NAM PARA WENE 16 - Nanduk Ngget Tul Pidnak Wene

Yimbe Mbal Pem Nagawan isilepma kenanggo wene 16:1-21

¹ Iri luk, an kuliginggal-e, ene nggulok misik Mbal Pem Nagawan ama-nen aid nap tuju ereya na yak ondosolar-e: ”Kir-e mburugupndik, Mbal Pem Nagawan isilepma kenanggo yimbe tuju ereya nggweyak ma kilik per-o!” luk yak indij-o.

² Yak ondosoloma, aid nap misik (yang pertama) iri na mberarig-e, at idmbe-ge nggweyak ma kilik posola-ge, ap ndakngge isilepma worak iri na-nen idnak yenggerak purak mende enpem worak nap min at abage ndak worak iri na erembel wanugwi nap min enpem-e emben worak kimbi kwiye worak irit enpem yij-o.

³ Iri luk, aid nap misik (yang kedua) iri-nen-e at idmbe kenanggo na yi koma ombolwak pem kilik pidnggal-e, yi koma iri-ge ap indidnak eneyabi nggal yabi tam yosolar-e, yi koma arem woraso urugup worak mende oboksa wat yij-o.

⁴ Iri luk, aid nap misik (yang ketiga) iri-nen-e at idmbe kenanggo na yi ombolwak pem min yi ulusu min ebem kilik posola-ge, yi pidsa yabi worak yij-o.

⁵ Iri yosola, an kuliginggal-e, yi tena wolmomtak amawi wok tidnak aid nap iri-nen yosolar-e: ”Nanduk na woraso, yawo na worasu Mondok Lenak Woraso Mbal Pem Nagawan wa-e. Kat-nen angin worak mende mberak pigen iri-ge mot mor-et kwarigen-o!

⁶ It iri-nen-e Mbal Pem Nagawan ilirak min Mbal Pem Nagawan ene lomboksa yugwi nap min eneyabi wirik pidnak me, yawo it-nen nujwakluk, kat-nen yabi mak indigen iri-ge it kwat unpurak ndag-et kwat inpigen-o!” luk yosola, kuligi-o.

⁷ Iri luk, an kuliginggal-e, ene misik Mbal Pem Nagawan amanggim wam wosa pugwi sa iri me-nen yosolar-e: ”Kamawi Mondok Kwarat worak Nagawan Indo Mbal Pem Nagawan wa-e. Kat-nen mbarusu wene-ge ndemeret mot mor-et mbarusu-o!” luk yosola, kuligi-o.

⁸ Iri luk, aid nap misik (yang keempat) iri-nen-e at idmbe kenanggo na molengen pem kilik posola-ge, molengen embem kwiye worak-nen ap nok unpurak ndak tak pij-o.

⁹ Molengen embem-nen ap nok onposola-ge, it-nen-e andi bandi mende iri amawi tena woraso Mbal Pem Nagawan na unu-ge imbiri lamut tak piga-o. Alat nde, it-nen meya yidnak keya buruk, kondok yigit lak yogolar-e, Mbal Pem Nagawan kek tak woraso iri erembel wanurak na insili yiga-o.

¹⁰ Iri luk, aid nap misik (yang kelima) iri-nen-e at idmbe kenanggo na ndakngge isilepma worak iri-nen idnak koreyak woraso ondoro na bem kilik pidnggal-e, ndakngge isilepma worak iri-nen tenagaidnak wi oboksa-ge ndamuk yij-o. Iri yosola-ge, ap-nen-e andi bandi kwarat kagolar-e, enambik eneyak-nen enma yum nggatliga-o.

¹¹ Nde, ir-e kimbi enpem yosolat, andi bandi kagolat me, Mbal Pem Nagawan aid arem woraso na imbiri lamut tak piga-o. Alat nde, it-nen meya kwarugwi iri na keya buruk, kondok yurag-e meya-o.

¹² Iri luk, aid nap misik (yang keenam) iri-nen-e at idmbe kenanggo na yi nggulok Eparat na ombolwak pem kilik posola-ge, yi iri na eberek luk, ndereng yosola-ge, mo luwaso nggwe woragwi nagawan ereba na lobok yuwakluk enmanggim tu yabij-o.

¹³ Iri luk, yik kaginggal-e, waro na emende nggwe-nen na, ndakngge isilepma worak na emende nggwe-nen na, enesiget Mbal Pem Nagawan ene lomboksa yoso nap na emende nggwe-nen na mondok kugi meya kenan abage-ge mangge abage nggal iri wasola kagi-o.

¹⁴ Kugi iri na-ge kwiye worak mende kwarugwi kugi inndi-nen yili-o. It kenan iri na-ge yi wi ndi wi oboksa tena woragwi nagawan endam mbirigarig-e, Amawi Mondok Kwarat worak Mbal Pem Nagawan-nen idnak tarem nggulok iri tarem-nen wim nggurak pem ndok worak inpiga-o.

¹⁵ ”Kwara koler-o. An-e yariya wanugwi nap nggal lobok yimin-o. Nde, ap inmbiri bem sum yirigit lak ngenwa waring kasolat inggiri kamin naru, kwara uruk woralat, at usum na kwara yirik wolma nab-e alen kujwag-o!”

¹⁶ Iri luk, kugi inndi ereya na-nen-e nggweyak ma nagawan ereba na-ge ndok wosa o Iberani wene bem Aramageron yugwi iri me ndok worak inpij-o.

¹⁷ Iri luk, aid nap misik (yang ketuju) iri-nen-e at idmbe kenanggo na teram kilik posola-ge, ene nggulok misik Mbal Pem Nagawan ama woraso nagawan koreyak woraso sa iri me-nen yosolar-e: ”Abu ndak yij-o!” luk yij-o.

¹⁸ Iri yosola-ge, obinel yebek yebek yosolat, o nggu lunggu mbosolat, o lele kwiye worak irit yij-o. Nde, o lele iri nggal-e ap ndak worak enpamu, nggweyak ma yu woragola-ge, o lele kwiye worak iri nggal mbi mondok kagwi bug-o.

¹⁹ Nde, o siri nggulok iri na-ge ngara kenan kwat yosolat, enlem nin nap-nen tenagaidnak unuwi siri oboksa ndamara abapno yij-o. Iri luk, Mbal Pem Nagawan-nen o Mbabel nggulok iri na indi yebet karuk, anggut engen amburu at idmbe arem Mbal Pem Nagawan isilepma kenanggo kobong tak na mak tij-o.

²⁰ O yi terapmu oboksa lak yosolat, ndobo ndobo oboksa na lak yij-o.

²¹ Talme engen nggulok, ariktak angin-e 50 kilo irit mbal pem-nen mbuwasolat, ap yemen inpij-o. Iri yosola-ge, talme engen iri-nen yemen onposola karuk, ap-nen-e Mbal Pem Nagawan imbiri lamut tak ibiga-o. Iri yiga iri-ge andi bandi kwiye worak kagolat-nen yiga-o.