NDANIEL 1 - Nanduk Ngget Tul Pidnak Wene

Ndaniel Ndaniel anggamirak inmin onowene ( 1:1–6:28 ) Yawuri nap sujwe Nagawan Nebukatnesat woraso sa woraiga wene 1:1-21

¹ Nagawan Yoyakim iri na Yewura iri me tena buruk nagawan woralar-e, olengen kenan worasoma-ge, o Mbabilonia Nagawan Nebukatnesat lobok yosolar-e, o siri Yerusalem ebem mbud yosolar-e, o lop lop worak puruk irit woragij-o.

² Nagawan Indo indi-n pidnak pem-et Nebukatnesat iri na lobok yosolar-e, Nagawan Yoyakim iri urugwe nggwe rak puruk, silobulo onggo nggok Yerusalem iri me Nagawan Indo ama woraso ereba na-ge ereb-e wanogolar-e, ap kamat inpidnak min silobulo onggo nggok mengga wanidnak min-et mburunuruk mberarik, at ugugwiwak uwi iri na me inpil mbutluk, silobulo mengga wanidnak ereba ugugwiwak uwi iri na arem yi mende ndi mende ndok wosa pugwi sa ereba na me pil nggwij-o.

³ Iri rak puruk, Nagawan Nebukatnesat-nen at woraso sa iri me woragwi nap-nen ene kulurak mendak pidnak Aspenas iri na yak tosolar-e: ”Kamat unpuruk lobok yidnak nap Isarael nap ennggendumu-nen nagawan-nen wigarak ala na, ap enlem kek tak-nen wigarak ala na ennggendumu-nen ap sujwe ereb-e lena wani-o.

⁴ Ap sujwe ereba-ge enpem ambut lak, mondok enpe na sujwe enmawi min, sekola nggok yidnak, inndi tenggerak-nen mondok enaru nap, nagawan woraso sa mondok yabu wanurak nap irit len unpuruk, Aspenas kat-nen mul ondosolar-e, Mbabel wene iri na wonarogolat, mbarogolat yuwakluk mul undurag-o” luk ebem pij-o.

⁵ Nde, it ap ereba na enmanggim-e nunggwi mende min yi min irit nagawan iri na ama woragwi nap-nen nunggwi ereba na ereb-et nonggolat wolmomtag-o luk nagawan iri na-nen yij-o. Nde, it ereba na-ge sekola yogolat olengen kenan worarug-e, nagawan woraso sa iri me-t yabu wanurak pem nagawan eram mbururag-o.

⁶ Nde, ap sujwe ereba na ennggendumu-ge Ndaniel min Anania min Misael min Asaria min irit woraiga-o. It ereya oboksa-ge enlem-e Yewura nap nag-o.

⁷ Nde, nagawan woraso sa iri na me-nen ene kulugwi nap iri na-nen-e it empat ereya na unnu ki yarosolar-e: Mbelsasat min Sanderak min Mesak min Abetnego min irit yarij-o.

^8-9 Nde, Ndaniel iri na-nen yebet kasolar-e, nagawan woraso sa iri me-nen nunggwi nunggwi mende min anggut amburu min ereba na kugwi amanggim pidnak ala, norak isili-nen Ndaniel-nen Aspenas yak tosolar-e: ”Nab-o. An-e nunggwi mende-ge we nin ereba nak namin-o” luk yak tij-o. Nde, Mbal Pem Nagawan-nen arem yabu wanosola-ge, Aspenas-nen-e Ndaniel iri na-ge ubud kasolat, indi kundugu irit woragij-et nde,

¹⁰ ar-e nagawan iri na indi aye kasolat-nen yosolar-e: ”Nagawan at-net: ’Nunggwi mende min yi min-e yeba-t norag-o’ luk watsa pidnak me, kat-nen nde keya bosola-ge, ap sujwe ereb-e enmawi worak, alat nde kat nde kamawi lak ala karug-e, an-e nuruwa nde ma-o” luk yak tij-o.

¹¹ Iri yosola, Aspenas-nen ap tu pak tak woralat, Ndaniel min at anggamirak kenan min ndegel onposolat wolmakluk mendak pid iri imin Ndaniel-nen-e wene mbarosolat-nen yosolar-e:

¹² ”Nab-o. Kat-nen nenabut mbaronok-nen wal kasolar-e, mburungga min yi min nak mak nondosolat sepulu tarem wolmog-o.

¹³ Ereba na nak nonggolat sepulu tarem worarug-e, nit min ap sujwe erep nagawan-nen norag-o yidnak mende nujwa nap min nenpe ndak worogolat, lombot nunpurag-o. Nde, kat-nen lombot nunpugun iri bem-nen wene nggaruksa yonog-o” luk yak tij-o.

¹⁴ Yak tosoloma, ap yik eneyarok woraso nap iri na-nen-e ”Ob-o” luk yarik, Ndaniel-nen yid iri na ndak ndak wal kasolar-e, sepulu tarem woragij-o.

¹⁵ Wolmomtak yidnak tarem ereya na woraruk, ndak yosola-ge, yik eneyagaidnggal-e, ap nagawan-nen naso erep nunggwi nap ereba na-ge enpe-ge te-t nde, Ndaniel anggamirak inmin ereya na-ge enpe mbenak-nen enmawi worak irit eneyagaij-o.

¹⁶ Iri na kwatluk ombol nggwe-ge yik eneyarok woraso nap iri na-nen-e it ereya na enmanggim-e nagawan-nen norag-o luk pidnak nunggwi mende ereba na-ge mak indigit lak, we mburungga min yi min nak nujwakluk keya inpij-o.

¹⁷ Nde, Mbal Pem Nagawan-nen ap sujwe empat ereya na wok ondosolar-e, inndi nggat nggat elem min enaru yugwi elem min irit wok endamu, yi mende ndi mende elem pidsa kwara enaru yiga-o. Nde, erep Ndaniel wok tosolar-e, nabi bem nggal yik kagwi elem min nabi kaidnak iri ebe-ge iri nggal-o luk para yurak elem min irit wok tij-o.

¹⁸ Nde, nagawan-nen sekola yogolat olengen kenan wolmomtag-o yid iri na ndak ndag-et olengen kenan worarug-e, Aspenas-nen-e ap sujwe ereba na-ge Nagawan Nebukatnesat eram wok unpuruk mbirij-o.

¹⁹ Iri yamu, Nagawan Nebukatnesat-nen it oboksa inmin wene mbarosolat-nen lombot onposoma-ge, ap erep ereba na-ge teberag-et nde, Ndaniel min Anania min Misael min Asaria min it ereya na nak perak nde it-nen enaru yidnag-et ombol nggwe irit eneyagaij-o. Iri ala karuk, it ereya na-ge nagawan woraso sa iri na me yabu wanugwi tel kwiriga-o.

²⁰ Nde, pempa Nebukatnesat-nen-e iri me wene nde worasola-ge, at-nen-e ngge nggal-o? luk it kin wok onposolat, iri-nen ngge nggal kwarurag-o? luk kin wok onposoma-ge, it enpe ap sujwe empat ereya na-nen yugwi wene min it-nen yebet kagwi min-e at-nen tenagidnak wi iri me woragwi nap-nen ”Iri nggal kwat ma-o” luk urul pugwi nap min kwiye worak kwarugwi nap min ereba-nen enaru yidnak ereba-ge mariger-et nde, it empat ereya-nen enaru yidnag-e terak minik ombol nggwe irit eneyagaij-o.

²¹ Iri ala karuk, Ndaniel iri na-ge nagawan woraso sa iri na me-t yabu wok tenak worasoma, iri-net Perisia nap Nagawan Kores-nen Mbabilonia urugwe nggwe rak puruk at-nen Mbabilonia wi tenagij-o.