Biblia Todo Logo
Bìoball air-loidhne

- Sanasan -

NAM PARA WENE 5 - Nanduk Ngget Tul Pidnak Wene


Engga min Lomba Wam Marik min 5:1-14

1 Iri luk, an-nen yik kaginggal-e, nagawan koreyak woraso ondoro iri na ebem koreyak worasu nap na inggi kigit nggwe-nen engga mbi tena worala kagi-o. Nde, engga iri abage-ge ket mbet linggisa yunggurik nggal-o. Nde, engga iri na bem-e ponok ponok mondok mbarak worala, lop nok tak pugwi mende tuju iri na-nen engga na panggarak pidnag-o.

2 Iri luk, an-nen yik kaginggal-e, arong worak aid nap misik kagi-o. At iri-nen ene nggoksa yosolar-e: ”Lop nak tak pugwi mende na panggara keya buruk, engga yu wusururak nap ndag-e ta nggal-o?” luk yij-o.

3 Alat nde, mbal pem-nen na, nggweyak pem-nen na, nggweyak urugwe nggwe-nen na, engga iri wusutluk kudtak nap ndak mbi mondok worali bug-o.

4 Nde, engga iri na wusutluk, arem kudtak nap ndak mbi mondok lak ala karug-e, yip kondok lud yigi-o.

5 Yip tosolakmu, enne kulugwi nap ereya na ennggendumu ap misik-nen an yak norosolar-e: ”Yip tusu-ge meyog-o. Yu ki-o! Enlem Yewura-nen idnak Singa ndakngge, Ndaud-nen wigarak ap nggulok iri-ge at-nen-e amawi luk ombol nggwe yarik me, at-nen-e lop nok tak pugwi mende tuju iri-nen panggarak pidnak na pinggirik puruk, engga iri na wusururag-e ndak-nen yusu-o” luk yak nirij-o.

6 Iri yosola, an yik kaginggal-e, nagawan koreyak woraso ondoro iri na bem enggendumu-ge Lomba Wam Marik mendak kagi-o. Nde, mendak worala, untugup worak mende empat ereya na min enne kulugwi nap ereya na min-nen at iri na lop lop worak kagi-o. Nde, Lomba Wam Marik iri-ge abu wiridnak nggal irit kagi-o. Nde, at iri anggul ambo na tuju, erengen na tuju-nen yusu-o. Nde, anggul ambo tuju min erengen tuju min iri-ge Mbal Pem Nagawan indi tuju yi wi ndi wi oboksa wirik pidnak indi iri-net yusu-o.

7 Iri luk, Lomba Wam Marik iri na mborosolar-e, engga nagawan koreyak woraso ondoro ebem koreyak worasu nap inggi kigit nggwe-nen tena worasu na wanij-o.

8 At-nen engga iri wanosola ereya na-net untugup worak mende empat ereya na min enne kulugwi nap dua pulu empat (24) ereya na min-e Lomba Wam Marik na eralu tud yiga-o. It enambik tak kejapi poba min emas-nen konidnak yimbe arem emben konak mende yarak na min tena woraiga-o. Nde, emben konak mende iri-ge Mbal Pem Nagawan ilirak-nen tepan yugwi iri nar-o.

9 It-nen ndawi ngget misik yogolar-e: ”Kar-e mondok kirikma, wat yigen iri bem-nen-e Mbal Pem Nagawan amanggim ap enlem ndomok oboksa min ap enne ndomok oboksa min ab-e ap oboksa min ap enlem oboksa min onnggo pigen pem-e kat-nen-e engga na wanuruk, lop nok tak pugwi mende, iri na punggururag-e kabam-net yusu-o.

10 Nde, it onnggo pigen nap iri-nen Nembal Pem Nagawan eyabu wanogolat, nggweyak ma yu me tena woragolat makluk, kat-nen tepan ombo rak onposolar-e, ap enlem misiget tak inpigen-o” luk yiga-o.

11 Iri luk, an-nen tuguruk yik kaginggal-e, aid nap kwarat, mondok wonarurak puk nggal iri na enne anggu kuligi-o. It iri na-ge nagawan koreyak woraso ondoro na min untugup worak mende empat ereya na min enne kulugwi nap ereya na min lop lop indigarik, mendak woragolar-e,

12 enne nggoksa ndawi yogolar-e: ”Waridnak Lomba Wam Marik iri-ge o tena buruk wolmomtak amawi min yi mende ndi mende ombo yurak min inndi nggat nggat elem min amawi elem min at ambigit tebe yurak min at nak kek tak uburak min at erembel wanurak min iri mende oboksa at nak-nen wanurag-e abam-net yusu-o!” luk yiga-o.

13 Iri luk, an kuliginggal-e, untugup worak mende aid arem woragwi-nen na, nggweyak ma woragwi-nen na, nggweyak urugwe nggwe woragwi-nen na, yi koma arem woragwi-nen na iri oboksa-nen ndawi yogolar-e: ”Nagawan koreyak woraso ondoro ebem koreyak worasu na min Lomba Wam Marik na min nak entembel wanogolat, it enambigit nak tebe yogolat, o tena buruk woragolat pem irit woralik nalik wolmag-o!” luk yiga-o.

14 Iri yogola-ge, untugup worak mende empat ereya na-nen yogolar-e: ”Amin-o!” luk yogola-ge, enne kulugwi nap ereya na-ge tud luk, it entembel waniga-o.

Lean sinn:



Sanasan