NDANIEL 5 - Nanduk Ngget Tul Pidnak Wene

Nagawan Mbelsiasat Nebukatnesat ambara iri na-nen nggok sagid wene 5:1-12

¹ Nde, misik tarem-e Nagawan Mbelsiasat-nen-e ap yok nggok nak enpe lambuksa seribu (1.000) irit at-nen nggok sagid iri na me lobok yurak yonggo unpuruk, anggut engen amburu ningga-o.

² Nde, anggut amburu nonggolar-e, Nagawan Mbelsiasat-nen yosolar-e: ”Emas min perak min pem-nen konidnak embe, Yerusalem iri me-nen Mbal Pem Nagawan ama woraso an neid Nebukatnesat-nen mberena waruk lobok yidnak ereba na pil lobok yurag-o” luk yij-o. Nde, Mbelsiasat-nen iri yid iri-ge ap yok nggok ereba na min ogwerak min ndegel ubugwi kweyap at-nen inmin woraso ereba na min at ondomok min-et embe ereba na arem kenangga norak perasolat-nen yij-o.

³ Iri yosoloma, embe ereba na ndag-et nak waruk lobok yogoloma-ge, anggut engen amburu na-ge embe ereba na bem kenangga it oboksa ningga-o.

⁴ Nonggolar-e, it unkugwiwak emas min perak min tembaga min mbesi min e min kerep min pem-nen konidnak ereba na erembel waniga-o.

⁵ Nunggukmu-ge, ap ininggi misig-e mimo nak nagawan woraso sa iri na me kebet pem tal eyaya kwarat yimbirik woraso sa iri na me-t engga mbarosola, nagawan iri na erengen-net nam kagaij-o.

⁶ Kasolar-e, kwiye-nen erare nin yosolar-e, endaru min-et lele yij-o.

⁷ Iri kwarosolar-e, ”Iri nggal kwat ma-o” luk urul pugwi nap min wi yurak mende kwarugwi nap min wonaru mbenarugwi enaru nap min irit lobok yuwakluk, ene nggoksa wene mbo inpij-o. Yonggo enpamu, it lobok yogola, nagawan-nen yosolar-e: ”Ta-nen nde engga mbarak iri nde wonatluk, wene ebe-ge iri nggal-o luk yak nde norogola-ge, an-nen-e nagawan-nen yurugwi sum lorok sum ungu min emas-nen konidnak engen nggal yurugwi min kek tak obosolat yirik ibimin-o. Iri rak obosolat misig-e an-nen tenagidnak wi yu arem o tena wolmakluk, nit mberen nentalu mendak ibimin-o” luk yij-o.

⁸ Yosoloma, it inndi tenggerak enaru nap ereba na-ge panggosa mbiriga-t nde, it-nen-e engga mbarak iri na-ge wonarurak na meya, iri-nen wene ebe-ge iri nggal-o luk nagawan para yak turak na meya irit yij-o.

⁹ Iri yogola, Nagawan Mbelsiasat iri na-ge mondok indi kabak yosolat, erare nin yosola-ge, at-nen idnak ap yok nggok ereba na inndi nak kabak yiga-o.

¹⁰ Nde, nagawan min ap yok nggok ereba na min inni enne kulurug-e, nagawan ija iri na-ge o nggok sagili iri na me nggosolat-nen yosolar-e: ”An-nen idnak nagawan kar-e kuruk pem irit wolmin-o! Kindi kondok yi-o. Kerare nin yusu meyog-o.

¹¹ Nde, kat-nen tenagidnak wi arem-e ap misig-e marak mbal pem nagawan ereba na indi arem kobong yidnak worasu-o. Nde, nagawan kat keid o tena worala tarem-net ap iri-ge mondok indi tenggerak, kwara yebet kaso, indi nggat nggat worak kugwi indi nggat nggat nggal irit woraso-o. Nde, at iri-ge kat keid Nebukatnesat-nen-e ’Iri nggal kwat ma-o’ luk urul pugwi nap min kagwi buk mende kwarugwi nap min yi iminep ndi iminep enaru nap min wonaru mbenarugwi enaru nap min ereba na enanggul pem lenak pamu-o.

¹² At iri-ge mondok kwiye worak indi nggat nggat worak-nen nabi kaidnak ebe-ge iri nggal-o luk para yoso aru nap, kura wene-t nde, nam tak posolat, wene mondok nil kil tag-et nde, mondok konosolat kwaroso-o. At iri unu-ge Ndaniel-et nde, Nagawan Nebukatnesat-nen-e unu-ge Mbelsasat yarij-o. Iri ala-ge, at-nen engga mbarak iri-ge ebe-ge iri nggal yosolat-nen mbaridnag-o luk yak kuruwak-nen wene mbo ibi-o” luk yak tij-o.

Ndaniel-nen engga mbaridnak iri na-ge ebe-ge iri nggal-o luk yak tid wene 5:13-30

¹³ Nde, Ndaniel iri na-ge ndag-et nak nagawan eram imin lobok yiga-o. Iri yogola, nagawan-nen Ndaniel kin wok obosolar-e: ”An neid-nen Yewura nggweyak pem-nen wok kuburuk lobok yidnak Yawuri nap Ndaniel-e kar-a?

¹⁴ An-nen kolosolar-e, kar-e marak mbal pem nagawan ereba na indi-nen kobong tak kibidnak me, kar-e kindi tenggerak, kwara yebet kaso, mondok kindi nggat nggat kwiye worak nab-o luk yogola kuligi-o.

¹⁵ ’Iri nggal kwat ma-o’ luk urul pugwi nap min inndi tenggerak enaru nap min-nen engga mbaridnak yu wonatluk, ebe-ge iri nggal-o luk para yak nuruwakluk inpil lobok yukmu, it-nen wal kaiga-t nde, meya yij-o.

¹⁶ Nde, yanem an-nen kolosolar-e, kar-e wene mondok kura wene-t nde, pugara nam tak posolat, wene mondok nil kil tag-et nde, konosolat kwaroso-nen yusu-o yogola kuligi-o. Kat-nen nde engga yu wonatluk, ebe-ge iri nggal-o luk para nde yak norosola-ge, nagawan-nen yurugwi sum lorok sum ungu min emas-nen konidnak engen nggal yurugwi min kek tak kobosolat yirik kibimin-o. Nde, erep kwat kobosolar-e, an-nen tenagidnak wi yu arem o tena wolmakluk, nit mberen nentalu mendak kibimin-o” luk yak tij-o.

¹⁷ Yosoloma, Ndaniel-nen onggo yosolar-e: ”Nab-o. We wok undugwi mende ereba-ge an wok nururag-e lag-o. Ereba-ge ap erep nde wok indi-o. Nde, engga mbarak iri-ge an-nen wonatluk, ebe-ge iri nggal-o luk para yak kirimin-o.

¹⁸ Mbal Pem Nagawan Mondok Kek tak iri na-net kat keid Nebukatnesat iri na kwarak obosolar-e, mondok nagawan kek tak uburuk, anggu obok worak tak ebamu-o.

¹⁹ Iri rak ebamu-ge ap enlem oboksa min ap enne lombok oboksa min at aye-nen lele yogolat woraiga-o. Nde, at-nen nde ap misik nde wururak perasolar-e, ap iri na-ge mondog-et woroso-o. Nde, at-nen ap misik imiri yurak perasolar-e, mondok imiri yoso-o. Nde, at-nen ap kek tak onposolat na, teberak onposolat na, at indi-n pidnak pem nak kwaroso-o.

²⁰ Alat nde, Nagawan Nebukatnesat iri na indi kek yosolat, wene koloso buk kwat yosolat, isilepma worak erengen lamburak nak kwaroso yosolat, kwarosola-ge, at-nen nagawan woraso iri na-ge lak tak ibij-o. Iri yosola-ge, at-nen nggok kek tak woraso iri na-ge lak yij-o.

²¹ At iri-ge ki nap ennggendumu-nen sera wirik pamu, at indi-ge wam indi nggal kwat yij-o. Iri kwatlug-e, kelerai wam erengen kege ereba na min lambuksa woralat, sapi-nen kwaroso nggal tusuangge tarosolat, mbepme ereba-t nene yosolat, lilangen-nen piri rak posolat woragij-o. Alat nde, abok nggwe-ge at-nen yosolar-e: ’Mbal Pem Nagawan Mondok Kek tak iri-ge ki nap-nen tenagidnak wi iri-ge at inggem-net yusu-o. Nde ki nap-nen tenagidnak wi iri-ge at-nen lenak pidnak nap inggem poso-nen yusu-o’ luk para yij-o.

²² Alat nde, at ambara kar-e iri kwaridnak wene-ge karu-net nde, kar-e kindi tebe yusu bug-o.

²³ Nde, nap kar-e kindi kek tak posolat, Nagawan Indo aid arem woraso iri na tebe rak posolar-e, kar-e kwiye lag-et Nagawan Indo ama woraso waruk lobok yidnak embe ereba na waruk nggumer-o yosoluk, kat min kat-nen idnak ap yok nggok min kogwerak min ndegel kubugwi kweyap kat-nen inmin woraso ereba min kit-nen embe ereba na bem-nen kenangga ninggeb-o. Iri kwarosolar-e, kar-e emas min perak min tembaga min mbesi min e min kerep min pem-nen konidnak kugwiwak, erengen-nen na kaso buk, eyanggo-nen na wene koloso buk, indi-nen na yebet kaso buk ereba na erembel wanigen-o. Iri yosolar-e, nap kat kuruk wolmomtak min wat momtak min kat-nen wolmomtak tula min imineb-e at inggem nak worasu Mbal Pem Nagawan iri na-ge kar-e kek tak pigit lak yigen-o.

²⁴ Iri kwarosola karuk-nen at-nen yidnak wene yu mbaruwakluk-nen ininggi iri-ge Mbal Pem Nagawan-nen pil lobok yamu-o.

²⁵ Engga mbarak iri-ge yu nggal yaga mbarag-o: MENE MENE TEKEL UPARASIN iri-nen yosolar-e ’Wonasa, wonasa buruk, angin ndak worak puruk, timbirij-o’.

²⁶ Nde, iri-ge ebe-ge yu nggal-o: ’Wonasa buruk’ yid iri-ge nap kat-nen nagawan woralat o tena worasu-ge Mbal Pem Nagawan-nen wonararik, lak tak pusu-o.

²⁷ ’Angin ndak worak puruk’ yid iri-ge nagawan kar-e ndak wat kebarik, kangin-e ndak ndag-e lak nde kagaij-o.

²⁸ Nde, ’timbirij-o’ yid iri-ge, kat-nen tenagidnak wi-ge tembesa Meria nap min Perisia nap min wok undusu-o yosolat-nen yij-o” luk yak tij-o.

²⁹ Yosoloma, ereya na-net Mbelsiasat-nen at-nen idnak eyabu wanugwi nap ereba na yak ondosolar-e: ”Nagawan-nen yurugwi sum lorok sum ungu Ndaniel yirik pogolat, nagawan-nen yurugwi emas-nen konidnak engen nggal yurugwi umukmu yirik per-o” yij-o. Iri yamu-ge Ndaniel iri na-ge it mberen entalu at-nen tenagidnak wi iri na arem o tena wolmakluk, mendak ibij-o.

³⁰ Nde, iri na tarem-et kubu-ge Mbabilonia Nagawan Mbelsiasat iri na-ge wiriga-o.