MBIRIGA WENE 8 - Nanduk Ngget Tul Pidnak Wene

Mangge kwarat yidnak wene 8:1-15

¹ Iri luk, Nagawan Indo-nen Musa yak tosolar-e: ”Kar-e nagawan eram mburugundik, an-nen yidnak wene yu yak ti-o: ’An nelem nap iri-ge an nerembel wanuwakluk ”Mberer-o” yak indi-o.

² Lak nde ala-ge, onggo posolar-e, o Mesira yu oboksa mangge-nen kobong tak pimin-o.

³ Iri rak pumu, yi Nil iri-ge mangge nak kobong yosolar-e, mangge ereba na-ge yi ma-nen lobok yosolar-e, kat woraso sa nggosolar-e, kat nene yoso sa-nen, nene yoso kondoro bem-nen, ndegel kubugwi nap enma-nen, o bem nap enma-nen oroti worakwi ondoro arem min-et togolwak arem min-et mangge nak kwat ma-o.

⁴ Nde, mangge ereba-nen-e kat min ndegel kubugwi nap min o bem nap min oboksa kenpem yubu lubu mbuwa-o’ ”

⁵ yuruk, Nagawan Indo-nen Musa yak tosolar-e: ”Arun yak ti-o. Owangun iri yi oboksa ambigit, yi mborop ndimiril lobok yidnak min inid ugup oboksa min ambigit ndimirik puwag-o. Iri yosola, mangge yi ma-nen luwasolat, Mesira uwi oboksa mangge-nen kobong ma-o” yak tij-o.

⁶ Yak tosoloma-ge, Arun-nen owangun na-ge yi oboksa ambigit nuk kasoma, mangge yi ma-nen luwasolar-e, Mesira uwi oboksa yebet yij-o.

⁷ Alat nde, o iri woragwi nap-nen na, it-nen enaru yidnak mende bem kagwi buk mende kwarogolat Mesira uwi iri me mangge kwarat tak piga-o.

⁸ Iri ala, nagawan iri na-nen Musa min Arun min wene mbo unpuruk-nen yak ondosolar-e: ”Mangge yeba lak tak puwak-nen kir-e Nagawan Indo eram tepan yer-o. Iri ala-ge, kit kenlem nab-e wam wosa Nagawan Indo amanggim puwakluk lerak keya inpimin-o” luk yak indij-o.

⁹ Yosoloma, Musa-nen onggo yosolar-e: ”An-e kat kamanggim tepan yurak iri-ge nindingen-o. An-nen nap kat min ndegel kubugwi nap min kat-nen idnak o bem nap oboksa min kenmanggim tepan yurak tarem kat-nen lud tak pi-o. Nde, Nagawan Indo-nen-e mangge ereba-ge kendam-nen lak tak puwa-t nde, yi Nil arem nak wolma-o” yij-o.

¹⁰ Yosoloma, nagawan iri-nen yosolar-e: ”Kub-et tepan namanggim yurag-o” yosoloma, Musa-nen yosolar-e: ”An-e nap kat-nen nggi yigen irit kwarumu-ge kat-nen-e: ’It Enmbal Pem Nagawan iri nggal Mbal Pem Nagawan nin mbi worasu bug-o’ luk karu ma-o.

¹¹ Nagawan Indo-nen-e nap kat min kat ndegel kubugwi nap min kat-nen idnak o bem nap min oboksa mangge ereba-ge kendam-nen lak tak puwa-t nde, yi Nil arem nak perak wolma-o” yij-o.

¹² Yak turug-e, Musa min Arun min-e nagawan iri na eram-nen mbirigarig-e, mangge nagawan iri na bem pil lobok yidnak ereba na lak tak puwakluk, Nagawan Indo eram Musa-nen tepan yij-o.

¹³ Yosoloma, Nagawan Indo-nen Musa-nen tepan yid iri na kulurug e, mangge o ma-nen omborom-nen yapmu-nen ereba na-ge oboksa worak pij-o.

¹⁴ Worak pamu-ge, it Mesira nap-nen-e mangge worak pidnak ereba na-ge ndok wosa ligik pil lobok yikma, o iri me-ge emben to yosolat woragij-o.

¹⁵ Nde, nagawan-nen yik kagaidnggal, mangge yeba na-ge wat yidnak karug-e, Nagawan Indo-nen yosolar-e: ”Musa min Arun min enne-ge no mende nggal tak puwa-o” yid iri na ndak ndag-et tuguruk indi amawi irit yij-o.

Nggurun kwarat tak pid wene 8:16-19

¹⁶ Nagawan Indo-nen Musa yak tosolar-e: ”Arun iri yak ti-o. Owangun pem nggweyak lel kujwag-o. Lel kasola, o age mabe nggal mborosolar-e, o Mesira wi oboksa o age mabe nggal iri-nen nggurun kwat ma-o” luk yak tij-o.

¹⁷ Yak tosoloma-ge, Arun-nen owangun pem nggweyak lel kasola-ge, Mesira iri me o age mabe nggal oboksa nggurun kwat lug-e, ap enpem-nen wam pem-nen luknggere mbij-o.

¹⁸ It Mesira nap, kagwi buk mende kwarugwi-nen na enaru yidnak mende bem nggurun kwarat tak purak pem enmawi kundiga-t nde, ebe kwat yigit lag-o. Nde, nggurun ereba na-ge nin me nan me irit woragij-o.

¹⁹ Iri ala karuk, it kagwi buk mende kwarugwi nap ereba na-nen nagawan iri na yak togolar-e: ”Yu-ge Mbal Pem Nagawan-net kwarusu-o” yak togola-t nde, Pirayon na-ge indi amawi irit yij-o. Iri kwarid iri-ge, Nagawan Indo-nen yosolar-e: ”Nagawan iri-ge Musa min Arun min enne-ge no mende nggal tak puwa-o” yid iri na ndak ndag-et kwarij-o.

Mirabon kwarat tak pid wene 8:20-32

²⁰ Nagawan Indo-nen Musa yak tosolar-e: ”Kar-e kub-e kubu kabu Pirayon yi ma mbuwasoma, imin lambuk yekluk mbiri-o. Lambuk lug-e, an-nen yidnak wene yu yak ti-o: ’An nelem nap iri-ge an nerembel wil mburuwak-nen lerak inpi-o.

²¹ Kat-nen nde kuligit lak ala karug-e, an-nen mirabon kenpem pil lobok yosolar-e, kat min kat keyabu wanugwi nap min kat-nen tenagidnak wi woragwi nap min kenpem pil lobok yosolat, Mesira nap enma oboksa-nen na, Mesira wi oboksa-nen na mirabon-nen kobong ma-o.

²² Alat nde, an-e Nagawan Indo-nen yusu-o luk kenaru yobokluk, an nelem nap woragwi sa o Nggosen iri me perak pigit lak yumu, mirabon mbi wolma bug-o.

²³ An-nen-e kat nap min an nelem nap min lenak inpimin iri-ge yenggerak purak pem kwiye worak mende iri-ge kub-et kwat ma-o’ yak ti-o” yij-o.

²⁴ Iri lug-e, Nagawan Indo-nen mirabon kwarat pil lobok yosolar-e, nagawan woraso sa-nen, nagawan eyabu wanugwi nap enma-nen, o Mesira wi obok pil lobok yamu, mirabon ereba na-nen anggun panggun tak onposolat woragij-o.

²⁵ Iri yosola, Pirayon-nen Musa min Arun min wene mbo unpuruk-nen yak ondosolar-e: ”Kir-e Kenmbal Pem Nagawan amanggim wam wosa pil mborogolar-e, o yu nggweyak kwid turuk pil mbururak pug-o” luk yak indij-o.

²⁶ Yak ondosoloma, Musa-nen yosolar-e: ”It Mesira nap-nen-e kambing lomba iri-ge insili kagwi me, nit-nen Nagawan Indo Nenmbal Pem Nagawan amanggim yu me-n wosa kan purag-e meya-o. Nde, nit-nen Mesira nap insili kagwi kambing lomba ereba waga it inmbiri bem wosa pogola-ge, nir-e mondok kerep pem nenmera mbaruwa-o.

²⁷ Iri ala karuk, nit Nenagawan Indo Mbal Pem Nagawan-nen yidnak ndak ndag-et kwarogolat at amanggim wam wosa kan pil mborogolar-e, ap lak ma mborogolat tundumu mberen nene yul-o” yij-o.

²⁸ Yosoloma, Pirayon-nen yosolar-e: ”Nagawan Indo Kenmbal Pem Nagawan iri amanggim wam wosa kan pil ap lak ma nggwe mbururak iri-ge ob-er-o. Mbigija-ge kit-nen erepma nggwe mbirigit lak yurak iri nag-o. Nde, tepan an namanggim yurag-o” yij-o.

²⁹ Yosoloma, Musa-nen yosolar-e: ”Kar-e nit nenmberam ludtak pug-o. Nde, an mbirimindig-e, kup mirabon ereba kit kendam-nen lak makluk, kat min kat keyabu wanugwi nap min kat-nen tenagidnak wi woragwi nap min kenmanggim Nagawan Indo emengen mbarimin-o. Nde, Nagawan Indo amanggim wam wosa kan pil mborogola-ge, kar-e tu nggulurak pug-o” luk yak tij-o.

³⁰ Iri luk Musa na Pirayon eram-nen mborosolar-e, Nagawan Indo eram tepan yij-o.

³¹ Nde, Nagawan Indo-nen Musa-nen tepan yid iri na kulurug-e, mirabon ereba na-ge nagawan min at eyabu wanugwi nap min at-nen tenagidnak wi woragwi nap min endam-nen yu mbu ndi rak pij-o. Mirabon misiget ter-o luk mbi woragit lag-o.

³² Irit nde, Pirayon na-ge tugurug-et indi amawi yosolat Isarael nap na-ge lerak inpigit lag-o.