NDANIEL 3 - Nanduk Ngget Tul Pidnak Wene

Nebukatnesat-nen at-nen tenagidnak wi woragwi nap oboksa-nen emas pem-nen ap ndak wirid iri na erembel wanuwakluk wene wirik pidnak wene 3:1-7

¹ Nde, misik tarem-e Nagawan Nebukatnesat-nen-e emas pem ap nggal misik ndak wirid iri-ge mor-e dua pulu tuju (27) meter, nde, abak nggwe-ge tiga meter irit ndak wirij-o. Iri na-ge ngguberenot-nen tenagidnak wi Mbabilonia iri me Ndura mbirikmu iri me-t ndak wosa bij-o.

² Ndak worak purug-e, nagawan-nen-e at-nen tenagidnak wi woragwi nap enne kulugwi ereba na ndok wuruwakluk yonggo inpij-o. Yonggo inpij-e ngguberenot ereba min mbupati min nagawan-nen tenagidnak wi woragwi nap nggomo undugwi nap min nagawan-nen tenagidnak wi iri me amanggim idnak tol tena woragwi nap min ap enpem wene konugwi nap min kwarurak mururak enaru nap min o lombok-nen enne kulugwi nap oboksa-nen ap ndak wirid iri na erembel wanurak pem erembel wanugwi tel korogolat tu kuwarurak ndok wiriga-o.

³ Nde, ap ereba na oboksa lobok yigarig-e, ap ndak worak iri na eram ndok wutluk, mendak woragola-ge,

⁴ nagawan-nen yidnak wene lomboksa yoso nap-nen ene nggoksa yosolar-e: ”Nanggamirak kenlem lombok min kenne lombok oboksa min wa-e! Nagawan-nen yidnak wene yu kwara koler-o:

⁵ Nde, ndawi yogolat-nen ene rak pugwi mende ene rak pogola, kologolat ereya na-net Nebukatnesat-nen ndak wirid iri na erembel wanogolat yud tud mbugup na-e.

⁶ Ta-nen nde erembel wanogolat, erare nggwe tud yigit lak yosola-ge, iri-ge kan nggok mabidnak amare arem mondok mbo bil nggurag-o” luk yij-o.

⁷ Iri yamu, ndawi yogolat-nen ene rak pugwi mende ereba na ene rak pogola, kologolat ereya na-net ap enlem lombok min enne lombok min oboksa-nen Nagawan Nebukatnesat-nen emas pem-nen ndak wiridnak iri na erembel wanogolat, yud tud mbiga-o.

”Ndaniel anggamirak kenan nagawan ene tatli-o” luk onpok pidnak wene 3:8-18

⁸ Nde, iri tarem-e Mbabel nap erep-nen-e nanongga Yawuri nap enare puwokluk tu kore yiga-o.

⁹ Iri yogolat-nen it-nen Nagawan Nebukatnesat yak togolar-e: ”Nit-nen idnak nagawan kar-e pem irit kurug-et woralik nalik irit wolmin-o!

¹⁰ Nde, nagawan kat-nen wene wirik posolar-e, ndawi yogolat-nen ene rak pugwi mende ereba nde ene rak pogola, kologolat ereya na-net ap oboksa-nen tud yogolat, emas pem-nen ndak wosa pidnak iri erembel wanurag-o.

¹¹ Nde, ta-nen nde tud luk, erembel wanigit lak ala-ge, kan nggok mabidnak amare arem mondok mbo bil nggurag-o luk wene wirik pigen na-t nde,

¹² it Yawuri nap erep ereya-ge kat-nen Mbabilonia nggweyak yu tena wolmomtak yabu enpem pigen-et nde, it iri-ge nagawan kat-nen yidnak wene-ge te rak pili-o. Iri kwatli nab-e Sanderak min Mesak min Abetnego min it irir-o. Nde, it ereya-ge kat kugugwiwak erembel wanigit lak yogolat, kat-nen ndak wirigen emas-nen konidnak iri na min-et indipma yud tud mbili bug-o” luk yak tiga-o.

¹³ Yak togolikma, nagawan iri na-nen wene iri na kulurug-e, mondok isilepma kwarat yosolar-e: ”Ap kenan ereya-ge an neram wok unpuruk lobok yurag-o” luk wene wirik pij-o.

¹⁴ Iri yamu, wok unpuruk lobok yikma, Nagawan Nebukatnesat-nen kin wok onposolar-e: ”Kit Sanderak min Mesak min Abetnego min yu-ge wa-e. Kir-e mondok ndemeret an nugugwiwak erembel wanigit lak yogolat, iri-nen emas pem an-nen ndak wirigi iri na indipma tud yigit lak yogolat kwarugwi-a?

¹⁵ Iri ala-ge, yawo-ge ndawi yogolat ene rak pugwi mende ene rak pogola, kuluruk ereya na-net kir-e emas-nen ndak wirigi iri na indipma yud tud mber-o. Kit nde iri kwarigit lak yogola-ge, mondok kan nggok mabidnak amare arem mbo kinpil nggurag-o. Iri kwat konposola-ge, no kugwiwak nggal-nen an ninggem-nen-e kinmiri yuwa-o?” luk yak indij-o.

¹⁶ Yosoloma, Sanderak min Mesak min Abetnego min-nen onggo yogolar-e: ”Nagawan mondok kek tak wa-e. Nit-nen onggo yak kururag-e lag-o.

¹⁷ Kan nggok mabidnak amare iri arem-nen na irit, kat kinggiyapma-nen na irit, nit-nen erembel wanugwi Nenmbal Pem Nagawan iri-nen nde ninmiri yek nde yosolar-e, ndemeret ninmiri-t yuwa-o.

¹⁸ Alat nde, ninmiri yigit lak yuwa-nen na irit, mondok nagawan kar-e karu wolmin-o. Nir-e kat kugugwiwak iri na erembel wanul pug-er-o. Kat-nen emas pem ndak wirigen iri na indipma tebel yul pug-er-o” luk yiga-o.

Sanderak min Mesak min Abetnego min ereya na kan nggok mabidnak amare arem mbo inpil nggwidnak wene 3:19-25

¹⁹ Iri yogola karug-e, Nagawan Nebukatnesat iri na-ge isilepma-ge mondok kwiye worak Sanderak min Mesak min Abetnego min enpem posolar-e, erare-ge mep nak worok luk keya bij-o. Iri luk, at-nen wene wirik posolar-e: ”Kan-e mabugwi ereba na nggal-e keya buruk, mondok terak mena tuju bem-et embem tak pogolat maburag-o” luk yij-o.

²⁰ Iri yosoluk yarig-e, at-nen-e at-nen idnak san ombo mondok enmawi worak ereba na yak ondosolar-e: ”Sanderak min Mesak min Abetnego min kamasa mondok kan nggok mabidnak amare yirip wirip mbusu iri na arem mbo inpil nggwer-o” luk yak indij-o.

²¹ Yosoloma, ap kenan ereya na-ge unsum yiriga min enpare sum min lorok sum min ontopi min unsum erep min-e iniksa irit kundugu kamasa yigarik, kan nggok mabidnak amare yirip wirip mbusu iri na arem mbo inpil nggwiga-o.

²² Nde, nagawan iri na-nen-e wene-ge mondok amawi min watsa wirik pidnak me, kan nggok mabiga iri na-ge mondok yong yosolat embem kwarat me, Sanderak min Mesak min Abetnego min kudsa mbo inpil nggwiga nap ereba na-ge kan amare-nen yonggara worak inpij-o.

²³ Iri nggal kwasa ap kenan kere logoksa kamarak inpiga ereya na-ge kamarak kundugu kan mare yirip wirip mbusu iri na arem mbo inpil mbiga-o.

²⁴ Mimo Nagawan Nebukatnesat wendet yosolar-e, ndag-et nak men yosolat-nen at eyabu wanugwi nap ereba na yak ondosolar-e: ”Yanem nir-e ap enpe-ge kenan-et kamasa kanduk arem inpil nggwige-a?” luk yij-o. Yosoloma, it-nen yogolar-e: ”Nagawan wa-e. Ndemeret mbo inpil nggwige-o” luk yiga-o.

²⁵ Yogoloma, nagawan iri na-nen yosolar-e: ”Alat nde, noluk-nen ap enpe-ge empat nde kanduk arem waring kagola, eneyasu-o? Ir-e kamarak lak, wisirik enpem ambut lak nde waring kali-o. Nde, kenan ereya ennggendumu misik iri abage-ge erembel wanugwi nggal irit kagi-o” luk yij-o.

Ap kenan ereya na kesera keya unpuruk, kek tak inpidnak wene 3:26-30

²⁶ Iri luk, Nebukatnesat iri na kan nasu iri na tumende bem wok yosolat-nen ene nggoksa yosolar-e: ”Sanderak min Mesak min Abetnego min kit Mbal Pem Nagawan Mondok Kek tak iri na ndegel ubugwi nap wa-e. Kanduk iri arem-nen kesera lobok yer-o!” yosoloma, it ereya na-ge kanduk iri na arem-nen lobok yiga-o.

²⁷ Iri yogola-ge, nagawan iri na indipma nap ngguberenot min mbupati min ap yabu ombo yok nggok erep min-et oboksa it kenan ereya na endam lop lop indigarik-nen lombot inpiganggal-e, kanduk-nen mbi mondok mariget tet tirok tak inpigit lak irit eneyaiga-o. Enanggulsa na mondok mariget tet kan ninggit lak, unsum abage tet siyag-et mbi nin yigit lak, kule emben na it enpem-e mondok lak irit eneyaiga-o.

²⁸ Iri ala karuk, nagawan-nen yosolar-e: ”Sanderak min Mesak min Abetnego min-nen erembel wanugwi Mbal Pem Nagawan iri nak erembel wanurag-o. At iri-net at ebem inndi angin tubu yidnak, at ndegel ubugwi nap ereya-ge inmiri yuwakluk at-nen idnak aid nap inpil lobok yamu, inmiri yij-o. It iri-ge an nene tara keya buruk, wat yurak irit indingen tak puruk, kugwiwak nin nan ereba na-ge endam tud luk, erembel wanurak larok yogolar-e, it ondomok Enmbal Pem Nagawan iri nag-et erembel wanugwi-o.

²⁹ Iri bem-e, ap enlem lombok min enne lombok min oboksa-nen Sanderak min Mesak min Abetnego min Enmbal Pem Nagawan iri na nde nggweyel puwa nab-e, mondok mbarep parep keya unpuruk, unuwi min mijara keya bosoma, tudsa owak nak nggururak wolma-o. Kugwiwak misik mbi-nen Mbal Pem Nagawan-nen inmiri yid iri nggal-e mondok inmiri yoso buk-nen yusu-o” luk yij-o.

³⁰ Iri yosoluk yarig-e, nagawan iri-nen-e Sanderak min Mesak min Abetnego min ereya na-ge mondok kek tak irit onposolar-e, Mbabel wi iri me-nen yabu tena woragwi nap kek tak irit mendak inpij-o.