NDANIEL 12 - Nanduk Ngget Tul Pidnak Wene

Woroksiyem-nen kwat ma wene 12:1-13

¹ Nde, aid nap sum linen sum yirik iri na-nen tuguruk yosolar-e: ”Iri tarem abog-e aid nap kek tak kit kenlem Isarael nap nggetlel kunpuruk woraso Mikael iri na wok ma-o. Iri luk imbirig-e anggun panggun wolmomtak tarem irit wok ma iri-ge ap nanduk woraiga ereba woragolat-nen enpem mboso nggal-e lag-o. Are, terak mena anggun panggun wolmomtak tarem irit wok ma-o. Alat nde, kit kenlem nap unnu Mbal Pem Nagawan engga bem mbarak worasu nab-e inmiri-t yuwa-o.

² Nde, wat yidnak nap ennggendumu-nen ap kwarar-e tuguruk unluk ma-o. Nde, it ereb-e pem-et unluk woralik nalik irit wolma-o. Nde, ereb-e teberak enlengenma nggal tak irit onpogolat, kwiye-nen enaboro lera mboso mende arem irit pem-et woralik nalik irit wolma-o.

³ Nde, enne kulugwi indi nggat nggat worak nap ereba na-ge eneyaya-ge o yaya nggal irit wolma-o. Nde, ap kwarat-nen ndemeret mot mot nak kwarogolat wolmakluk ap kwarat mul ondogolat woraidnak nap ereba na-ge wonaru abinal nggal enabinal-e pem irit kere kere rak wolma-o” luk yij-o.

⁴ Iri yosoluk, aid nap iri na-net tuguruk yak norosolar-e: ”Ndaniel wa-e. Yawo-ge engga iri-ge lombok tak pi-o. Iri rak purug-e, lombok tak irit worasoma, i worok tak purak tarem wok makluk, lop nok tak pugwi mende lop nok tak pi-o. Nde, ap kwarat-nen: ’Kwat yusu mende ereba na-ge iri nggal kwat yusu-o’ luk, lombot pugwi wal kagolat wolma-t nde, it-nen iri kwaruwa ereba na-ge ebe-ge kwat ma bug-o” luk yak nirij-o.

⁵ Nde, iri luk imbirik yik kaginggal-e, ap mberen-e ap misig-e yi eyak ele bem mendak, nde, misig-e eyak yu bem mendak irit eneyagi-o.

⁶ Nde, at misik iri na-nen aid nap yi ulusu nggwe mendak iri na kin wok obosolar-e: ”Kwiye worak mende kwat yusu yeba-ge mepme tarem nggal-nen lak ma-o?” luk kin wok obosola kagi-o.

⁷ Iri yak tosola-ge, aid nap iri na-ge inggi-ge mberensa mbal nggwe ligik puruk-nen yosolar-e: ”Kwat yoso mende kwiye worak ereba-ge olengen tiga setenga ereya bem-e kwat yosolat irit wolma-o” luk, Mbal Pem Nagawan pem irit woraso iri na owak mbarosola kuligi-o. Iri yosolat-nen yosolar-e: ”Mbal Pem Nagawan ilirak anggun panggun tak inpili iri keya bogola-ge, kwat yoso mende kwiye worak mende kwat yusu ereba min-et lak ma-o” luk yij-o.

⁸ At-nen yid wene-ge ndemeret kuligi-t nde, ebe-ge iri nggal yosolat-nen yusu-o luk, yenggerak pigit lag-o. Iri ala, an-nen kin wanosolar-e: ”Nab-o. Ereba oboksa-ge lag-et ma, lak?” luk kin wanigi-o.

⁹ Iri yosolukmu, at-nen onggo yak norosolar-e ”Ndaniel wa-e. Wene yeba-ge kura teberak nak irit worasoma iri-net i worok tak puwa tarem wok yurak me, kar-e yawo-t mbiri-o.

¹⁰ Ap kwarat inndi ngara iminep mbara keya unpuwa-o. Nde, meya kwarugwi nab-e wene yeba-ge yebet kagit lak, meya nak irit kwat tenak wolma-o. Nde, inndi nggat nggat worak nap nak-nen perak yeba-ge iri nggal-o luk yebet kujwa-o.

¹¹ O nda yidnak irit wosa Mbal Pem Nagawan amanggim wam wosa kan pugwi iri na lak tak puruk, unmunggum lera mboso mende unu-ge meya yigisa lak tak onposo mende iri na nggok tak puwa tarem-e 1.290 hari irit wolma-o.

¹² Nde, pempa tugup lak iri-net 1.335 hari irit wolma nab-e mondok enalen kagolat wolmag-o.

¹³ Ndaniel wa-e. Kar-e mondok tugup lak irit worasoma, woroksiyem wok mag-o. Kar-e wat yugun-et nde, woroksiyem-e onggo wanurak pem men-et yugun-o” luk yak nirij-o.