NAM PARA WENE 2 - Nanduk Ngget Tul Pidnak Wene

Epesus nap yak indid wene 2:1-7

¹ ”Epesus woragwi lambuk tak inpidnak nap-nen idnak aid nap amanggim-e yu nggal mbari-o: Nde, wene yu-ge at inggi kigit nggwe wonaru tuju na tenaga, emas-nen konidnak tal tuju na enggenggerak waring kasu nap iri-nen yidnak wene-o.

² Kit-nen kwarugwi min kit-nen kenmawi min yabu wanugwi min kit-nen mamak puruk woragwi min iri-ge an-e naru-o. Kit-nen meya yugwi nap kinsili rak inpili min, ap-nen yogolar-e: ’Nir-e wirik ninpidnak nap-nen yili-o’ luk yogola-t nde, kit-nen lombot unpuruk, ennesiget yugwi nab-er-o luk yenggerak inpili min iri na an-e naru-o.

³ Kir-e an nunu bem ala andi bandi kagolar-et nde, mamak puruk woragolat, kinndi tugup lak, uwi yak worali-o.

⁴ Worali-t nde, an kit kenpem nindi angin nggal worasu-ge yu-o: Kit-nen nanduk an nabuwa kaigep nggal kali buk iri perak kenpem nindi angin kasu-o.

⁵ ’An-e abu meya luk yoboksa mbigi kagi’ luk perarug-e, kit meya kwatli iri keya buruk, kondok yer-o. Kondok luk, nanduk kwarogolat woraigep nggal kwarer-o. Kit nde kondok yigit lak ala-ge, an lobok yimindig-e, kit kental iri-ge ondolma-nen lesa wanimin-o.

⁶ Alat nde, kit-nen konak nggal kwatli misig-e yu-o: Nikolaus ene wanugwi nap-nen kwarugwi iri-ge an-nen nisili kaso iri na nggal-et kit-nen na kinsili kali-o.

⁷ Ta-nen nde eyanggo worak ala-ge, Konak Indi-nen lambuk tak inpidnak nap yak undusu wene yu kuluwag-o! Amawi luk ombol nggwe yuwa nab-e, unluk nak wolmomtak e Mbal Pem Nagawan Eyapmu-nen mbiridnak engen iri na mak timin-o.”

Simirina nap yak indid wene 2:8-11

⁸ ”Simirina woragwi lambuk tak inpidnak nap-nen idnak aid nap amanggim-e yu nggal mbari-o: Nde, wene yu-ge at tel koroso min min woroksiyem min, wat lug-et nde, tuguruk uruk yidnak nap iri na-nen yidnak wene-o.

⁹ Kit kenpem anggun panggun mbusu mende min kit kinsilobulo lak worali iri-ge an-e naru-o. Alat nde, kir-e kinsilobulo worak-net yili-o! Ndemeret Yawuri nab-e lag-et nde, ’Nir-e Yawuri nap-nen yili-o’ yili nap-nen konpok pili na an-e narur-o. Nde, it iri-ge Sere ilirak-net yili-o.

¹⁰ Kit andi bandi rak kunpurak yanem-et kenpem mbuma mende iri-ge kir-e kwiye kudtak pug-o. Kenaru wolmer-o. Kinndi ngaruwakluk, kit kennggendumu ap ereb-e Sere-nen o kubu me kinpil ngguwa-o. Kinpil ngguwama, andi bandi kagolat sepulu tarem woragub-o. Nde, kinndi angin tubu yigep na-ge keya bigit lak, tena iri-net wat yurag-o. Iri yugup pem-e kit-nen ombol nggwe yugup onggo-ge kunlug-et wolmomtak wirik wok kindimin-o.

¹¹ Ta-nen nde eyanggo worak ala-ge, Konak Indi-nen lambuk tak inpidnak nap yak undusu wene yu kuluwag-o! Amawi luk ombol nggwe yuwa nab-e, mberen pem tak posolat wat momtak elem iri-nen-e andi bandi rak unpuwa bug-o.”

Peregamus nap yak indid wene 2:12-17

¹² ”Peregamus woragwi lambuk tak inpidnak nap-nen idnak aid nap amanggim-e yu nggal mbari-o: Nde, wene yu-ge yalawi anggat ponok ponok worak tena worasu nap-nen yidnak wene-o.

¹³ Kit worali sa iri-ge an-e naru-o. Sere-nen tena woraso sa iri me-t worali-t nde, kir-e an puksa tena nuburuk worali-o. An-nen yidnak wene mot mot nak konggoroso nap Antipas na-ge kit kennggendumu-nen Sere woraso sa iri me-nen wiriga-t nde, kir-e kinndi an nebem angin tubu yidnag-e keya bigit lag-o.

¹⁴ Alat nde, kit-nen kwatli erep ereba perak nde nisili-o. Iri-ge: Kit kennggenggerak ap ereb-e Mbileam-nen Isarael nap enare posolar-e, kugiwak amanggim pidnak nunggwi mende nonggolat, mbabi yogolat makluk, Mbalak mirik pid wene na langgal luk mbitli-o.

¹⁵ Iri nggal-et kit kennggenggerag-e ap erep-nen-e Nikolaus ene wanugwi nap-nen yidnak wene owak na langgal luk mbitli-o.

¹⁶ Iri bem-e kit meya yidnak iri keya buruk, kondok yer-o! Nde, kit nde kondok yigit lak ala-ge, an yanem lobok yosolar-e, yalawi nemendam kenanggo yu bem it iri-ge mbal inpimin-o.

¹⁷ Ta-nen nde eyanggo worak ala-ge, Konak Indi-nen lambuk tak inpidnak nap yak undusu wene yu kuluwag-o! Amawi luk ombol nggwe yuwa nab-e, an-nen-e kura woraidnak no mende mburu (manna) na mak timin-o. Iri luk, kerep loro misik wok indimin-o. Nde, kerep loro iri na bem-e unu ngget yarak mbarag-o. Nde, unu iri-ge ap nin-nen enaru buk, wanuwa nap enarik nak-nen enaru ma-o.”

Tiatira nap yak indid wene 2:18-29

¹⁸ ”Tiatira woragwi lambuk tak inpidnak nap-nen idnak aid nap amanggim-e yu nggal mbari-o: Nde, wene yu-ge erengen-e kanduk nggal kere kererak, ijog-e kerep wiril nggal Mbal Pem Nagawan Ambara-nen yidnak wene-o.

¹⁹ Kit-nen kwatli iri-ge an-e pidsa naru-o. Kit-nen enabuwa kagwi min mot mot nak kwarugwi min kit-nen yabu wanili min mamak puruk worali min pidsa naru-o. Nandug-e yabu marig-et nggal wanigeb-et nde, yawo-ge kwarat wanili iri-ge an-e naru-o.

²⁰ Kwe Isebel iri-nen yosolar-e: ’An-e Mbal Pem Nagawan-nen nibil lobok yidnak-nen yusu-o’ yosolar-e, an ndegel nubugwi nap enmberam lasolar-e, mbabi kwarurak min kugiwak amanggim pidnak nunggwi mende norak min mul ondoso kwe Isebel na kinndi wok tili iri perak an-e nisili-o.

²¹ Kwe iri-ge at meya kwaroso iri keya buruk, kondok makluk, mamak puruk woragi-t nde, ar-e at-nen mbabi kwaroso iri keya burak imbit ala karuk,

²² kenaru wolmer-o. Kwe iri-ge an-nen lel kamu, nene yoso sa iri me kugi worak wolma-o. Nde, it at imin mbabi yugwi nap na at imin totno iri me mondok andi bandi kujwa-o. It-nen nde mbabi kwarugwi iri keya buruk, kondok yigit lak yogola-ge, yanem-et lel eneyamin-o.

²³ Kwe iri ene wanugwi nap na indimin-o. Indimin iri-ge, lambuk tak inpidnak nap oboksa-nen enaru yogolar-e, ap-nen yebet kagwi min ap inndi min mbenaroso-ge Mbal Pem Nagawan-net yusu-o luk enaru makluk, indimin-o. An-nen onggo posolar-e, kit-nen kwaridnak ndak ndag-et onggo wok kindimin-o.

²⁴ Alat nde, kit Tiatira woragwi nap erep-nen-e mul ondoso wene meya iri na wanigit lak yogolat, Sere wene owak iri na kenaru yigit lak yigeb-o. Nde, iri yigep pem-e, kit angin tak kunpurak mende kenpem pimin pug-o.

²⁵ Alat nde, kit-nen wanigep mende iri-ge puksa tena worakmu, an lobok eyeg-o.

^26-27 An nindi-n pidnak nak kwat tenak worakmu-net woroksiyem wok ma nap iri-ge amawi luk ombol nggwe yuwa nap-nen yili-o. Nde, an-nen it iri wok ondosolar-e, an Neid-nen wok niridnak amawi erep yu-t it wok undumu-ge, ap enlem oboksa posid wangun pem-nen tena unpuruk wolmomtak amawi wok undumu-ge, posid wangun iri-nen-e ap enlem oboksa-ge nggweyak yimbe ndamarak pugwi nggal ndamarak unpuwa-o.

²⁸ O nda nda wonaru iri na min-et wok indimin-o.

²⁹ Ta-nen nde eyanggo worak ala-ge, Konak Indi-nen lambuk tak inpidnak nap yak undusu wene yu kuluwag-o!”