ge nden kalik penden kalik yurak wene-ge lag-o yidnak iri na kindi yebet ki-o” luk yak tiga-o.

¹⁷ Iri yogola karuk, nagawan-nen wene wirik posolar-e: ”Ndaniel iri na-ge tenaga singa emndam mbunmu mberak per-o” yij-o. Yurug-e, at-nen Ndaniel yak tosolar-e: ”Kat-nen pempa tugup lak kek tak poso Kembal Pem Nagawan-nen kimiri yuwag-o” luk yak tij-o.

¹⁸ Nde, Ndaniel iri na mberak purug-e, kerep nggok mbun iri na emnde nggelak piga-o. Nggelak purug-e, kerep iri na bem-e nagawan-nen-e at-nen tenagidnak wi iri na-nen idnak lop nok tak pugwi mende iri na bem-nen lop nok tak posolat, iri-nen ap yok nggok ereba na-nen idnak lop nok tak pugwi mende bem-nen lop nok tak posolat kwaridnak me, ap mbi-nen Ndaniel iri na singa ereba na emndam-nen mengga keya burag-e meya irit kwat yij-o.

¹⁹ Iri rak purug-e, nagawan iri na-ge at woraso sa mberarik woralar-e, ar-e norak na meya, indi yamuk tak purak na meya, nde, kubu-ge nene yigit lak, uruk nak irit nene yij-o.

²⁰ O kil posola, Nagawan Ndarius na-ge men luk, ndag-et nak mberarik, mbun iri na me wok yil mbirij-o.

²¹ Wok yosolar-e, ene-ge ndoklele ene nggoksa yosolar-e: ”Uruk nak woraso Mbal Pem Nagawan ndegel oboso nap Ndaniel wa-e! Kar-e pempa tugup lak ndegel oboso Kembal Pem Nagawan iri na-nen ndak kimiri yid, lak?” luk yij-o.

²² Iri yosola, Ndaniel-nen onggo yosolar-e: ”Nagawan kar-e pem irit kurug-et wolmin-o!

²³ An Nembal Pem Nagawan-nen-e at-nen idnak aid nab-e pil lobok yamu, aid nap-nen singa ndakngge yeba emnde yimaga keya bamu, we sil tet neyagit lak yij-o. Nde, Mbal Pem Nagawan-nen an nimiri yid iri-ge an-e Mbal Pem Nagawan imin na irit, nagawan kat kimin na irit, meya kwarigit lak pem-net nimiri yij-o” luk yosola kulij-o.

²⁴ Yosoloma, Nagawan Ndarius iri na-nen alen kwarat lug-e, ”Ndak Ndaniel yu mbun arem-nen pil lumomtag-o” luk wene wirik pamu-ge, Ndaniel iri na pil luwaruk-nen lombot piganggal-e, ar-e Mbal Pem Nagawan ebem indi angin tubu yidnak me, Ndaniel ebem-e mariget tet mep tak pigit lak irit kaiga-o.

²⁵ Iri rak puruk, Ndaniel ebem ennesiget wene piga nap ereba na-ge nagawan-nen: ”Tena unpurag-o” yamu, tena unpuruk, it min onkwerak min inlirak inmin-et lambuksa singa ndakngge emndam mbunmu mberak inpil mbiga-o. Mberak onpogola-ge, awo nggweyakma mbigit lak ma teram nak-nen singa ereba na-nen onowak min yigisa lak tak inpij-o.

²⁶ Nde, iri rak purug-e, Nagawan Ndarius-nen engga mbara yi wi ndi wi worali nap enlem oboksa, enne lombok, enlem lombok enmanggim engga mbara wirik posolar-e: ”Naptak wiwa-o!

²⁷ An-nen tenagidnak wi worali nap oboksa yak kundusu-o. Ndaniel-nen erembel wanoso Mbal Pem Nagawan iri nak kek tak pogolat, indi aye worak wolmomtag-o. Nde, at iri-ge pem-et woralik nalik woraso Mbal Pem Nagawan-nen yusu-o. At-nen tenagidnak wi-ge lak yigit lak, pem irit wolma-o. At-nen tenagidnak wi-ge lak momtag-e meya-o. At amawi-ge mondok lag-e ma bug-o.

²⁸ At iri-ge inmiri yosolat, wisirik onposolat kwaroso-nen yusu-o. Mbal pem-nen na irit, nggweyakma-nen na irit kwiye worak kwarosolat, kagwi buk mende kwarosolat yoso-o. Nde, Ndaniel-e singa emndam-nen imiri yij-o” luk mbarij-o

²⁹ Nde, iri nggal kwatlug-e, Ndarius-nen o tena worala na irit, Perisia nagawan Kores-nen o tena worala na irit, Ndaniel iri na-ge unu worak, kek tak irit woragij-o.