NAM PARA WENE 6 - Nanduk Ngget Tul Pidnak Wene

Lop nok tak pugwi mende 6:1-17

¹ Iri luk, an yik kaginggal-e, Lomba Wam Marik iri-nen lop nok tak pugwi mende tuju iri na enggendumu nandug-et lop nok tak pidnak (yang pertama) iri na ponggorosoloma, an kuliginggal-e, untugup worak mende empat ereya na ennggendumu-nen misik ene-ge o nggu nggal-et yosolar-e: ”Lobok yi-o” luk yosola, kuligi-o.

² Iri yosola, yik kaginggal-e, kuda wam loro misik kagi-o. Nde, kuda wam na ombolwak pem kore yidnak nap iri-ge san inggem tena, nde, at iri na wok tosolar-e, nagawan-nen pugwi topi misik wok tosola, at na mborosolar-e, ombol nggwe yidnak nap nggal ombol nggwe eyekluk mbirij-o.

³ Iri luk, Lomba Wam Marik iri-nen lop nok tak pugwi mende imbirik iri na (yang kedua) ponggorosola-nen kuliginggal-e, urugup worak mende imbirik (yang kedua) iri-nen-e: ”Lobok yi-o” luk yosola kuligi-o.

⁴ Iri yosola, kuda wam misik, usu mimi kan ngen nggal mbi lobok yij-o. Nde, kuda wam na ombolwak pem kore yidnak nap iri-ge nggweyak ma-nen ap lambuksa wolma naru, it na it-net wat kerak mbuwaklug-e, at iri rak purak amawi wok tij-o. Nde, at iri wok tosolar-e, yalawi nggulok mbi wok tij-o.

⁵ Iri luk, Lomba Wam Marik iri-nen lop nok tak pugwi mende imbirik iri (yang ketiga) ponggorosola-nen kuliginggal-e, urugup worak mende imbirik (yang ketiga) iri-nen-e: ”Lobok yi-o” luk yosola kuligi-o. Iri yosola, yik kaginggal-e, kuda wam usu miri mbi kagi-o. Nde, kuda wam na ombolwak pem kore yidnak nap iri na inggem-e angin ndak wurugwi mende mberen tena kagi-o.

⁶ Nde, an kuliginggal-e, ene misik ap enne nggoksa yugwi nggal untugup worak mende empat ereya na enggenggerak-nen yosola kuligi-o. Nde, ene iri-nen yosolar-e: ”Yabu misiget pem wanidnak onggo-ge gandum yimbe misiget pem waga wok undurag-o. Nde, yabu misiget pem wanidnak onggo-ge mbato yimbe kenan pem waga wok undurag-o. Alat nde, saitun amburu min anggut engen amburu min-e meya rak purak pug-o” luk yij-o.

⁷ Iri luk, Lomba Wam Marik iri-nen lop nok tak pugwi mende imbirik iri (yang keempat) ponggorosola-nen kuliginggal-e, urugup worak mende imbirik (yang keempat) iri-nen-e: ”Lobok yi-o” luk yosola kuligi-o.

⁸ Iri yosola, yik kaginggal-e, kuda wam usu meya iri kagi-o. Nde, kuda wam na ombolwak pem kore yidnak nap iri unu-ge Wat Yugwi Elem-o. Nde, at imbirig-e Wat Yugwi Elem-nen Tenagaidnak Wi-ge at langgal luk imbirik imbirik nij-o. Nde, nggweyak ma yu me woragwi nap erep menggesa (seperempat) undurak amawi-ge it ininggem posola, it-nen ondogolar-e, yalawi bem-nen na, nere bem-nen na, andi bandi mende bem-nen na, nggweyak ma woraso ndakngge isilepma worak pem-nen na undurak amawi irit it ininggem pij-o.

⁹ Iri luk, Lomba Wam Marik iri-nen lop nok tak pugwi mende imbirik iri (yang kelima) ponggorosola-nen yik kaginggal-e, Mbal Pem Nagawan-nen yidnak wene ap yak ondogolat nak woraidnak pem indidnak nap inndi-ge Mbal Pem Nagawan amanggim wam wosa pugwi sa indipma eneyagi-o.

¹⁰ It iri-nen enne ngguloksa yogolar-e: ”Kamawi Mondok Kwarat worak, lenak irit woraso, lud tak nak kwaroso Nagawan Indo wa-e! Nunggurik woraruk-nen nggweyak ma woragwi nap enpem wene mbatluk, nit nindiga onggo pugun-o?” luk yiga-o.

¹¹ It enambiktak wok ondosolar-e, sum loro wok indij-o. Wok unduruk, it yak ondosolar-e: ”Kit kindiga nggal kit kenggamirak yabu misiget erep wanugwi nap unduwakluk enmemet kir-e siyag-et kenpabok kwarogolat wolmer-o” luk yak indij-o.

¹² Iri luk, an-nen yik karok worasoma-ge, Lomba Wam Marik iri-nen lop nok tak pugwi mende imbirik (yang keenam) iri pinggirij-o. Ponggorosola-ge, o lele mondok kwiye worak yosolat, molengen na miri tup luk, kolpo woraga labuk yidnak nggal yosolat, waneya na mimi luk, mep tam yosolat,

¹³ obube-nen sil kasola, e ara engen awo me yetla mboso nggal, wonaru na mbal pem-nen nggweyak ma kona mbuwasolat,

¹⁴ mbal na engga linggisa yunggurugwi nggal lak yosolat, ndobo min yi terapmu (pulau) min oboksa-ge ondolma-nen nin sa lembera mborosola-ge,

¹⁵ nggweyak ma nap nagawan nagawan min ap yok nggok min san winde onowe min enarengge worak nap min nggweyak tena woragwi nap min ap erep oboksa min ndegel unpugwi nap min wisirik woragwi nap min it oboksa-ge kerep anggoma min ndobo bem kerep urumu min yurak kurak mbiga-o.

¹⁶ Yurak kurak mbogolat-nen ndobo min kerep min enne nggoksa yak togolar-e: ”Nagawan koreyak woraso ondoro ebem koreyak worasu erengen min Lomba Wam Marik na isilepma min inggem-nen mengga kura nonposolat, yemendak ninpi-o.

¹⁷ It insilepma mberak purak tarem nggulok na yawo wok yarik, it insilepma mberak pogola, ap misiger-o luk-nen it entare bem wolmomtag-e meya-o” luk yiga-o.