MIKA 1 - Nanduk Ngget Tul Pidnak Wene

Mika

¹ Nde, Mika iri-ge o marik misik unu-ge Moreset woraso-o. Nde, at iri-ge Yewura wi iri na me Nagawan Yotam min Agas min Isikia min it ereya-nen ondolma lud o tena woragola tarem-nen Samaria min Yerusalem min kwat unpurak wene Nagawan Indo-nen Mika yak tij-o.

Samaria min Yerusalem min ubud-nen yip tidnak wene 1:2-9

² Yi nap ndi nap oboksa wa-e. Kwara koler-o! Yi wi ndi wi oboksa woragwi nap wa-e. Kwara lombot per-o! Nagawan Indo Mondok Kek tak iri na-ge kit oboksa kinnggiri wururak irit lobok yuwa-o. At ama marak aid arem-nen wene yosola, kwara koler-o.

³ Ar-e at woraso sa marak iri na me-nen mbuwasolat, nggweyakma yu me-nen ndobo anggul ereba na bem waring kujwa-o.

⁴ Ndobo oboksa at ijok ma-nen kolpo kan ma bosoma kwaroso nggal yi nggal kwatluk larok ma-o. Yi ndobo bem-nen mboroso nggal nggweyakma mabunuruk, mbirikmu ereba na mbuwa-o.

⁵ Ereba oboksa kwat ma ereba-ge Isarael nap-nen meya kwarogolat, Mbal Pem Nagawan imin wim mbarugwi iri bem-nen kwat ma-o. Ta-nen ndowaga Isarael nab-e meya kwatli-o? Iri-ge, it unuwi siri iminepma Samaria iri-net ndowaga-nen kwatli-o! Ta-nen ndowaga Yewura nab-e kugwiwak erembel wanili-o? It ondomok unuwi siri Yerusalem-net ndowaga-nen kwatli-o!

⁶ Iri-nen ndowaga Nagawan Indo-nen yosolar-e: ”Tusundumu ereba ma-nen o tud yidnak nggal kwasa Samaria iri-ge keya bosolat, ap-nen anggut uwi yakwi ondoro rak posolat kwarak pimin-o. O siri iri tud yidnak ereba na-ge waga mbirikmu ereba na nggwe mbo bosolat, o mabin min-et yala keya bimin-o.

⁷ Yi mende nde mende ut memera ndak wiridnak mende onggo nggok pugwi ereba na-ge yigisa keya bosolat, it unkugwiwak wi kuil iri me yabu wanugwi kweyap wok undugwi mende ereba na-ge kan pogolat, it unkugwiwak min-et lak tak posolat ma-o. Nde, silobulo ereba-ge it unkugwiwak ininggi amburu worak tak poso iri na erembel wanogolat, uwingga mbarogolat-nen onggo pugwi silobulo ereba na-ge yawo-ge it unuwim nap-nen it unkugwiwak wiwa-o luk erembel wanogolat amanggim purak waruk mburuwa-o” luk yij-o.

⁸ Iri ala-ge, Mika an-e nindi abi kalok yosolat, o! luk, yane wirimin-o. Nde, an-nen nindi abi kalok yidnak iri kujwaklug-e, nusum na yirigit lak, nuwok sum na yirigit lak irit waring kamin-o. Iri kwarosolar-e, ndakngge nggal kuje mba arem nosolat, towe yipsoja yip nggal yil nosolat woramin-o.

⁹ Iri kwarimin iri-ge Samaria iri me-nen yidnak ud ereba na-ge mondok ambut tak purak na mondok meya-o. Iri-nen Yewura nap na iri nggal-et enpem mbosolat ma-o. Iri nggal kwarosolar-e, an nelem nap enma Yerusalem pak tumende bem nggin yusu iri bem-nen kwarimin-o.

Wim nap Yerusalem iri me nggumomtak panggo yidnak wene 1:10-16

¹⁰ Kit yip togola, mondok yik kiniyujwa naru, angin worak nenpem mbidnak wene-ge nit nunuwim nap Nggat woragwi ereba na-ge yak undurak pug-o. Mbet-Le-Apara woragwi nap wa-e. ”Ngge kwarul-o?” luk yane worogolat, o liri bem mbiring mbaring kwarer-o!

¹¹ Kit Sapit woragwi nap wa-e. Kinnggiri min koro nderak irit mbo inpil mburugwi sa mberer-o. Nde, Sanan woragwi nab-e it unuwi silmu-nen kwiye lag-et mbepme mburuwa bug-o. Nde, Mbet Aesel woragwi nap enne sa nggwa mborogola karug-e, iri bem-nen yenggerak pogolar-e, iri me-ge it inmiri mbarak kura wolmomtag-e meya-t kagi-o luk karu ma-o.

¹² Lak tak onposo elem Nagawan Indo-nen Yerusalem pak tumende bem pil lobok yij-o! Iri bem-e o Marot nab-e ”Yongga nunduwa-o” luk yebet kudtak pug-o.

¹³ Kit Lakis woragwi nap wa-e. Kit-nen idnak kura wam-e kit-nen wim nggugwi nggweyak koma ereba na bem paril lobok yer-o. Isarael-nen meya kwatli ereba-ge kit-nen ndemul mul kwatli iri-nen ndowaga Yerusalem min-et meya kwarugwi rak pigeb-o.

¹⁴ Yewura nap wa-e. Kit kunuwi siri Moreset-Nggat iri-ge mondok wanuwa-o. Nde, o siri Aksip nggwe-nen-e Isarael nap nagawan-e yongga unduwa bug-o.

¹⁵ Mareseya nap wa-e. Nagawan Indo-nen-e kir-e kegera wim nap kit kunuwi siri yemndak puruk wolma iri ininggem kegera kunpuwa-o. Isarael nap ennggendumu ap yok nggok ereba na-ge o Andulam iri me kerep uru arem ereba kurak yil ndi ma-o.

¹⁶ Yewura nap wa-e. Kir-e kinlirak kinndi kundik ereba na enabuwa-nen kenanggulsu labena keya buruk, kinndi puru-nen tabun puruk wolmer-o. Kit kinlirag-e mbo inpil mburugwi sa mbo inpil mburuwa me, kenanggulsu-ge kom nggurik nggal tak purag-o.