MBIRIGA WENE 9 - Nanduk Ngget Tul Pidnak Wene

Wam wat yidnak wene 9:1-7

¹ Nagawan Indo-nen Musa yak tosolar-e: ”Kar-e Pirayon eram mbiri-o. Mburugundik-nen yak tosolar-e: ’Iberani nap Enmbal Pem Nagawan, Nagawan Indo-nen yosolar-e: ”An nelem nap iri-ge an nerembel wil mburuwak-nen lerak inpi-o.

² Kat-nen nde it lerak inpigit lak ala-ge,

³ kininggem mende konowam oboksa kura wam min kelerai min unta min lomba min kambing min ebem lak tak purak mende kwiye worak irit pil lobok yimin-o.

⁴ An-e Isarael nap onowam-e lena keya bosolat, Mesira nap onowam-e lak tak pimin-o. Nde, Isarael nap onowam-e misiger-o luk tet mondok wat ma bug-o.

⁵ Nagawan Indo an-e kub-et yigi iri kwarimin-o” yij-o’ luk yak turag-o” yid.

⁶ Nde, kub-e Nagawan Indo-nen-e at-nen yid iri na-t kwarosolar-e, Mesira nap onowam-e oboksa wat yosolar-et nde, Isarael nap onowam-e misiget ter-o luk mbi wat yigit lag-o.

⁷ Nde, Pirayon-nen-e iri me-n kwat yidnak wene ereba na kin wanij-o. Kin wanosola karuk, yak togolar-e: ”Isarael nap onowam-e misiget ter-o luk mbi wat yigit lag-o” yak tiga-t nde, Pirayon na-ge indi amawi luk, Isarael nap na-ge lerak inpigit lag-er-o.

Kimbi enpem yid wene 9:8-12

⁸ Nagawan Indo-nen Musa min Arun min yak ondosolar-e: ”Kan mabugwi sa iri me-nen mabe kinggi mok misiget pem wanuruk, Musa kar-e Pirayon eram-net mabe iri-ge mondok teram nggwe nggilara mbo pil li-o.

⁹ Iri yosola, mabe iri na age o Mesira oboksa nggwe mborosolar-e, ap min wam min enpem mbosolar-e, enpem kimbi kwat luk, limbiril lobok luk toksa nggolte worak ud irit kwat ma-o” yij-o.

¹⁰ Yosoloma, Musa min Arun min-e mabe waruk Pirayon eram mbirigarik, Musa-nen mabe na teram nggwe nggilara ligik pil lasola, age na ap min wam min enpem mbosolar-e, enpem kimbi kwat luk, lumbutluk toksa nggolte worak ud irit kwat yij-o.

¹¹ Nde, it Mesira nap kwarugwi buk mende kwarugwi nap ereba na-ret it Mesira nap erep enpem yid nggal-et enpem-e kimbi nak-nen engen yilidnak me, Musa eram wok momtag-e meya irit agaij-o.

¹² Nanduk Nagawan Indo-nen yosolar-e: ”Musa min Arun min-nen yidnak wene-ge no mende nggal tak puwa-o” yid iri na ndak ndag-et kwarosolar-e, Nagawan Indo-nen Pirayon na-ge indi amawi rak ibij-o.

Talme engen mberak pidnak wene 9:13-35

¹³ Nagawan Indo-nen Musa yak tosolar-e: ”Kub-e kubu kabu mburugundik, Pirayon yak tosolar-e: ’Iberani nap Enmbal Pem Nagawan-nen yak korosolar-e: ”An nelem nap iri-ge an nerembel wil mburuwak-nen lerak inpi-o.

¹⁴ Nde, yawo-nen lak tak unpurak mende pil lobok yimin iri-ge keyabu wanugwi nap min kat-nen tenagidnak wi woragwi nap min it nak enpem pimin-e lag-o. Alat nde, kat-nen an nebarosolar-e: ’At nggal mbi yi wi ndi wi worasu-ge mondok lag-et kagi
’ luk karu yonok-nen-e kat min-et kebem pil lobok yimin-o.

¹⁵ An-nen nde kat min kat-nen tenagidnak wi woragwi nap inmin kenpem wene mbarosolat-nen nde kugwi kenpem pelepnggalmu-nen-e mondok kowak ngget min lak tak kenpeleb-o.

¹⁶ Alat nde, an-e namawi mirik konposola, yi wi ndi wi oboksa na nanggu nobok mburuwakluk-nen kunluk keya kunpusu-o.

¹⁷ Alat nde, yawo na kar-e kindi kek tak pem woralat, an nelem nab-e mburuwakluk lerak unpusu bug-o.

¹⁸ Nde, kub-e yanem nggal-et talme engen-e kwiye worak irit pil mbuwamin-o. Nde, talme engen iri nggal-e o Mesira yu me-ge o nanduk ereba kuri-nen yawo na mondok kagwi bug-o.

¹⁹ Iri bem-e kat nen wene wirik posolar-e: Kowam min kenarengge mende oboksa mbepme nggwe worala-ge, waga lak tak purak puk sa pil lobok yurag-o. Nde, wam na irit, ap oboksa na irit, mbepme nggwe nde mbilak wolma ala-ge talme engen-nen mondok lak tak unpuwa-o yij-o” luk yak ti-o’ ” yak tij-o.

²⁰ Nagawan eyabu wanugwi nap ereba na ennggendumu ap erep-nen-e Nagawan Indo-nen yidnak wene iri na kuluruk, kwiye kwarat kagolar-e, ndegel unpugwi nap nde onowam nde talme engen-nen unduwa naru enma ndegera piga-o.

²¹ Alat nde, it ereb-e Nagawan Indo-nen yidnak wene iri na-ge te rak puruk, ndegel unpugwi nap min onowam min-e ndegel inpigit lak mbilak ereba-t keya inpiga-o.

²² Nde, Nagawan Indo-nen Musa yak tosolar-e: ”Kinggi mbal nggwe ligik pi-o. Iri yosola, talme engen-e Mesira wi oboksa mbuwasolar-e, ap min wam min yagidnak mende oboksa min ebem mbuma-o” yak tij-o.

²³ Yosoloma, Musa-nen owangun iri na mbal nggwe nuk kasola-ge, Nagawan Indo-nen kwarosolar-e, o nggu obinel tak posolat, talme engen mberak pil mbuwagij-o. Nde, Nagawan Indo-nen pil mbuwasolar-e,

²⁴ o nggu obinel yosolat, talme engen kwiye worak pil mbuwagid iri-ge nanduk it Mesira nab-o luk enlem kwat yigit lak ma ereba-nen na talme engen iri nggal-e mondok kagwi bug-er-o.

²⁵ Talme engen iri na mbuwasolar-e, o Mesira uwi oboksa-ge ndigirigit lak mbilak woraidnak ap min wam min oboksa lak tak pij-o. Iri-nen yapmu yagidnak mende oboksa lak tak posolat, e oboksa na langgona yud mbud tak pij-et nde,

²⁶ Isarael nap woragwi sa o Nggosen nak perak talme engen-e mondok mbigit lag-o.

²⁷ Iri ala, Pirayon-nen Musa min Arun min wene mbo unpuruk-nen yak ondosolar-e: ”Yawo-n perak an-e ndemeret meya kwarigi-o. Nagawan Indo iri-ge ndemeret lud tak nak kwaroso-nen yusu-o. Nde, an min an-nen tenagidnak wi woragwi nap inmin-e ndemeret meya-t kwatli-o.

²⁸ Nde, nir-e ndemeret o nggu min talme engen min-nen ndak andi bandi rak ninpij-o. Iri bem-e, Nagawan Indo emengen mbarer-o. Kir-e mondok yu me wolmomtag-e lag-o. Lerak kinpimin-o” luk yij-o.

²⁹ Yosoloma, Musa-nen Pirayon yak tosolar-e: ”An-e o siri keya buruk mborosolar-e, ndag-et nak ninggi teram nggwe ligik puruk Nagawan Indo eram tepan yimin-o. Nde, o yu-ge ndemeret Nagawan Indo arengge-nen yusu-o luk karu yonok-nen o nggu lak tak posolat, talme engen pok tak posolat ma-t nde,

³⁰ an-e naru-o. Kat min kat keyabu wanugwi nap min-e Nagawan Indo Mbal Pem Nagawan aye kali bug-o” yak tij-o.

³¹ Nde, yagidnak mende arami na-ge nggeret isi posolat, nde, jalai na-ge nggeret engen posoma me, arami min jalai min iri na-ge talme engen-nen mondok meya rak pij-o.

³² Alat nde, nggandum mbato iri-ge engen poso tarem-e awo me, meya rak pigit lag-o.

³³ Nde, Musa na nagawan eram-nen mborosolat, o siri keya buruk ombol nggwe mborosolar-e, Nagawan Indo emengen mbarosolat, inggi teram nggwe ligik puruk tepan yosola ereya na-net o nggu iri na lak yosolat, talme engen min talme min iri na pok yij-o.

³⁴ Nde, Pirayon-nen yik kagidnggal talme engen iri na pok yosola karug-e, tuguruk meya-t kwarij-o. At na irit, at eyabu wanugwi nap na irit, tuguruk inndi amawi yiga-o.

³⁵ Nde, Nagawan Indo-nen Musa yak tosolar-e: ”Nagawan iri-ge Isarael nab-e mondok lerak unpuwa bug-o” yid iri na nggal-et indi amawi yij-o.