MIKA 7 - Nanduk Ngget Tul Pidnak Wene

Mot mot kwarugwi elem iri na Isarael nap-nen keya bidnak wene 7:1-7

¹ Engen abu mijo mburuk, lak yosoma-t nde, an-e nere bem engen mbaril-o luk mbutlug-e, engen-e abu mbaridnak kagit anggut engen min ara engen min konak ereba na-ge oboksa mbarosoma ari bem-e lak kagit mburugwi iri na nggal kwarusu yu-ge o! Mondok nabuwa-o!

² Nde, mot mot kwarugwi nab-e it woragwi sa-nen mondok lak yili-o. Nde, tugup lak Mbal Pem Nagawan-nen yidnak yidnak kwarugwi nab-e mondok misik mbi eneyagup pug-o. Nde, ap ondomoktak-nen-e ap wururak pem ondoro terak mbi wok yosola-nen unduwom-o luk yik karok worali-o. Ap ondomoktak-nen ennggamirak enmanggim sabu logo pil lobok yigarik worali-o.

³ It oboksa-nen meya kwarurak pem-e mondok kwara enaru yidnak worali-o. Yabu winde min ap enpem wene mbenarugwi nap min-e meya lugud tak kwarurak pem uang nggi yili-o. Ap oboksa-nen enne kulugwi nap ereba na-nen-e it inndi-nen pidnak iri na-t amawi rak pogolat lambuksa wene mbatli-o.

⁴ Nde, it ennggendumu it-nen mondok konak, mot mot nak kwarugwi nap ereba na min-et mondok egere isile worak, ebe lak mende ereba nggal-nen yusu-o. Nde, Mbal Pem Nagawan-nen at ilirak ”angin worak kenpem pimin-o” luk urul at ene lomboksa yugwi nap yak indid iri na ndak tak posolat, angin worak enpem mberak purak tarem abu wok yij-o. Nde, yawo-ge it ennggendumu nari wari mbili-o.

⁵ Kat keralu woragwi nap ereba na-nen yidnak wene-ge ndemerer-o luk yebet kudtak pug-o. Kat kanggam iri na ebem na kindi wat tak puruk wolmomtak pug-o. Kat-nen wene yugun iri-ge kambik kogwe iri na imbiri bem-et nde, kat-nen wene yosolar-e, kindi kwara yebet karuk-nen yurag-o.

⁶ Yawo ya worali-ge enpe misiger-et nde, sirid mbarep parep worali-o. Iri yogolar-e, ambara-nen-e eid posorosolat, ara-nen-e ija imin sirid mbarosolat, enmbararak onkwe-nen-e ununtak iniya min yuk puk mbogolat kwarogolat worali-o.

⁷ Alat nde, nit-nen tepan yili-ge Nenmbal Pem Nagawan-nen nenne kolosolat, nimiri yuwa-o luk ninndi-ge Nagawan Indo ebem nak wat tak puruk, yik karok worali-o.

Nagawan Indo-nen ninmiri yuwa-o luk yidnak wene 7:8-13

⁸ Nir-e wosa mbige-t nde, mondok tugurug-et men-et mul me, nit yigisa keya ninpidnak iri na bem nit nunuwim nap-nen-e enalen yurag-e meya-o. Yawo na ndamuk arem worali-t nde, Nagawan Indo-nen-e yaya rak nunpuwa-o.

⁹ Nir-e Nagawan Indo imin meya kwarige bem at-nen idnak isilepma-ge mondok nenpem-et mbuwag-o. Alat nde, ar-e yanem-et nit nenambigit yosolat, mot mot kwarugwi elem wok nondosolat, at-nen lesa wok nunpuruk, yaya bem ninpil mburuwa-o. Nit nondomok-nen na at-net ninmiri yosola, kul-o.

¹⁰ Nanduk nit nunuwim nap-nen pesel nonpogolat-nen yogolar-e: ”Kit-nen idnak Nagawan Indo, Kenmbal Pem Nagawan iri na-ge ngge me worasu-o?” luk yiga-t nde, yawo Nagawan Indo-nen nit nenmanggim kwarusu ereba na karug-e, ir-e innggiri yuwa-o. Nde, nit nunuwim nab-e urugwe nggwe rak unpuruk, tulama miril yumndugwi nggal unuwok tebere rak onpogolat, nenlengen-nen kul-o.

¹¹ Yerusalem woragwi nap wa-e. Kit kunuwi siri kerep pak leget ereba na tuguruk wururak tarem-e abu panggo yij-o. Iri tarem-e kit-nen tenagidnak wi-ge nggok tak puwa-o.

¹² Iri tarem-e kat-nen idnak nab-e nin nggwe nan nggwe-nen lobok yuwa-o. Iri yogolar-e, mo luwaso (timur) ambigit Asiut nggwe-nen na lobog-et yuwa-o. Abare ena (selatan ambigit Mesira nggwe-nen na lobog-et yuwa-o. Yi Eperat arem nggwe woragwi-nen na lobog-et yuwa-o. Yi koma eyak ponok nggwe woragwi min ndobo worak nggwe erepma woragwi min-nen na lobog-et yuwa-o.

¹³ Alat nde, o nggweyak yu perak ebem woragwi nap-nen meya kwat tenak woragwi ereba na-nen ndowaga umbuk ma-o.

Nagawan Indo-nen Isarael nap enabuwa kujwakluk emengen mbaridnak wene 7:14-20

¹⁴ Nagawan Indo wa-e. Kat-nen len inpigen kilirag-e kwara ndegel onposolat wolmin-o. It iri-ge nggweyak amburu worak nggwe yobok tak ma walma ereba worali-o. Nde, it iri-ge nanduk-nen kwariga nggal Mbasan min Nggileat min karu me tusuangge ndumu ereba me-nen nunggwi mende nonggolat wolmakluk keya inpi-o.

¹⁵ Nagawan Indo wa-e. Nanduk kat-nen Mesira-nen lesa wok nunpuruk lobok yosolat kwiye worak kwat ninpigen iri na nggal kwiye worak kwat ninpi-o.

¹⁶ Ap enlem oboksa-nen kat-nen kwiye worak kwat nunpugun iri na karug-e, it enmawi-ge ebe lak mende nde karug-e, it iri-ge innggiri nde yuwa-o. Iri yogolar-e, it-nen kwarurak lak ala karuk, wene kulurak meya yogolat, wene yurak na meya yogolat kwaruwa-o.

¹⁷ It iri-ge waro-nen mboroso nggal nggweyak nggwe yuguluk mburuwa-o. Ir-e enpem yot kot mbogola, pak arem-nen lobok yogolar-e, Nagawan Indo Nenmbal Pem Nagawan kat keram-et lobok yuwa-o.

¹⁸ Nagawan Indo wa-e. Mbal Pem Nagawan kat nggal misik mbi worasu bug-o. Kat-nen len inpigen kilirak minggirik keya inpidnak ereba na-nen meya kwarugwi-ge kamberam tak poso-o. Kat-nen-e abu abu kisilepma yoso bug-o. Alat nde, kat-nen unpud kaso-ge pok tak poso buk iri na mirik onposolat-nen kwaroso-o.

¹⁹ Kat-nen-e tuguruk nunpud karuk, nit meya yidnak kamberam tak pugun-o. Nit-nen meya yugwi-ge kat-nen kuwok-nen lul wosa, lembera yi koma erabun arem ereba mberak pugun-o!

²⁰ Nanduk kwat nunpurak urul nonmborak yak indigen iri na ndak ndag-et kat-nen tugup lak kwat onposo min kat-nen kundugu enabuwa kaso min iri na-ge kat kilirak Abarakam min Yakup min-nen wigarak irit mirik nunpugun-o.