NDANIEL 10 - Nanduk Ngget Tul Pidnak Wene

Yi Tigiris Arem-nen Ndaniel-nen nabi nggal pem kagaid wene 10:1–11:2

¹ Nde, Perisia Nagawan Kores iri na Perisia iri me nagawan men yarik, olengen kenan pem tak posoma-ge, Nagawan Indo-nen wene misig-e Ndaniel, unu misig-e Mbelsasat, iri na nam-et yak tij-o. Wene yak tid iri-ge ndemerer-et nde, wene iri-ge yebet kudtag-e mondok nggesa nggal angin worag-o. Nde, wene iri na-ge ebe-ge iri nggal-o luk, Ndaniel yak tosolar-e, nabi nggal pem-nen yak tij-o.

² Ereya tarem-e an-e minggu kenan yip pem nak woragi-o.

³ Nde, minggu kenan ereya arem-e nunggwi mende undu konak min uno min anggut engen amburu min mondok ninggit lak woralat, nanggulsu min-et erok mbinigit lak irit woragi-o.

⁴ Olengen iri na arem waneya misiget, tanggal 24 iri bem-e an-e Yi Tigiris nggok iri na eyak pem mendak woragi-o.

⁵ Woralat-nen nerengen lik kaginggal-e ap misig-e usum-e linen-nen konidnak sum yirik, nde, ubugulwak kere-ge emas kopkap lak pem-nen konidnak irit logoksa yirik kagi-o.

⁶ Nde, at ebe-ge abinal worak kerep abinal nggal abinal worak, nde, erare abinal-e pinel yebek yosolat abinal nggal worak, nde, erengen-e kan amare nggal irit amare yosolat kagi-o. Nde, erabitwak min ijok min abinal-e tembaga posid marak pidnak abinal nggal, nde, ene-ge ap kwarat-nen enne yogolat nggal irit kuligi-o.

⁷ Nabi nggal pem kagi iri-ge an narig-et-nen kagi-o. Nde, ap an nimin woraiga nap-nen-e kagit lag-o. Alat nde, ir-e kwiye-nen kurak yil pong kil mbiriga-o.

⁸ Nde, it ereba na keya nibikma, an narik woralat nabi nggal pem yik kagi kwiye worak mende ereba na limbit lombot posolat irit woragi-o. Iri yosolar-e, mondok namawi lak luk, nerare min nden karuk keya bij-o.

⁹ Nde, an-nen at ene iri na kolosolar-e, an-e wat yidnak nggal irit wat yosolat, nerare nggwe langgusa mbud yigi-o.

¹⁰ Iri rak worasoma-ge, ininggi misik-nen sil neyagola, mendak nobogolar-e, ninggi min nuwok min-e nuwok tak puruk wam kwasa labuk yosolar-e, kwiye-nen lele yigi-o.

¹¹ Iri yosoma, aid nap iri na-nen yak norosolar-e: ”Ndaniel wa-e. Kar-e Mbal Pem Nagawan-nen kabuwa-t kasu-o. Kar-e men luk yugundik, an-nen yak kirimin wene-ge kwara kuli-o. An-e Nagawan Indo-nen kat keram nibil lobok yamu-o” luk yij-o. Iri yak norosola, ereya na men yosoma-ge, nebem-e yugup tugup mbosola, irit men yigi-o.

¹² Men yosolakmu, at-nen an yak norosolar-e: ”Ndaniel wa-e. Kwiye kasu-ge meyog-o. Kat-nen kindi nggat nggat worak kwat yurak pem ’nindi teberak peyeg-o’ luk yebet karuk, kindi teberak pigen iri na tarem-net kat-nen tepan yigen-e Mbal Pem Nagawan-e abu kolamu-o. Nde, an lobok yigi yu-ge kat-nen tepan yigen iri bem nibil lobok yij-o.

¹³ Perisia nagawan-nen tenagidnak wi iri na nggetlel unpuruk woraso aid nap iri na-nen an nimin wim mbarosolar-e, 21 hari irit nimin wim mbarosolat irit woragij-o. Iri kwarosoma, aid nap ereba na enanggul pem kek tak woraso Mikael iri na-nen-e an-e yongga nirij-o. Nde, at iri na-ge Perisia iri me keya ibigi-o.

¹⁴ Nde, an lobok yigi-ge kat kelem nap enpem abok kwat ma mende ereba na kwara karu rak peyekluk lobok yigi-o. Nde, nabi nggal pem yik kaigen yu-ge abok-nen kwat ma wene kaigen-o” luk yak nirij-o.

¹⁵ At-nen wene iri na yak norosola-ge, an-e nanggul ujo yosolar-e, wene yurag-e meya irit kwat yigi-o.

¹⁶ Iri luk, aid nap ap enpage worak iri na-nen inggi an nemnde bem pij-o. Iri yosola, an-nen yak tosolar-e: ”Nab-o. Nabi nggal kagi iri na-nen ndowaga mondok namawi lak yusu-o.

¹⁷ Iri nggal kwat yosolar-e, an-e ndegel unpugwi nap-nen it onnggo pidnak nap ereba na entalu enne lak we mendak nak woragwi nggal worasu yu-ge nggerak puruk-nen an-e nap kat kimin wene yimin-o? Namawi lak yosolat, nindisep na lak yij-o” luk yigi-o.

¹⁸ Iri yosolakmu, at inggi tuguruk an nebem pidnggal-e an namawi-ge siyak wok yij-o.

¹⁹ Iri yosola, at-nen yosolar-e: ”Mbal Pem Nagawan-nen-e kar-e kabuwa-t kasu-o. Kar-e kumud kalik, kwiye kalik yurak pug-o. Ndak kamawi kwat min-o” yak nirij-o. Iri na yak norosoma ereya na-net an-e namawi kwarat kwat yosolat, an-nen yosolar-e: ”Nab-o. Wene yi-o. Nap kat-nen namawi rak pigen-o” luk yak tigi-o.

^20-21 Iri yak tosolakmu, at-nen onggo yosolar-e: ”An kat keram lobok yigi-ge erem-e iri bem-nen lobok yij-o luk kar-e karu, lak? An lobok yigi yu-ge Ndemeret Engga iri na bem mbarak worasu wene ereba na karu rak peyekluk-nen lobok yigi-o. Nde, yawo-ge aid nap Perisia iri me nggetlel unpuruk woraso iri na imin wim mbarurak mbirimin-o. Iri kwarimin imbirig-e Yunani nggetlel unpuruk woraso aid nap iri na lobok yuwa-o. Iri kwarosola-ge, misik-nen mbi an yongga nuruwa bug-o. Alat nde, kit Isarael nap nggetlel kunpuruk woraso aid nap kek tak Mikael nak-nen yongga nuruwa-o.