MIKA 4 - Nanduk Ngget Tul Pidnak Wene

Nagawan Indo-nen yamuk tak pem-et o tena wolmomtak wene 4:1-5

¹ Nde, abok woragolar-e, ndobo Nagawan Indo uwi worak worasu iri na-ge munduruk abu-t lujwarik, ndobo amun min ndobo yok nggok ereba na-ge tebe rak puruk, tugup lak nggasera menluk keya buwa-o. Iri yuwama, yi nap ndi nap oboksa iri me nggubunuruk nggwid nggwid mborogolat wolma-o.

² It oboksa-nen yogolar-e: ”Isarael Embal Pem Nagawan iri na ama lagolar-e, Nagawan Indo ondobo bem lujwog-o! At-nen nit-nen kwarurak wene-ge mul nunduwa-o. Nagawan Indo-nen mul nondoso wene iri-ge Yerusalem-nen lobok yoso me, nir-e at urula nak mborogolat wulmul-o. Sion-nen at-nen-e at ilirak inmin wene yak ondoso-o” luk yuwa-o.

³ Nagawan Indo-nen-e ap enlem oboksa onowene konosolar-e, enmawi worak nagawan misik-nen tenagidnak wi min misik-nen tenagidnak wi min ennggendumu wene konosolar-e, erepma woragwi na irit koroga woragwi na irit onowene konosolat wolma-o. Iri yosola-ge, it-nen-e wim pugwi eneyalawi-ge nden kaga yabu wanugwi kagweyak tak puwa-o. Nde, it wim pugwi posid wuru-ge tusuangge mbarugwi rak puwa-o. Ap enlem erep-nen-e ap enlem erep inmin-e wim puwa bug-o. Iri-nen wim nggurak pem na lid lud tak puwa bug-o.

⁴ Ap oboksa enambiktak lombok-nen kona wene lak, yamuksa irit woragolar-e, anggut eyapmu-nen na irit, e ara eyapmu-nen na irit, yamuksa wolma-o. Nde, ap misik-nen mbi kwiye rak onpogolat wolma bug-o. ”Iri nggal kwasa wolma-o” luk, Nagawan Indo Mondok Amawi worak iri na-nen urul pij-o.

⁵ Nggweyakma yu me-nen-e ap enlem oboksa ondomoktak-nen it unkugwiwak lombog-et erembel wanogolat, unkugwiwak-nen yidnak yidnag-et kwarogolat woragwi-o. Alat nde, nir-e Nagawan Indo Nenmbal Pem Nagawan-nen yidnak yidnag-et kwarogolat, pempa at erembel wok tenak wulmul-o.

Mbo inpidnak sa-nen Isarael nap tuguruk lobok yurak wene 4:6-14

⁶ Nagawan Indo-nen yosolar-e: ”An-nen angin worak enpem pukmu, mbo inpikma, mbo inpidnak sa anggun panggun kagolat worali nap ereba na an-nen ndok worak unpurak tarem-e wog-et ma-o.

⁷ Nde, it iri-ge tu entambet mbururak meya rak unpuruk, it woragwi sa enma keya buruk, nin sa worali-t nde, it erep keya inpidnak nap minggirik ereba-nen wigarak-nen-e enlem ngget irit kwarak inpimin-o. Iri yumu, it iri-nen-e ap enlem nggok, enmawi worak irit kwat ma-o. An-nen-e it tena unpuruk woralar-e, Sion ndobo bem iri me-net tena unpuruk, pem irit woramin-o” luk yij-o.

⁸ Lomba wam ombo-nen olomba oro yik karok woraso nggal, Yerusalem kar-e Mbal Pem Nagawan-nen at ilirak yik eneyarok woraso ondoro-nen yusu-o. Yerusalem kar-e nanduk-nen woraso nggal kat-nen tenagidnak wi o siri iminepma tuguruk kwat yugun-o.

⁹ Noluk-nen kar-e yip nggwa yosolat worasu-o? Kar-e noluk-nen kweyap li ndaguwokluk yane wurugwi nggal yane wat tenak worasu-o? Kar-e kat-nen idnak nagawan lak ala-nen yusu-a? Are, kat nggomo kurugwi nab-e wat yikma-nen yusu-a?

¹⁰ Yerusalem woragwi nap wa-e. Yawo-ge kunuwi siri keya buruk, nembaga karu me ereba na me woragup pem-e kweyap-nen li ndakolat andi bandisa yane wurugwi nggal yane wiri-o! Kir-e mondok Mbabel mbururag-o. Alat nde, iri me-nen Nagawan Indo-nen-e kunuwim nap ininggem-nen lerak kunpuwa-o.

¹¹ Yerusalem wa-e. Ap enlem kwarat kat kebem kore yuwokluk ndok wirigarig-o. It-nen yogolar-e: ”Yerusalem iri-ge mondok yigisa lak tak purag-o! Iri rak puruk, o siri iri-ge tudsa labuk yidnak irit yik kul-o!” luk yili-o.

¹² Alat nde, ap enlem ereba-ge Mbal Pem Nagawan-nen kwarurak indi arem yebet kasu ereba-ge kabak worali-o. Nggandum mbato engen lera mbuwakluk lel kudtak pem ndok wurugwi ereba na nggal angin worak nenpem peyekluk-nen ndok worak nunpusu-o lug-e ir-e enaru buk worali-o.

¹³ Nagawan Indo-nen yosolar-e: ”Yerusalem woragwi nap wa-e. Mburugupndik, kit kunuwim nab-e kunuwok liri rak enper-o! Nde, an-nen-e sapi wam anggul ambo-ge mbesi pago, nde, ijok abis-e tembaga pago ereba na amawi nggal tak kinpimin-o. Iri rak kunpumu, kit-nen-e ap enlem kwarat yigisa lak tak unpugub-o. Nde, it-nen mengga wanidnak silobulo-ge mbal min nggweyak min ombol pem kek tak Nagawan Indo an namanggim pugub-o” luk yij-o.

¹⁴ Yerusalem woragwi nap wa-e. Nagawan Indo-nen yongga kunduwakluk kiri keresa emengen mbarurag-o! Nir-e yawo-ge lop lop nindili-o! Wim nap-nen Isarael nap lit unpuruk noso nap ebem mbud yili-o!