NAM PARA WENE 4 - Nanduk Ngget Tul Pidnak Wene

Aid arem-nen erembel wanili wene 4:1-11

¹ Iri rak puruk, an-nen nabi ngganggo nggal tuguruk misik kasolar-e, aid arem-nen tu misik kuwarak kagi-o. Karug-e, ene posid poba ene nggal wene nanduk yak nirid iri na ene-t kuligi-o. Nde, ene iri-nen yak norosolar-e: ”Abok-nen kwat ma mende mirik kebeyek-nen yu me luwasug-o” luk yak nirij-o.

² Ereya na-net Konak Indi narem nggwij-o. Nggosola-ge, yik kaginggal-e, aid arem iri me nagawan koreyak woraso ondoro mbi kagi-o. Nde, iri na bem-e ap mbi koreyak kagi-o.

³ At iri imbiriwak amare-ge kerep baiduri pandan (amare-ge yabeya ndagum engen (kuning) nggal) min kerep delima (amare-ge mimi (merah tua) nggal) min amare nggal-o. Nde, nagawan koreyak woraso ondoro iri eralu-ge yelepma misik amare-ge samrud (amare-ge kinggambarak (hijau) nggal) amare nggal waringgik woragaij-o.

⁴ Nde, nagawan koreyak woraso ondoro iri eralu inggi inggi-ge nagawan-nen koreyak woragwi ondoro dua pulu empat (24) iri na bem-e ap enne kulugwi yok nggok dua pulu empat (24) unsum-e loro yirik, enanggul pem-e emas-nen konidnak nagawan-nen yurugwi topi pago, koreyak eneyagi-o.

⁵ Nagawan koreyak woraso ondoro iri na-nen-e o pinel yebek kasolat, o nggu pang yosolat, nde, nagawan koreyak woraso ondoro urugwe nggwe-ge tal tuju iri pago kagi-o. Nde, tal iri-ge Mbal Pem Nagawan indi tuju iri-net yili-o.

⁶ Nde, nagawan koreyak woraso ondoro iri na urugwe nggwe-ge yi koma erare papalo nggal kopkap lak, papalo kristal erare nggal-o. Nde, nagawan koreyak woraso ondoro iri na urugwe ombol-e untugup worak mende unlugwe onmbol enlengen nak-nen kobong yidnak enpe empat irit woraiga-o.

⁷ Urugup worak mende nandug-et na-ge singa ndak ngge nggal-o. Nde, urugup worak mende imbirik na-ge sapi wam kusi nggal-o. Nde, urugup worak mende imbirik na-ge erare-ge ap entare nggal-o. Nde, urugup worak mende imbirig-e towe ud pubu mborosolat nggal-o.

⁸ Untugup worak mende empat ereya-ge enambik tak insiyamu enam worag-o. Nde, unlugwe nggwe onmbol nggwe-ge enlengen nak kobong yidnag-o. It iri-nen-e lengge-nen kubu-nen ndawi kundugu nak yogolar-e: ”At nak kek tag-o. At nak kek tag-o. Amawi Mondok Kwarat Nagawan Indo Mbal Pem Nagawan at nak kek tag-o. Nanduk na woraso, yawo na worasu, abok na wolma-nen yusu-o” luk yogolat woragwi-o.

⁹ Nde, it untugup worak mende empat ereya-nen-e at nagawan koreyak woraso ondoro ebem koreyak worasu nap, urug-et pem woralik nalik wolma nap na-ge ndawi bem erembel wanogolat, kek tak pogolat, wa yak togolat yogola-ge,

¹⁰ it enne kulugwi nap dua pulu empat (24) iri-nen-e nagawan koreyak woraso ondoro ebem koreyak worasu na eralu tud luk, urug-et pem woralik nalik wolma nap na erembel wanugwi-o. Iri luk, ontopi nagawan-nen pugwi pago ereba na-ge at koreyak woraso ondoro urugwe nggwe yonggora mbo bogolat-nen yogolar-e:

¹¹ ”Nagawan Indo Nembal Pem Nagawan wa-e! Yi mende ndi mende oboksa kat-nen ndak worak pigenma-o. Kat kindi-n pidnak pem nak yi mende ndi mende ndak wat yarik, uruk worasu bem-e kerembel wanogotlat kek tak kobogolat yurak ndak kamawi worag-e kat nag-o” luk yugwi-o.