MIKA 3 - Nanduk Ngget Tul Pidnak Wene

Mika-nen Isarael nap ennggendumu enne kulugwi nap ereba na met inpidnak wene 3:1-12

¹ Isarael nap tena unpuruk woragwi wa-e. Kwara koler-o! Kit-nen-e mot mot kwarugwi iri-ge mondok kenaru-t wolmomtag-et nde,

² kir-e konak kwarurak iri na-ge kinsili rak nde pili-o. Nde, meya kwarurag-e kinndingen nde yusu-o. Kit-nen-e an nelem nab-e unlug-et woragola, enaboro nggorogolat, onowak pem-nen ununo lobonogolat kwatli-o.

³ Kir-e an nelem nab-e nili-o. Iri yogolar-e, enaboro lobonogolat, onowak min kir-e yigisa keya bili-o. Kir-e wam uno togolwak arem pil ngguwokluk mbarugwi nggal mbal inpili-o.

⁴ Kit-nen kenne nggoksa ”Nagawan Indo wa-e. Yongga nindi-o” luk Nagawan Indo emengen mbarurak tarem wok yosola, emengen mbarugub-et nde, kenne ereb-e nggaruwa bug-o. Kir-e meya nak kwarogolat woragwi me, kit-nen tepan yugup na kuluwa bug-er-o.

⁵ Ennesiget Mbal Pem Nagawan ene lomboksa yugwi nap ereba-ge onggo wok ondogola-ge, ”Kir-e yamuksa woragub-o” luk wene yak ondogolat, nde, onggo wok indigit lak nab-e inmin sirid mbarogolat ereba kwat onpogolar-e, an nelem nap enmberam lali-o. Ennesiget Mbal Pem Nagawan ene lomboksa yugwi nap ereba nggal ereba na Nagawan Indo-nen yak ondogolar-e:

⁶ ”Kennesiget an nene lomboksa yugwi nap wa-e. Kit-nen kwatli iri lak tak purak tarem-e panggo yusu-o. Kir-e iri nggal nak kwat tenak woragub-e lag-o. An-nen kwarurak ereba na nam tak purak pem nabi-ge kagup pug-o. Kir-e ’Iri nggal kwat ma-o’ luk urul pili ereba na-ge tuguruk urul pugup pug-o” luk yak indij-o.

⁷ ”Abok ereba-nen kwat momtak ereba na iri nggal kwat ma-o” luk urul pili nab-e it-nen urul pidnak iri na kwat yigit lak ala karuk, innggiri nde ma-o. Mbal Pem Nagawan-nen-e it-nen yidnak wene kuligit lak yosola karuk, innggiri-nen wandu ma-o.

⁸ Alat nde, an perak nde, Nagawan Indo-nen at indi narem posolat, amawi wok norosolat kwarusu-o. At-nen wok norosolar-e, mot mot kwarurak yebet kagwi elem wok norosolat, iri-nen Isarael nap-nen meya kwatli ereba na ”Iri kwatli meyog-o” luk yak undurak amawi kwiye lak elem wok norosolat kwarusu-o.

⁹ Kit Isarael nap ennggendumu-nen kenne kulugwi nap wa-e. Kir-e mot mot kwarugwi ereba na kinsili rak pogolat, ndemeret kwarugwi ereba na-ge nden yaga nin tak pogolat kwarugwi kir-e an-nen yidnak wene yu kwara koler-o.

¹⁰ Kit-nen Mbal Pem Nagawan uwi siri Yerusalem siri iri na mendak pogolar-e, mabin-e ap eneyabi min mot mot kwarugwi buk min ereba na bem-nen mendak pili-o.

¹¹ O siri ereba tena woragwi nap-nen-e o tenakolar-e, uang lesa wanurak pem nak o tena worali-o. Nde, tepan ombo-nen Nagawan Indo-nen imiri mbarak pidnak ereba na ap mul indili-ge onggo wanurak pem nak mul indili-o. Nde, Mbal Pem Nagawan ene lomboksa yugwi nap-nen Nagawan Indo-nen mirik unpuwakluk nggi yili-ge uang lesa wanurak pem nak nggi yili-o. Nde, it oboksa-nen iri nggal kwarogolar-e, it inndi-nen yebet kagolar-e: ”Nagawan Indo-ge nit nennggendumu worasu-o” luk yebet karug-e, it-nen yogolar-e: ”Nagawan Indo-ge nit ninmin worasu-o. Nde, iri ala-ge, nit nenpem-e lak tak onposo mende-ge mbuma bug-o” luk yili-o.

¹² Kit-nen meya kwarugwi iri-nen ndowaga Sion Ndobo iri na-ge yigisa keya bogolat, Yerusalem-e yud tud mbosolat, ndobo Mbal Pem Nagawan uwi worak worasu iri na-ge egere nggok lasolat kwat ma-o.