MIKA 2 - Nanduk Ngget Tul Pidnak Wene

Silobulo lak nap lel inpili ereba na kwat unpurak wene 2:1-11

¹ Kubu nene yugwi sa mbiringgik woragolat: ”Meya kwarurak iri nggal kwarimin-o” luk inndi yebet kagolat worarug-e, kup o nda yosola-ge, meya kwarurak enmawi worasola me, inndi arem yebet kaidnak ereba na kwatli nab-e mondok enabuwa kagolat wolmag-o.

² Ereba na kwarogolar-e, it-nen nde yabu misik wanurak perarug-e, yabu iri na-ge mengga wanogolat, nde, it-nen nde o misik ukwe perarug-e, o iri na ndela nggogolar-e, iri me woragwi nap ereba na enarengge enmawi bem mengga wanogolat, enpe na lel mberel onpogolat, kwat tenak woragola, enarengge wanili nab-e yamuksa worali bug-o.

³ Iri kwat inpili bem-e Nagawan Indo-nen yosolar-e: ”An-e lak tak onposo mende kit kenpem pil lobok yurak yebet kasolat worasu-o. Kenpem nde pil lobok yosola-ge, kir-e mbela mburugup pug-o. Iri tarem-e kit lak tak kunpurak tarem-e kir-e kinndi kek tak pem waring kali iri na nggal-e waring kagup pug-o.

⁴ Kit-nen lak tak kunpuwa iri na-ge ap-nen wene ijambo rak puwa-o. Iri yogolat-nen yip lilan ndawi ngarogolar-e: ’Nagawan Indo-nen-e nit nunuwi yu-ge mengga nit yemndak nunpuruk worali nap wok indij-o. Nir-e mondok yigisa abapno rak ninpidnak worali-o’ luk yuwa-o” luk yij-o.

⁵ Iri bem-e, o iri na Nagawan Indo ilirak tuguruk wok undurak tarem wok yosola-ge, kit kennggendumu-nen-e ap misiger-o luk tet winde yugup pug-o.

⁶ Ap endam-nen nggomo norogolat-nen yogolar-e: ”Nir-e nggomo nundurak pug-o. Ereba wene bem oboksa nggomo nundurak pug-o. Nir-e ninnggiri-ge kul pug-o.

⁷ Kat kindi-nen-e Isarael nab-e Nagawan Indo-nen imbiri lamut tak enpamu-o luk yebet kasu-a? Nagawan Indo-nen-e iri nggal-e kwaruwa bug-o. At-nen mamak puruk woraso-ge iri-ge pok tak poso-a? At iri-ge ap ndemeret mot mot kwarugwi nap inmin-e wene-ge konak nak ndamoso iri na-ge lag-a?” luk yiga-o.

⁸ Yogola, Nagawan Indo-nen onggo yosolar-e: ”Kit yu-net wim nap nggal kwatluk, an nilirak inmin wim mbatli-o. Nde, ap wim tumbutluk lobok yogolar-e, ’Yawo-ge o ma-t yamuksa woramin-o’ peraruk lobok yosoma-t nde, kir-e unuwi mengga wanuwokluk nde pak tak worali-o.

⁹ An nilirak ereba na ennggendumu-nen kwami-ge unuwi inndi kundik ereba na me-nen langgara wirik onpogolat, an-nen it inlirak ereba na imbiringgat wok indidnak ereba na-ge kir-e abu abu mengga wanili-o.

¹⁰ Kit-nen meya kwatli iri-nen ndowaga lak tak onposo mende mondok kwiye worak o yu bem mberak pil lobok yuwa me, mondok wene lak yamuksa woragup puk me, mondok menluk mberer-o.

¹¹ Kit-nen ennesiget yogolat, enmberam lagolat yugwi nap-nen ennesiget urul pogolar-e: ’Kir-e anggut min inndi nden kaso yi min kwarat ombo yugub-o’ luk yugwi nap ereba na kinndingen tak inpili-o” luk yij-o.

Inmiri yurak urul pidnak wene 2:12-13

¹² Nagawan Indo-nen tuguruk yosolar-e: ”Kit Isarael nap keya kinpidnak erep worali wa-e. Kir-e lomba wam tuguruk o ma lobok yoso nggal, an-nen ndok worak kunpuruk misiget tak kinpimin-o. Nde, o lid lomba wam-nen ebebe lak yoso nggal kit kunuwi nggweyag-e ap-nen ebebe lak ma-o.

¹³ An-nen kit kenmanggim tu kore yimindik, mbo kinpidnak sa-nen lesa wok kunpuruk mbirimin-o. Kir-e pak tumende ereba na mijara keya buruk, terak irit mburugub-o. Nde, Nagawan Indo an-e kit-nen idnak nagawan-nen yusu-o. An-net lit keneyaruk, kinmin mbirimin-o” luk yij-o.