MIKA 5 - Nanduk Ngget Tul Pidnak Wene

Mbal Pem Nagawan-nen Mbetleyem nap amawi worak misik nam ma-o luk urul pidnak wene 5:1-5a

¹ Nagawan Indo-nen yosolar-e: ”Mbetleyem Eperata wa-e. Kar-e Yewura nggweyak pem-nen o siri kunu lak, marig-et nde, kat kebem-nen Isarael tena unpuruk wolmomtak nagawan amawi worak misik mendak pimin-o. Nde, at iri-ge mondok o nanduk ereba na-net woraso-nen yusu-o” luk yij-o.

² Iri kwarak me, Nagawan Indo-nen-e at ilirag-e keya nak unpuwama, it unuwim nap-nen tebel unpuruk irit worakmu, amawi worak nap iri na ija kwat mag-o luk lenak pidnak iri na-nen-e amawi worak nap iri na ndet ubuwama, at elem nap mbo inpidnak sa worali ereba na-ge it enlem ereba na inmin tuguruk misiget tak unpuwa-o.

³ Nde, amawi worak nap iri na lobok yosolar-e, at amawi bem-nen at nap tena onposolar-e, Nagawan Indo Embal Pem Nagawan-nen idnak amawi bem-net tena unpuruk wolma-o. Elem nap iri na tena unpuruk woralar-e, ir-e mondok kona yamuksa woragola karuk, yi wi ndi wi woragwi nap oboksa-nen yogolar-e: ”At iri-ge wir-o!” luk, kek tak pogolat wolma-o.

^4-5a Nde, at-nen-e yamuksa woragwi elem wok unduwa-o.

Wisirik onposolat, angin worak mende enpem posolat yurak wene 5:5b-14

^5b Nde, Asiut nap-nen nit nunuwi bem kore yogolat, nit-nen nenmawi yugwi pak ereba na mijatluk ngguwagola-ge, inmin wim mbaruwakluk nit nenanggul pem enmawi worak ereba na yak undul-o. Iri yogola-ge, nit nenanggul pem ap yok nggok ereba na-nen Asiut nap ereba na-ge tup san pem-nen urugwe nggwe rak unpuwa-o. Urugwe nggwe rak unpurug-e, it ininggiyapma-nen ninmiri yuwa-o.

⁶ Nde, Isarael nap erep minggirik ap enlem nin nap ennggendumu wolma ereba-ge Nagawan Indo-nen yidnak enpem yamuk tak poso lilangen nggal, yagidnak mende piri rak poso talme nggal irit ennggendumu wolma-o. Nde, Isarael nap ereba-ge ki nap enpem inndi wat tak wolma bug-o. Nagawan Indo ebem-et inndi wat tak wolma-o.

⁷ Nde, Isarael nap enlem nin nap ennggendumu wolma ereba na-ge singa ndakngge wolma woraso mena enggendumu woraso nggal woragolat, lomba oro tusuangge taroso sa woraso nggal woragolat kwaruwa-o. Nde, singa lomba oro ereba na enggendumu nggosolar-e, lomba ereba na wutluk, lebena nasolat worala, ap-nen mbi emndam mengga keya burag-e meya-o.

⁸ Nde, Isarael nap-nen-e it unuwim nab-e urugwe nggwe rak unpuruk, it oboksa mondok yigisa lak tak unpuwa-o.

⁹ Nagawan Indo-nen yosolar-e: ”Iri tarem-e kit-nen ebem kore luk wim pugwi kura wam oboksa lak tak posolat, kit-nen wim pugwi konggweyak koma min mondok meya rak pimin-o.

¹⁰ Kit kunuwi siri kerep-nen wiridnak ereba na-ge yigisa lak tak pimin-o. Kit-nen kenmawi yugwi pak ereba na min-et langgona keya bimin-o.

¹¹ Kit kunkugwiwag-e mondok lak tak posolat, tu mbarugwi nap na ndegera nin sa wirik onposolat kwarimin-o.

¹² Kit-nen yi mende ndi mende ut memera ndak wiridnak mende min kit-nen erembel wanugwi kerep mendaidnak min oboksa yigisa lak tak pumu, kit-nen-e kininggi-nen ndak wiridnak erembel wanugwi urugup lak ereba na-ge erembel wanugup pug-o.

¹³ Kugwiwak Asera ut mimirik kit woragwi sa worasu ereba na-ge an-nen langgona mbud tak pimin-o. Kit kunuwi siri kerep-nen wiridnak ereba min-et an-nen yigisa lak tak pimin-o.

¹⁴ An-nen yidnak yidnak kwarugwi buk nap enlem oboksa-nen meya kwarugwi ereba na-ge nisilepma kwiye worak pem-net onggo pimin-o” luk yij-o.