NDANIEL 4 - Nanduk Ngget Tul Pidnak Wene

Nebukatnesat-nen mberen pem tak posolat nabi misik kagaid wene 4:1-18

¹ Yi nap ndi nap oboksa ap enne lombok min enlem lombok min yi wi ndi wi woragwi enmanggim Nebukatnesat-nen oboksa enaru rak pid wene-ge yu-o ”Naptak, wiwa-o!

² Nde, an-e Mbal Pem Nagawan Mondok Kek tak, amawi worak iri na-nen kwiye worak kagwi buk mende an kwat nibid wene ndindel kindimin-o.

³ Mbal Pem Nagawan-nen kagwi buk mende kwaroso-ge mondok ija lombog-o! At-nen wi yurak mende kwaroso-ge wir-o! Mbal Pem Nagawan iri-ge nagawan irit men marik, pem irit woralik nalik irit wolma-o. Pempa woragolar-e, o tena wolmomtak amawi-ge at inggem nak irit wolma-o.

⁴ An-e an woraso sa nama woralat, kona nalen pem-et woralat, ukwe mende bem-e konak numud lak irit woragi-o.

⁵ Alat nde, misik tarem-e an-e nene yosoma, kubu-ge nabi misik karug-e, wendet yosolar-e, nabi iri na bem nak nindi marok tenak worasolar-e, yamuksa woragit lag-o.

⁶ Iri yosolar-e, Mbabel yu me woragwi enaru nap ereba na nabi kagi iri na ebe-ge iri nggal-o luk para yak nuruwaklug-e, wene mbo inpigi-o.

⁷ Alat nde, ’Iri nggal kwat ma-o’ yugwi nap min yi iminep ndi iminep enaru nap min kwiye worak kwarugwi nap min wonaru enaru nap min lobok yogola, an-nen-e an-nen nabi kagi iri na inmbiri bem yigi-t nde, it-nen-e ap misiger-o luk mbi-nen nabi kagi iri na-ge iri nggal-o luk para yak nururag-e meya yij-o.

⁸ Alat nde, abok nggwe-ge Ndaniel an nugugwiwak unu nggal Ndaniel unu misig-e Mbelsasat iri lobok yij-o. Nde, marak mbal pem nagawan ereba na arem kobong yidnak nap iri na imbiri bem-e nabi iri na ndindirigi-o. Ndindorosolat-nen yosolar-e,

⁹ Mbelsasat wa-e. Yi mende ndi mende enaru nap enanggul pem kek tak kar-e an-e naru-o. Kar-e marak mbal pem nagawan ereba na indi-nen yebet tak kibidnak-nen yusu-o. Iri bem-e kat kambigir-e kura wene misik kura wolmomtag-e meya-o. Iri ala-ge, an-nen nabi kagi yu kuluruk, nabi ebe-ge iri nggal-o luk nam para yak niri-o.

¹⁰ Nde, kubu an nene yosoma-ge, e misig-e o nggweyak yu enggendumu-nen yagidnak kagi-o.

¹¹ Nde, e iri ebe-ge mondok mot, nggok amawi worak irit yak yosolar-e, anggub-e mbal kundugu bidnak me, yi wi ndi wi-nen nam yik kagolat irit woraiga-o.

¹² Nde, e iri na-ge angga na miri irit mborosolar-e, engen na kwarat iri yij-o. Nde, engen-e yi wi ndi wi woragwi oboksa-nen norak ndak irit yij-o. Lok lok noso urugup worak erengen kege-ge e iri na indipma mbiringgik worasolat, nde, towe-ge inggi angga bem uwi worosolat, nde, urugup worak oboksa-ge engen ereba na nasolat irit kwarij-o.

¹³ Nde, an-e an-nen nabi kagi iri na nabi bem-net ngge kagi-o luk nindi yebet kerenak worasoma-ge, aid nap misig-e mondok lid lud tak puruk, erengen limbinil aid arem-nen mbuwasola kagi-o.

¹⁴ At iri na-nen ene nggoksa yosolar-e: ’E iri-ge mondok ndara keya buruk, inggi angga yigisa ligik puruk, angga lerasa ngguru rak purag-o. Nde, engen-e nggilara liring kudtag-o. Lok lok noso mende e iri indipma mbinggirik worasu ereba min towe inggi bem uwi werep mberep worasu ereba min-e langgara wirik purag-o.

¹⁵ Alat nde, undugul nak keya buruk, mbesi min tembaga min-nen konidnak posid kere bem-et kamasa tusundumu keya burag-o. Keya bosoma, lilangen-nen piri rak posolat, wam erep ereba imin-et tusuangge tarosolat wolmag-o.

¹⁶ Nde, olengen tuju iri woralar-e, ap inndi iri na-ge nden kaga wam indi nde kwat luk wolmag-o.

¹⁷ Nde, nit aid nap lid lud tak puruk, nenlengen lumbunugwi iri na-nen mbaridnak wene-ge yur-o. Nde, nit ninndi-nen pige-ge ap oboksa-nen enaru yogolar-e, Mbal Pem Nagawan Mondok Kek tak iri-ge nagawan-nen tenagidnak wi-ge at tena woralat, at-nen tenaga woraso wi iri-ge at-nen nagawan lenak puruk ininggem posolat, ap mondok teberag-et nde, inggem posolat na ndak-net yusu-o” luk aid nap-nen yij-o.

¹⁸ Mbelsasat wa-e. An-nen nabi kagi-ge irir-o. Nde, yawo-ge nabi iri kagi ebe-ge iri nggal kaigen-o luk para yak niri-o. Nde, ap mondok enaru inndi tenggerak an-nen tenagidnak wi yu me worali yeba mbi-nen iri nggal-o luk para yak nururak meya-o. Alat nde, marak mbal pem nagawan ereba na indi-ge kat karem kobong tak me, kat-nen-e para yak nururag-e ndag-o” luk yak tij-o.

Ndaniel-nen nabi iri na ebe-ge iri nggal-o luk para yak tidnak wene 4:19-33

¹⁹ Ndaniel, unu misig-e Mbelsasat, iri na-nen wene iri na kulurug-e, wendet lug-e, kwiye-nen ene lak siyak woragij-o. Iri yosola, Nagawan Nebukatnesat-nen Ndaniel yak tosolar-e: ”Kar-e nabi iri min nabi ebe iri min pem-e kar-e kwiye kudtag pug-o” luk yak tij-o. Yosoloma, Mbelsasat-nen onggo yosolar-e: ”Nab-o. Nabi kaigen iri ebe kwat momtak mende ereba-ge kat kuwim nap enpem nggal mbosola, kat kebem mbigit lak yurak-nen-e ob-er-o.

²⁰ Nap kat-nen kaigen e iri-ge mondok mot-nen anggub-e mbal kundugu me, yi wi ndi wi-nen nam irit kaiga-o.

²¹ Angga na mondok miri, engen na mondok kwarat me, yi wi ndi wi woragwi nap oboksa-nen norag-e ndak irit woragij-o. Nde, e iri indipma-ge lok lok noso mende erengen kege-ge mbinggirik worasolat, nde, towe-ge inggi angga bem uwi werep mberep woragij-o.

²² Nab-o. Kar-e e mot-nen amawi worak iri-net yusu-o. Kat kunu kek tak worasu iri kobog-e mbal woragusu-o. Kat-nen tenagidnak wi-ge yi wi ndi wi oboksa kinggiyapma worasu-o.

²³ Nde, nap kat-nen yik kaigen nggal, aid nap misik aid arem-nen mbuwasolat-nen yosolar-e: ’E iri-ge ndara mondok lak tak puruk, undugul nak keya ber-o. Nde, undugul iri na-ge mbesi min tembaga min-nen konidnak posid kere bem-et kamasa tusundumu ereba me keya ber-o. Iri rak pugupmu, lilangen ebem mbosolat, wam min lambuksa woralat olengen tuju wolmag-o’ luk yij-o.

²⁴ Nab-o. Nabi kaigen iri-ge ebe-ge yu-o. Nap kat kwat kuburak wene-ge Mbal Pem Nagawan Mondok Kek tak iri na-nen-e yu nggal mbarij-o.

²⁵ Nap kar-e ap ennggendumu-nen langgara wirik kubuwama, wam min lambuksa tusundumu ereba olengen tuju irit woragun-o. Nde, olengen tuju iri woralar-e, sapi nggal tusuangge tarosolat, we mbepme ereba-t nene yosolat woragun-o. Worala-ge, lilangen-nen piri rak kubuwa-o. Woraruk ombol nggwe-nen perak nap kat-nen perasolar-e: ’Mbal Pem Nagawan Mondok Kek tak iri na-ge nggweyakma yu-nen tenagidnak wi iri-ge Mbal Pem Nagawan inggem-et woralat, ta-nen nde at-nen lenak pidnak nab-e nggweyakma yu me-nen tenagidnak wi-ge inggem purak iri na ndak-net yusu-o’ luk peragun-o.

²⁶ Nde, aid nap-nen yegolar-e: ’E undugul iri nak keya ber-o’ luk yiga iri-ge nap kat-nen para yosolar-e: ’Yi wi ndi wi oboksa Mbal Pem Nagawan inggem-et worasu-o’ luk para yosola, tuguruk kar-e nagawan yugun-o.

²⁷ Iri bem-e an-nen nggomo kurusu yu ndak ndag-et kwari-o. Kar-e tuguruk meya kwarurak pug-o. Alat nde, konak mot mot nak kwarosolat wolmomtak na-e. Ap insilobulo lak nap enabuwa kasolat wolmin-o. Iri nggal kwarosola-ge, nap kar-e konak kalen pem-et woragun-o” luk yak tij-o.

²⁸ Nde, ereba oboksa-ge Nagawan Nebukatnesat ebem nag-et kwat yij-o.

²⁹ Nde, waneya duabelas woraruk, misik tarem-e Mbabel iri me at woraso sa uwi anggul pem lagarik, waring kasolat

³⁰ at-nen yosolar-e: ”Yik ker-o. Mbabel siri yu-ge mondok wir-o! An namawi min numbunu min an nggok kek tak woraso min iri na yenggerak kudtag-e an-nen tenagidnak wi arem o siri nggok yu wirigi yur-o!” luk yij-o.

³¹ At-nen wene iri na-ge awo nggaruk tak pigit lak ma, mbal pem-nen ene misik kulij-o. Ene iri na-nen yosolar-e: ”Nagawan Nebukatnesat wa-e. Wene yu kwara kuli-o! Nagawan kat-nen tenagidnak wi-ge kat kinggem-nen wanusu-o.

³² Kar-e ap ennggendumu-nen sera wirik kubuwama, wam min lambuksa tusundumu woralar-e, sapi nggal tusuangge tarosolar-e, olengen tuju irit woragun-o. Irit worasoma, kat-nen parosolar-e: ’Mbal Pem Nagawan Mondok Kek tak iri-ge nggweyakma nap-nen tenagidnak wi-ge at inggem-et woralat, nggweyakma nap-nen tenagidnak wi iri na at-nen-e at indi-nen peraruk lenak pidnak nap wok turak iri-ge ndak nag-o’ luk para yugun-o” luk yij-o.

³³ Nde, iri na tarem-e wene iri na ebe kwat yosolar-e, Nebukatnesat na-ge ap ennggendumu-nen sera wirik pikma, sapi nggal tusuangge tarosolat woragij-o. Lilangen-nen piri rak obosolat, anggulsu na saro usu nggal mot irit langgu yosolat, inggi abis-e saro ijok abis nggal nggogorosolat irit kwarij-o.

Nebukatnesat-nen Mbal Pem Nagawan erembel wanidnak wene 4:34-37

³⁴ Nde, nagawan an-nen yosolar-e: ”Olengen tuju iri na worarug-e, an nerengen-e mbal lik kasola-ge, ap nindi kwat yij-o. Iri yosola-ge, Mbal Pem Nagawan Mondok Kek tak iri na kek tak obosolat, at pem-et woralik nalik woraso iri na erembel wanosolat kek tak pigi-o. Iri yosolar-e: Mbal Pem Nagawan-e pem irit nagawan wolma-o. At-nen tenagidnak wi-ge pem irit wolma-o.

³⁵ Nggweyakma yu me worali nap oboksa-ge ebe lak mende-nen yusu-o. Aid nap aid arem worali min ki nap nggweyakma yu me worali min-e Mbal Pem Nagawan inggem nak worali-o. Ap misiger-o luk mbi-nen Mbal Pem Nagawan indi-nen pidnak lugud tak purak iri-ge meya-nen yusu-o. Ap-nen ’Kar-e no kwarusu-o?’ luk, kwiye lag-et at yak turag-e meya-o.

³⁶ Nde, an-e tuguruk ap nindi kwat yosolat, an-nen nggok woraso min kek tak woraso min an-nen tenagidnak wi anggu obok mboroso min ereba na-ge tuguruk ninggem pij-o. Iri yosola, an-nen idnak ap yok nggok min yabu winde ereba na min-nen-e enalen min-et wok nobogola, an-nen nanduk nggok kek tak woraso-ge mariger-et nde, abok nggwe-ge terak mena nanggu obok worak tak nibij-o.

³⁷ Iri yamu, yawo Nebukatnesat an-e aid arem woraso Nagawan iri na nak erembel wanosolat, kek tak obosolat, nggok tak obosolat kwarusu-o. At-nen kwaroso-ge ndemeret mot mot lud tak nak kwaroso-nen yusu-o. Nde, ar-e ap indi kek tak pugwi nap indi teberak purag-e ndak-net yusu-o” luk yigi-o.