NDAK WIRIDNAK WENE 3 - Nanduk Ngget Tul Pidnak Wene

Ap-nen Mbal Pem Nagawan ene taridnak wene 3:1-13

¹ Nagawan Indo Mbal Pem Nagawan-nen ndak worak pidnak towe mena sil waro ereba na enggendumu-nen mondok indi nggat nggat kwiye worag-e waro irit woragij-o. Nde, waro na-nen kwe na kin wok posolar-e: ”Nde, Mbal Pem Nagawan-nen-e yapmu yu me worasu e yeba engen mbi-ge ’Norak pug-o’ luk yak kindid, lak?” luk kin wok ibij-o.

² Kin wok obosoloma-ge, kwe na-nen wene erep nggarosolar-e: ”E yapmu yu me worasu yeba-ge engen-e nit norag-e ob-er-o.

³ Alat nde, e enggendumu worasu iri engen perak nde, ’Mondok norak puk, kenaboro na siyag-et tet ebem yurak puk na-e’ yuruk Mbal Pem Nagawan-nen imiri mbarak pamu-o. Nit-nen nde ene kwid turuk kwarul ala-ge, nir-e mondok wat mul-o” yij-o.

⁴ Yosoloma, waro na-nen wene onggo yosolar-e: ”Iri-ge enesiget yij-o. War-e yugup pug-o.

⁵ Mbal Pem Nagawan-nen iri yak kindid iri-ge kit-nen engen iri nonggola, kindi tu kuwak yosolar-e, Mbal Pem Nagawan nggal kwat yogolat, konak elem min meya elem min kenaru ma naru-nen ’Norak pug-o’ yak kindij-o” luk waro-nen yak tij-o.

⁶ Yak tosoloma, kwe na-nen e konak iri na yik kasolar-e: ”Engen konak irit undu kayeg-o” luk perasolar-e: ”An-e oboksa naru yosolar-e ob-er-o” luk peragij-o. Perarug-e, e iri na engen mbararik, ninggij-o. Nuruk, ereb-e un wok tamu, un iri na ninggij-o.

⁷ Nde, it na engen iri nonggolat ereya na-net it inndi tu kuwak yosolar-e, enpage lombot piganggal-e ir-e ngenwa koro nderak nde karuk, enaboro lomorogolar-e, e ara angga mendaga yiriga-o.

⁸ Nuruk worakmu-ge, keyama nggwe-ge Nagawan Indo Mbal Pem Nagawan-e yapmu iri na me onkore yil nosolat ene kuliga-o. Kuluruk yigarig-e, iniyujwa naru e ereba na ndumu kurak yil mbiriga-t nde,

⁹ Nagawan Indo Mbal Pem Nagawan-nen ap na yak tosolar-e: ”Kar-e ngge me worasu-o?” yak tij-o.

¹⁰ Yosoloma, Aram-nen erep nggarosolar-e, ”An-e kene-ge yapmu yu-net kuligi-t nde, an-e naboro koro nderak me, ninggiri-nen kurak yigirik worasu-o” luk yij-o.

¹¹ Yosoloma-ge, Mbal Pem Nagawan-nen yosolar-e: ”Kar-e ta-nen kaboro we koro nderak worasu-o yak keramu-o? Kar-e an-nen ’Norak pug-o’ yigi engen na ninggendig-a?” luk kin wok ibij-o.

¹² Kin wok obosoloma-ge, Aram-nen wene onggo yosolar-e: ”Kat-nen an nimin wolmakluk wok nirigen kwe iri na-nen engen iri mak neramu ninggirig-o” luk yij-o.

¹³ Yosoloma-ge, Nagawan Indo Mbal Pem Nagawan-nen kwe iri na kin wanosolat-nen yosolar-e: ”Kar-e noluk-nen iri kwarigen-o?” yak tosoloma-ge, Awa-nen yosolar-e: ”An-e waro-nen nemberam lasola-nen ninggirig-o” yij-o.

Mbal Pem Nagawan-nen angin worak mende enpem mberak pid wene 3:14-21

¹⁴ Yosoloma, Nagawan Indo Mbal Pem Nagawan-nen waro na yak tosolar-e: ”Kat-nen kwaridnak pem-et kebem wene mbarimin-o. Ndak worak pidnak towe mena sil waro oboksa enggendumu-ge mondok kat karig-et nag-et imbiri lamut yu wanugun-o. Kar-e o yawo kuri-net tu-ge kembe bem yuguluk nosolat, kat kuruk woralar-e, kopkap yeba nak nil nosolat wolmin-o.

¹⁵ Kat min kwe iri min-e kuri worak woragolat, at-nen wigarak min kat-nen wigarak min-e pempa wim mbarak woragolat, at-nen wigarak-nen kat kanggulwak tugud tak posola-ge, kat-nen-e it unuwok nggut yilik pugun-o” yak tij-o.

¹⁶ Yak turuk, Nagawan Indo-nen Awa yak tosolar-e: ”An-nen kat kebem angin worag-e nambena kebem pimin-o. Kat kabila woralar-e, anggun panggun woralat, la ndagosolat na andi bandisa yane wosa-net ndagosolat wolmin-o. Nde, yane wosa ndakun-et nde, kindi-ge kun imin nene yurak pem-e mbarak pugun pug-o. Kar-e kun urugom tebe luk wolmomtag-o” luk yak tij-o.

¹⁷ Iri luk, Nagawan Indo-nen Aram yak tosolar-e: ”Kar-e kogwe ene kuluruk, an-nen ’Norak pug-o’ yigi engen iri na ninggen-o. Iri kwarigen iri bem-e, nggweyak yu-ge imbiri lamut mag-o. Nde, kat woralar-e, yabu-ge anggun panggunsa wanosoluk-nen nunggwi mende-ge nggweyak yu-nen ebe rak posola, nok tenak wolmin-o.

¹⁸ Kat kamanggim-e egere isile worak min tusuangge min e erambet mbepme tanggal yoso mende-ge kat kamanggim nggweyak-nen ebe rak posola, nasolat wolmin-o.

¹⁹ Kar-e nggweyak yu bem-nen yabu wanosolar-e, mondok pabik paboksa wanosolat, kirigak mburuk-net yi mende ndi mende ebe-ge kwat mag-o. Iri kwat tenak irit worasoma, kar-e tuguruk nggweyak kwat min-o. Kar-e nggweyak-net ngen mbara keya kuburuk ndak wat kibidnak me, tuguruk kerem eram mburugun-o” luk yak tij-o.

²⁰ Nde, Aram-nen ogwe unu yarosolar-e, Awa yarid iri-ge kwe iri-ge yi ap ndi ap oboksa iniya eremwak kwat yosola-nen yarij-o.

²¹ Nde, Nagawan Indo Mbal Pem Nagawan-nen-e aboro nggurugwi wam mbi wosa aboro-ge sum nggal kwasa Aram ogwe min yirik inpij-o.

Aram ogwe min Eren yapmu-nen wirik inpidnak wene 3:22-24

²² Iri luk, Nagawan Indo Mbal Pem Nagawan-nen yosolar-e: ”Yawo-ge ap yu-ge nit nggal konak min meya min aru yidnak me, e unluk nak woragwi engen nasolat urug-et woralik nalik ma naru, ambigit tu nggase rak puwog-o” luk yij-o.

²³ Iri lug-e Nagawan Indo Mbal Pem Nagawan-nen-e at ndak wat ibidnak nggweyak iri na min yig mbal tenak wolmakluk, Eren yapmu-nen sera wirik ibij-o.

²⁴ Iri rak purug-e, Nagawan Indo Mbal Pem Nagawan-nen-e mo luwaso ambigit nggwe Eren yapmu nggugwi tu nggambutmu-ge it tuguruk lobok yuwarik, unluk woragwi engen iri na nujwa naru, aid nab-e yalawi muma nggal ndibile mbarep parep mbosola, tenaga tu nggambutmu inpij-o. Iri kwarak me, ap misiger-o luk tet e iri na eram wok yurag-e mondok meya-o.