NDAK WIRIDNAK WENE 2 - Nanduk Ngget Tul Pidnak Wene

¹ Iri kwasa Mbal Pem Nagawan-nen mbal min nggweyak min abu ndak worak pij-o.

² Ndak wosa keya burug-e, tuju rak posolat tarem-e yi mende ndi mende abu ndak worak puruk, Mbal Pem Nagawan-e we ababok kwasa woragij-o.

³ Nde, at we ababok kwarid tarem iri-ge imbiringgat tak posolar-e, tarem iri-ge arig-et lenak pij-o. Iri kwarid iri-ge, at-nen eyabu ndak tak puruk, we woragid tarem ala-n kwarij-o.

^4a Mbal min nggweyak min oboksa ndak wirid wene-ge irir-o.

Eren yapmu wene 2:5-25

^4b Nagawan Indo Mbal Pem Nagawan-nen mbal min nggweyak min ndak wirid tarem-e

⁵ Mbal Pem Nagawan-nen talme na awo mberak pigit lak, yabu wanurak nap na lak worala me, kuri na yak yigit lak, engen kerengen tup yoso mende uwi na mondok lak woragij-o.

⁶ Alat nde, yi amburu-ge nggweyak arem nggwe-nen nggweyak amburu rak pil luwasolat woragij-o.

⁷ Nde, mbi tarem-e Nagawan Indo Mbal Pem Nagawan-nen nggweyak marig-et waga yarik, kona keya buruk, ap mbi ndak worak pij-o. Ndak worak purug-e, uruk makluk indisep ap na abiru nggwe pu yaga pil nggosoloma-ge, ap na-ge uruk yij-o.

⁸ Uruk luk, Nagawan Indo Mbal Pem Nagawan-nen mo luwaso ambigit nggwe Eren iri me yabu waga keya buruk, ap ndak wosa pid na-ge iri na me-t pij-o.

⁹ Nde, iri na me-ge Nagawan Indo Mbal Pem Nagawan-nen-e e konak engen konak nak yoso nin tak nan tak iri-ge iri na me-nen wirik pij-o. Nde, e uwi kere uwi wirik pid ereba na enggendumu-ge unluk tak poso e uwi min meya min konak min elem mirik onposo e min ereya na-ge e kwarat ereba na enggendumu yak yij-o.

¹⁰ Nde, Eren yapmu iri na me-nen Eren nggweyak na amburu rak puwaklug-e, yi misik pilana mbirij-o. Yi na umbut Eren nggweyak na keya buruk mborosolar-e, umbur-e ndogwara yi nggok nak empat kwatluk mbirij-o.

¹¹ Yi empat ereya na unu-ge misig-e Pison. Nde, yi iri-ge o Awila nggweyak kambuk turuk mburusu-o.

¹² Nde, o iri na me-ge emas mondok konak min, nin me nan me-ge mondok lak, iri me nak-nen wanugwi kolpo nggal emben konak min, kerep abinal worak onggo nggok pugwi min-et worasu-o.

¹³ Nde, yi ondogwal misik iri na unu-ge Nggion. Nde, yi iri-ge o Kus nggweyak kambuk turuk mburusu-o.

¹⁴ Nde, yi ondogwal misik iri na unu-ge Tigiris. Nde, yi iri-ge mo luwaso ambigit o Asiut nggwe mburusu-o. Nde, yi misik iri unu-ge Eperat.

¹⁵ Nde, Eren yapmu iri na me yabu wanogolat, e uwi kere uwi ereba na konogolat wolmaklug-e, Nagawan Indo Mbal Pem Nagawan-nen-e ap ndak worak pid na-ge Eren iri me-t pij-o.

¹⁶ Iri na me puruk, Nagawan Indo Mbal Pem Nagawan-nen ap Aram na yak tosolar-e: ”Kar-e yabu yu me worasu e yeba engen-e oboksa kat nasolat wolmomtag-o.

¹⁷ Alat nde, meya min konak min elem enaru rak poso e yu engen perak nde, mondok norak pug-o. Nunggun nde ala-ge, nunggun iri tarem-et wat yugun-o” yak tij-o.

¹⁸ Iri luk, Nagawan Indo Mbal Pem Nagawan-nen yosolar-e: ”Ap arig-et nak wolmomtak yu-ge meya-o. Are, at yongga wururak anggam mbi ndak wereyeg-o” luk yij-o.

¹⁹ Nde, Nagawan Indo Mbal Pem Nagawan-nen nggweyak marig-et mbi waga yarig-e, kona kegesa wam min mena min nggweyak ma woraso mende oboksa min, towe teram nggwe woraso mende oboksa min ndak wirij-o. Ndak worak purug-e, ndak worak pidnak mende ereba na-ge Aram eram pil lobok yij-o. Iri pil lobok yid iri-ge, ”Ndak worak pidnak mende ereba na unu-ge nggesa unu yara wok til lobok yosola kamin-o?” peraruk-nen eram pil lobok yamu-o. Wam min towe mena nggweyak ma woraso min teram nggwe pubu noso min oboksa unu-ge iri nggal kwasa yarij-o.

²⁰ Iri nggal kwasa nggweyak nggwe noso min teram nggwe noso min oboksa-ge Aram-nen-e unu yarij-et nde, ereba na enggendumu misiger-o luk-nen mbi at yongga wururak anggam mbi mondok kwat yigit lag-o.

²¹ Iri ala karug-e, Nagawan Indo Mbal Pem Nagawan-nen Aram na abu nggaruksa nene rak pamu, nene yosola-ge, ebelwak ereba na enggendumu-nen misik lesa pil waruk, ondolma-ge uno-nen muruk tak pij-o.

²² Nde, ap ebelwak nggogora pil wagid iri na-ge, Mbal Pem Nagawan-nen-e kwe mbi ndak wosa keya buruk, kwe na-ge ap iri na eram pil mbirij-o.

²³ Pil mborosoloma-ge, Aram-nen yosolar-e: ”An nggal-e yu-t kagi-o. At owag-e an nowak erep-nen yusu-o. Nde, at uno-ge an nuno erep-nen yusu-o. Nde, kwe na-ge ap ebem-nen waga ndak worak pidnak ala karuk, unu-ge kweyab-o luk yarusu-o” luk yij-o.

²⁴ Iri-nen ndowaga ab-e eid ija keya buruk, ogwe min misiget luk, it enmbereg-e misiget kwat yili-o.

²⁵ Nde, kwe min ap min iri-ge enpe we koro nderak woragolar-et nde, innggiri lag-et woraiga-o.