NDAK WIRIDNAK WENE 5 - Nanduk Ngget Tul Pidnak Wene

Aram-nen wigarak 5:1-32

¹ Aram-nen wigarak wonarag-e yu-o. (Mbal Pem Nagawan-nen nandug-et ap ndak worak inpid iri na-ge at Mbal Pem Nagawan ondomok abage ndak worag-e ndak wat enpamu-o.

² Ndak worak onposolar-e, ap min kwe min-et ndak wat enpamu-o. Ndak wosa keya unpuruk yarig-e, imbiringgat tak unpuruk yarig-e, unu-ge ab-er-o luk yarij-o.)

³ Nde, Aram na worasolar-e, olengen seratus tiga pulu (130) worarug-e, Aram na-ge li ap at nggal ndop nok tak mbi ndagij-o. Ndaguruk, unu-ge Set yarij-o.

⁴ Iri rak puruk, Aram na worasolar-e, olengen delapan ratus (800) woragij-o. Woralar-e, elirak erep na nder-et inpij-o.

⁵ Nde, Aram na-ge olengen sembilan ratus tiga pulu (930) woraruk, wat yij-o.

⁶ Nde, Set na olengen seratus lima (105) woraruk, ambara Enos ndagij-o.

⁷ Iri rak puruk, Set na uruk woralar-e, olengen delapan ratus tuju (807) ereya worasolar-e, elirak erep na nder-et inpij-o.

⁸ Set na-ge olengen sembilan ratus duabelas (912) worarug-e, wat yij-o.

⁹ Nde, Enos na olengen sembilan pulu (90) woraruk, ambara mbi ndagij-o. Nde, unu-ge Kenan.

¹⁰ Ndagurug-e, olengen delapan ratus lima belas (815) worasolar-e, elirak erep na nder-et inpij-o.

¹¹ Ndagurug-e, olengen sembilan ratus lima (905) worarug-e, wat yij-o.

¹² Nde, Kenan na olengen tuju pulu (70) worarug-e, ambara misik ndagid iri unu-ge Makalalel.

¹³ Nde, Kenan na uruk woralat, olengen delapan ratus empat pulu (840) woralar-e, elirak erep na ndagij-er-o.

¹⁴ Ndagurug-e, olengen sembilan ratus sepulu (910) woraruk, wat yij-o.

¹⁵ Makalalel na olengen enam pulu lima (65) worarug-e, ambara mbi ndagid iri unu-ge Yaret.

¹⁶ Iri rak puruk, Makalalel na olengen delapan ratus tiga pulu (830) woralar-e, elirak erep na ndagij-er-o.

¹⁷ Ndagurug-e, olengen delapan ratus sembilan pulu lima (895) woraruk, wat yij-o.

¹⁸ Yaret na olengen seratus enam pulu dua (162) worarug-e, ambara misik ndagid iri unu-ge Enok.

¹⁹ Ndaguruk, olengen delapan ratus (800) woraruk, elirak erep na nder-et inpij-o.

²⁰ Nde, olengen sembilan ratus enam puluh dua (962) worarug-e, ebe-ge wat yij-o.

²¹ Enok na olengen enam pulu lima (65) worarug-e, li ap mbi ndagid iri unu-ge Metusala.

²² Ambara iri ndaguruk woralar-e, indi-ge Mbal Pem Nagawan imin kundik woralar-o. Nde, olengen tiga ratus (300) iri woralar-e, elirak erep na ndagij-er-o.

²³ Nde, at nggweyak ma yu me woralar-e, olengen tiga ratus enam pulu lima (365) woragij-o.

²⁴ Eid Mbal Pem Nagawan imin panggarak woraso me-ge, Mbal Pem Nagawan-nen wanosolat, lak agaij-o.

²⁵ Nde, Metusala na olengen seratus delapan pulu tuju (187) woraruk, ambara mbi ndagid iri unu-ge Lamek.

²⁶ Iri luk, Metusala woralar-e, olengen tuju ratus delapan pulu dua (782) woralar-e, elirak erep na nder-et inpij-o.

²⁷ Iri rak purug-e, olengen sembilan ratus enam pulu sembilan (969) woraruk, wat yij-o.

²⁸ Lamek na olengen seratus delapan pulu dua (182) woraruk, ambara mbi ndagij-o.

²⁹ Lamek-nen yosolar-e: ”Mbal Pem Nagawan-nen imbiri lamut tak pidnak nggweyak yu bem nit-nen yabu anggun panggunsa wanukmu, la yu-nen te yaga wok nunduwa-o” luk yij-o. Iri kwarurak ala karuk, Lamek-nen la na unu-ge Nu irit yarij-o.

³⁰ Iri luk, Lamek na-ge olengen lima ratus sembilan pulu lima (595) woralar-e, elirak erep min-et ndet inpij-o.

³¹ Ndet unpuruk, olengen tuju ratus tuju pulu tuju (777) woraruk, wat yij-o.

³² Nde, Nu na olengen lima ratus (500) worarug-e, elirak kenan, Sem min Am min Yapet min irit ndet inpij-o.