NDANIEL 2 - Nanduk Ngget Tul Pidnak Wene

Nebukatnesat-nen nabi kagaid wene 2:1-13

¹ Nde, Nebukatnesat iri na nagawan menluk olengen mberen worasoma-ge, ar-e kabu nabi kagaij-o. Karug-e, ”Nabi iri-ge ngge kagi-o?” luk indi mbel tenak woralar-e, mondok nene yigit lak, uruk nak irit woragij-o.

² Worasolar-e, at-nen-e ”Iri nggal kwat ma-o” luk para yugwi nap min kwiye worak kwarugwi nap min ap yari min yi iminep ndi iminep enaru nap min ereba na-ge at-nen nabi kagaid iri na ebe para yak tuwakluk yonggo inpij-o. Yonggo enpamu, lobok yigarik, nagawan eram mendak woragola,

³ nagawan-nen yosolar-e: ”An-e nabi mbi kagirik, ’Nabi iri-ge ngge kagi-o?’ luk yamuksa woragwi lak, nindi nak mbel tenak worasu-o. Iri ala, ebe-ge iri nggal-o luk yak nururag-o” luk yij-o.

⁴ Yosoloma, it-nen onggo Aram wene bem yogolar-e: ”Nagawan kar-e pem irit kurug-et wolmin-o! Kat-nen nabi kaigen iri ndindera yak nindi-o. Iri yosola-ge, nabi iri ebe-ge iri nggal-o luk para yak kurul-o” luk yak tiga-o.

⁵ Yak togolikma-ge, nagawan iri na-nen yosolar-e: ”Kit nak-net nabi kagi iri yak nutluk, nabi ebe na iri nggal-o luk yak nururak nak wat tak pigirik worasu-o. Kit-nen nde iri nggal yurak meya ala-ge, kir-e mbarep parep mbo konposolat, kunuwi min mondok mijara keya kinpimin-o.

⁶ Alat nde, kit-nen nde nabi kagi iri mbena yak nutluk, nabi ebe-ge iri nggal-o luk yak norogola-ge, onggo-ge konak mende nak wok kondosolat, mondok kek tak kinpimin-o. Iri ala-ge, yawo-ge an-nen nabi kagi iri na yuruk, ebe-ge iri nggal-o luk para yak nerer-o” luk yak indij-o.

⁷ Yosoloma, it-nen tuguruk yak togolar-e: ”Nab-o. Nagawan kat nanduk-nen nabi kaigen iri yak nondosola karuk-nen nabi iri-ge ebe-ge iri nggal-o luk ebe para yak kurul-o” luk yak tiga-o.

^8-9 Iri yogola kuluruk, nagawan iri na-nen yosolar-e: ”Kit-nen kwatli iri an-nen yebet keneyasu ndak ndag-et kwatli-o. An-nen nabi kagi iri na kit-nen yak nirigit lak ala karuk, an-nen kit oboksa kenpem angin worak mende mberak posolar-e, misiget erep ndak ndak nak kenpem mberak purak ala karuk, kenpe-net kunduwa naru tu kore yogolat lit kuruk mot tak pil mbitli-o. Kir-e an-nen kwarurak yemnak pigi iri na lak tak puwokluk, wene mbarak puruk, kennesiget nemberam lagolat an nimin keyari keyari rak pili-o. Iri ala-ge, ndag-et nak kir-e an-nen nabi kagi ebe-ge iri nggal-o luk para-t yuwa-o luk pereyek-nen kit-nen nabi kagi iri-na yak nerer-o” luk yak indij-o.

¹⁰ Yak ondosoloma, it yi elem ndi elem enaru nap ereba na-nen yogolar-e: ”Yi wi ndi wi woragwi nap ennggendumu ap mbi-nen nagawan kat kindi-nen pusu iri-ge yak kururak na meyar-o. Iri-nen nagawan mondok kwiye worak kek tak misik-nen mbi ’Iri nggal kwat ma-o’ yugwi nap min kwiye worak kwarugwi enaru nap min yi iminep ndi iminep enaru nap min at woraso sa woragwi nap ereba na-nen para yuwakluk kat-nen yusu yu nggal na enpem pugwi bug-er-o.

¹¹ Nde, nap nagawan kat-nen yak nerer-o yusu yu-ge mondok angin worak nggesa nggal irit yosola me, ap misiger-o luk mbi-nen nagawan kat yak kururag-e meya-t yusu-o. Alat nde, nit-nen erembel wanugwi nenmbal pem nagawan-nen nak perak para yurag-e ndak-nen yusu-o. Alat nde, nit-nen erembel wanugwi ereba-ge nit ap nennggendumu-ge worali bug-o” luk yak tiga-o.

¹² Wene iri na yogola kulurug-e, nagawan iri na-ge isilepma kwarat luk, ”Ap inndi tenggerak mondok enaru nap Mbabel woragwi nap ereba na-ge mondok oboksa undurag-o” luk wene wirik pij-o.

¹³ Nde, nagawan-nen wene wirik pid iri na naru karu mborosolar-e, ap inndi tenggerak enaru nap ereba na oboksa min Ndaniel min at anggamirak kenan ereya na inmin-et unduwokluk onkore yiga-o.

Nebukatnesat-nen nabi kagaid iri na min nabi ebe-ge iri nggal-o luk Mbal Pem Nagawan-nen para Ndaniel mirik pidnak wene 2:14-23

¹⁴ Nde, Ndaniel iri na-ge san ombo nagawan yik karok woragwi nap ereba na enanggul pem nagawan Ariok-nen it undurak lid lud tak puruk worasoma, eram wok yosolat, kwiye min-et

¹⁵ Ndaniel-nen kin wok obosolar-e: ”Noluk-nen nagawan-e wene mondok angin worak iri-ge wirik pij-o?” yosoloma, Ariok-nen-e wene iri na-ge Ndaniel yak tij-o.

¹⁶ Yak tosoloma-ge, Ndaniel iri na-ge ndag-et nak nagawan eram wok yosolar-e: ”Nab-o, kat-nen nabi kaigen iri-ge an-nen iri nggal-o luk para yak kururak tarem ondoro siyak motsa wok niri-o” luk yak tij-o.

¹⁷ Yak tosoloma-ge, ”Ob-o” yosoloma-ge, Ndaniel iri na-ge ma mberarik, Anania min Misael min Asaria min ereya na-ge wene ereba na yak indij-o.

¹⁸ Yak undurug-e, Mbal Pem Nagawan-nen it enabuwa kasolat, nabi kaidnak iri ebe-ge iri nggal-o luk yigit lak iri na nam tak paga yak unduwaklug-e, ”Aid arem woraso Mbal Pem Nagawan eram tepan yurag-o” luk yak indij-o. Iri nggal kwariga iri-ge it ereya na min Mbabel iri me enaru yidnak inndi tenggerak ereba na inmin lambuksa indigit lak makluk-nen kwariga-o.

¹⁹ Nde, iri na tarem-et kubu-ge Mbal Pem Nagawan-nen nabi nggal pem nabi iri na-ge para Ndaniel mirik ibij-o. Iri yosola-ge, Ndaniel-nen-e Mbal Pem Nagawan aid arem woraso iri na erembel wanosolat-nen yosolar-e:

²⁰ ”Mbal Pem Nagawan iri-ge indi tenggerak, amawi worak-nen yusu-o! Pem irit woragolat nagolat at nak irit erembel wanogolat wolmomtag-o.

²¹ Nanduk-nen kwaridnak min abok-nen kwat ma min iri-ge Nagawan Indo inggem nag-o. At nak-nen nagawan-e mendak onposolat, lak tak onposolat kwaroso-nen yusu-o. At nak-nen inndi nggat nggat elem wok ondosolat, yebet kagwi mende wok ondosolat yoso-nen yusu-o.

²² At nak-nen wene kura mondok arem-et nde, pugara nam tak posolat, kubu nggwe-nen kwaridnak na ar-e aru-nen yusu-o. At iri-ge yaya iri na abinal-nen muruk tak worasu-o.

²³ Nomborak Enmbal Pem Nagawan wa-e. Kar-e an-nen kerembel wanosolat, kek tak kobosolat yusu-o. Kat-nen nindi nggat nggat min namawi min wok nirigen-o. Kat-nen nit tepan yige-ge nenne erep nggarosolar-e, wene onggo nagawan yak turag-e kat-nen mirik ninpigen-o” luk erembel wanij-o.

Ndaniel-nen nabi iri na yak turuk, ebe-ge iri nggal-o luk para yak tidnak wene 2:24-45

²⁴ Iri lug-e, Ndaniel iri na nagawan-nen Mbabel iri me woragwi inndi tenggerak enaru nap undurak lenak pid nap Ariok iri na eram mberarik-nen yak tosolar-e: ”Ap inndi tenggerak enaru nap ereba-ge undurak pug-o. Nagawan iri-nen nabi kagaij-e iri nggal-o luk an-nen para nagawan yak teyek-nen nagawan eram nibil mbiri-o” luk yak tij-o.

²⁵ Yosoloma, Ariok-nen Ndaniel iri na-ge ndag-et nak Nagawan Nebukatnesat eram waruk mberarik, Ariok-nen yosolar-e: ”Ndegel koboso nap an-e mbo inpil lobok yidnak nap Yawuri nap ereba na ennggendumu ap mbi-nen kat-nen nabi kaigen iri na-ge iri nggal-o luk para yak kururak nap misik kagi-o” luk yij-o.

²⁶ Yosoloma, nagawan-nen Ndaniel, unu misig-e Mbelsasat, iri na yak tosolar-e: ”Kar-e an-nen nabi kagi iri na ndindera yosolat, nabi ebe-ge iri nggal-o luk para yak nururag-e ndag-a?” luk yak tij-o.

²⁷ Yosoloma, Ndaniel-nen onggo yosolar-e: ”Nagawan wa-e. Yi mende ndi mende enaru nap min kwiye worak kwarugwi enaru nap min yari min wonaru mbenarugwi enaru nap min-nen nabi iri kat yak kururag-e meya-o.

²⁸ Alat nde, aid arem woraso Mbal Pem Nagawan iri nak-nen kura wene oboksa-ge para nam tak poso-o. At iri-net abok-nen kwat momtak wene-t nde, yak kirij-o. Nde, nagawan kat nene yosoma, nabi bem kaigen iri-ge an-nen iri nggal-o luk yawo-n yak kirimin-o.

²⁹ Nagawan kat nene yosolat-nen nabi kaigen iri-ge abok woragolat-nen kwat yurak ambigit nggwe-t kaigen-o. Mbal Pem Nagawan-nen kura wene abok-nen kwat momtag-e kat kimbiri bem nam tak pij-o.

³⁰ Nde, kura wene yu an nimbiri bem nam tak pid iri-ge, ap ereb-e teberak unpuruk, nindi tenggerag-e an nak ala-nen kwarij-e lag-o. Alat nde, nagawan kat-nen nabi kaigen iri ebe-ge iri nggal-o luk karu yosolat, kat kindi arem woraso iri na kwara yebet kasolat yonokluk-nen nam tak pij-o.

³¹ Nagawan kat-nen nabi kaigen-e yu-o: Kat keralu kimbiriwak pem-e ap ndak worak mondok nggok irit mendak kaigen-o. Yik kasolar-e, abinal worak-nen mondok aye worak irit kaigen-o.

³² Nde, iri na anggul-e emas pem-nen ndak worak, nde, imidwak min erabitwak min-e perak pem-nen ndak worak, nde, ubugulwak min erawak min-e tembaga-nen ndak worak,

³³ nde, awag-e mbesi bem-nen ndak worak, nde, ijog-e mbesi min mimi nggweyak min pem-nen nat karuk ndak worag-o.

³⁴ Nde, iri kwasa ndak worak iri na kat-nen yi karok worasoma-ge, kerep nggok misik abam nggwe-nen erambet limbik lambik lobok yosolar-e, ap ndak worak Iri na mbesi min mimi nggweyak min-nen ndak worak ijok iri na bem-et mbud yosolar-e, ijok iri na mondok yigisa ndamera labuk yij-o.

³⁵ Iri kwarosolat ereya na-net ap ndak worak iri na-ge mbud yosolat, ndamera mbesi min mimi nggweyak min tembaga min perak min emas min ereba na-ge nggilara nggurusa labuk yid iri-ge o kibi bem-nen nggandum mbato yugurugwi sa abapno keya bidnak nggal kwasa labuk yij-o. Nde, o wija-nen puk kuruk mborosolar-e, mondok ondoro tet lak tak pij-o. Alat nde, ap nggal ndak worak iri na tibirid kerep iri na perak ndobo nggal-et mondosolar-e, yi wi ndi wi oboksa yebet yij-o.

³⁶ Nde, nap kat-nen nabi kaigen-e irir-o. Nde, yawo-ge an-nen nabi iri ebe-ge iri nggal-o luk para yak kirimin-o.

³⁷ Nagawan kar-e nagawan ereb-e teberag-et nde, kar-e nagawan terak minik kek tak-net yusu-o. Mbal Pem Nagawan aid arem woraso-net kat-nen tenagidnak wi yu-ge kinggem puruk, kat-nen tenagidnak wi yu tena burak amawi min karong min kek tak woraso elem min iri-ge at-net wok keramu-o.

³⁸ Nagawan kar-e nggweyakma yu me woragwi nap min towe min urugup worak erep min oboksa tena wolmakluk mendak kebamu-o. Ap ndak worak iri anggul emas-nen ndak wiridnak iri-ge nagawan kat-net yusu-o.

³⁹ Alat nde, kat woragun kimbirig-e, nagawan misik men ma iri-ge kat-nen tena worasu yu nggal-e lag-o. At amawi-ge marig-et irit men ma-o. Nde, kenan tak posolar-e, at imbirig-e tembaga-nen konidnak kaigen iri ndak ndag-e nagawan misik men ma-o. Men yosolar-e, yi wi ndi wi oboksa tenaguwa-o.

⁴⁰ Nde, empat pem tak posolat, at imbirig-e mbesi amawi nggal amawi worak misik-nen o tenaguwa-o. Mbesi-nen yi mende ndi mende ndamera yigisa keya boso iri na nggal-et nagawan amawi worak empat pem tak posolat men ma iri-nen-e nagawan erep ereba-nen tenagidnak wi ereba na oboksa ndamera yigisa keya buwa-o.

⁴¹ Nde, ap ndak worak iri na ijok min ijokngga min-e mimi nggweyak min mbesi min-nen nat karuk ndak worak kaigen iri-ge abok nggwe amawi worak iri-nen tenagidnak wi iri na-ge ngara arik tik arik tak kwat ma-o. Alat nde, mimi nggweyak iri-ge mbesi min nat karuk me, nagawan iri-nen tenagidnak wi iri-ge amawi worak irit ma-o.

⁴² Nde, ijokngga nggweyak min mbesi min-nen nat karuk konidnak iri-ge nagawan-nen tenagidnak wi ereb-e amawi worag-et nde, ereb-e amawi lak irit wolma iri ndak ndak-nen yusu-o.

⁴³ Nde, mbesi min mimi nggweyak min-nen nat karuk konidnak kaigen iri-ge yu nggal-o: Nagawan iri-nen tenagidnak wi ngara arik tik arik tak kwaridnak ereba na-nen amawi rak purak pem-e kwe wok kerak mbuwa-t nde, meya-t ma iri-ge mbesi min mimi nggweyak min ndak ndag-e lak me, meya kwat yid iri nggal-et lambuk ma bug-o.

⁴⁴ Nde, nagawan ereba na-nen o tena woragola tarem-e aid arem woraso Mbal Pem Nagawan-nen-e nagawan misik-nen tenagidnak wi kwarak puwa iri-ge ap enlem mbi-nen mondok urugwe nggwe rak puwa buk, pem irit wolmomtak wi irit puwa-o. Nde, nagawan misik-nen tenagidnak wi yu-nen-e nagawan erep-nen tenagidnak wi ereba na oboksa ndamera yigisa irit keya buwa-o.

⁴⁵ Nap kat-nen yik kaigennggal-e, kerep misik erambet abam nggwe-nen limbik lambik lobok yasolar-e, mbesi min mimi nggweyak min tembaga min perak min emas min pem-nen ap ndak worak iri na-ge ndamera yigisa keya bosola kaigen iri-ge Mbal Pem Nagawan Mondok Nggok iri na-nen abok-nen kwat momtak irit mirik kibij-o. Nde, nabi kaigen iri-ge ndemeret yak kutluk, nabi ebe na iri nggal-o luk ndak ndag-et yak kirigi-o” luk yij-o.

Nagawan-nen onggo Ndaniel wok tidnak wene 2:46-49

⁴⁶ Iri luk, Nagawan Nebukatnesat iri na-ge Ndaniel eram tud luk, at-nen wene wirik posolar-e. ”Ndaniel amanggim wam wosa kan pogolat, erep min-et amanggim purag-o” luk ap ereba na yak indij-o.

⁴⁷ Iri luk, nagawan-nen yosolar-e: ”Ndaniel wa-e. Ndemeret kat Kembal Pem Nagawan iri-ge mbal pem nagawan erep ereba enggendumu-nen mondok nggok lombok-nen yusu-o. At iri-ge nagawan ereb-e teberag-et nde, ar-e mondok terak minik kek tak-net yusu-o. Kura wene oboksa kilara nam tak poso-nen yusu-o. Kar-e kura wene-t nde, ebe-ge iri nggal-o luk nam para yigen pem-e kat Kembal Pem Nagawan-e an-e mondok naru yusu-o” luk yij-o.

⁴⁸ Iri lug-e, nagawan-nen-e Ndaniel iri na-ge kek tak irit posolat, silobulo konak nak kwarat we wok tosolat, Mbabilonia iri me ngguberenot irit mendak posolat, nagawan woraso sa iri na me nagawan nggomo wurugwi nap ereba na enanggul pem ene kulurak nap irit obosolat kwarij-o.

⁴⁹ Alat nde, Ndaniel-nen nggi yidnak pem-et Sanderak min Mesak min Abetnego min it ereya-nen tena wolmakluk Mbabilonia tenagurak amawi ininggem pij-o. Nde, Ndaniel iri na-ge nagawan woraso sa iri na me-t woragij-o.