MBIRIGA WENE 4 - Nanduk Ngget Tul Pidnak Wene

Mbal Pem Nagawan-nen kwiye worak kwarurak amawi Musa wok tidnak wene 4:1-17

¹ Yosoloma, Musa-nen onggo Nagawan Indo yak tosolar-e: ”Alat nde, it Isarael nap-nen ’Ndemerer-o’ peragit lak, an-nen yak indimin wene kola keya bogolat: ’Kar-e ”Nagawan Indo-ge an nimbiri bem nam yamu-o” yusu iri-ge kenesiger-o’ yak norogolar-e, an-e no kwarimin-o?” luk yij-o.

² Yosoloma, Nagawan Indo-nen Musa kin wok obosolar-e: ”Kinggem iri-ge no mende-o?” yosoloma, ”Wangun-o” luk yij-o.

³ Yosoloma, Nagawan Indo-nen yosolar-e: ”Kinggem-nen nggweyak ma keya bi-o” yak tosoloma, keya bidnggal-e, wangun na-ge waro nde kwat yosoloma, Musa-ge kwiye-nen wudsa mbirij-o.

⁴ Nagawan Indo-nen Musa yak tosolar-e: ”Kar-e panggosa waro iri eram lobok yugundik, waro iri iyuwak tenagi-o” yak tosoloma, Musa na-ge waro na eram panggosa lobok yosolat, waro na tena buruk posoksa mendak pij-o. Posoma-ge, inggem turuguk wangun nde kwat yij-o.

⁵ Nagawan Indo-nen yosolar-e: ”Kar-e iri nggal-et kwarosola-ge, Isarael nap-nen peragolar-e: ’Ndemeret. Nonmborak Abarakam min Isak min Yakup min Enmbal Pem Nagawan iri na-t at imbiri bem nam yamu-o’ luk yebet kujwak-nen kar-e wangun iri-ge kwarigen iri nggal-et kwarurag-o” yak tij-o.

⁶ Tuguruk Nagawan Indo-nen Musa yak tosolar-e: ”Kebare sum arem kinggi nggorak pi-o” yak tosoloma, inggi nggorak puruk, lit kagaidnggal-e, inggi-ge ud mbijap nggal ndigiril laso ebem yosolat loro aye worak irit kagaij-o.

⁷ Kasola-ge, Nagawan Indo-nen yak tosolar-e: ”Tuguruk kinggi-ge kusum arem nggorak pi-o” yosoloma, inggi na yid iri na nggal-et kwasa abare sum arem pil nggwarik, lit karuk nen piridnggal-e, ud na ambut yosolat aboro na-ge ondolma woraso nggal irit kagaij-o.

⁸ Nagawan Indo-nen yak tosolar-e: ”It-nen nde kat-nen yak undugun iri na bem inndi angin tubu yigit lak yogolat, kwiye worak mende nandug-et kwarugun iri na ndemerer-o luk, yebet kagit lak yogola ge, kwiye worak mende abok yu bem-nen perak ndemerer-o luk yebet kujwa-o.

⁹ Alat nde, kwiye worak mende mberen ereya enlengen kujwa-t nde, ndemerer-o luk inndi angin tubu yigit lak yogolat, kat-nen yak undugun wene na nde ’No nde yusu?’ nggal tak pogolat kwarogola-ge, yi Nil iri marig-et kenanggugundik nggweyak ma kiril kasola-ge, yi nggweyak ma kiril kagun iri-ge eyabi worak ma-o” yak tij-o.

¹⁰ Yak tij-et nde, Musa-nen yosolar-e: ”Nagawan Indo wa-e. An-e nanduk-nen woralat na irit, yawo kat-nen wene yu yak nurugunmu-nen na irit, an-nen wene yurag-e nemnde na angin, nene na nil kil tak me, orog-et yoso-o” luk yij-o.

¹¹ Yosoloma, Nagawan Indo-nen onggo yak tosolar-e: ”Ap enemnde-ge ta-nen ndak woramu-o? Ta-nen eneyanggo lak tak posolat, enne lak tak posolat kwaroso-o? Ta-nen enlengen kuwarak posolat, enlengen ngguru rak posolat yoso-o? Iri-ge Nagawan Indo an-net kwaroso-o.

¹² An-nen yongga korosola, wene yosolat, kat-nen yurak wene-ge an-nen mirik kibimin-o. Yawo-ge kar-e mbururak nag-o” luk yak tij-o.

¹³ Alat nde, Musa-nen onggo yosolar-e: ”Nab-o. An-e wirik nuburak pug-o. Nagawan Indo wa-e. Ap nin nde wirik inpi-o” luk yij-o.

¹⁴ Yosoloma-ge, Nagawan Indo isilepma Musa obosolat-nen yosolar-e: ”Lewi nap Arun na-ge kat kowe-ge lag-a? An-e naru-o. Ar-e wene yoso bem-e indi tenggerag-o. Ar-e yu nggwe kabuwok lobok yusu-o. Nde, kat keyarug-e, alen kwarat yuwa-o.

¹⁵ Nde, mondok at-nen yurak wene-ge kat-nen emndam tak posola, at nen yuwa-o. Nde, an-nen-e kit kenmberek yongga kondosolat, kit-nen yurak kwarurag-e an-nen mirik kinpimin-o.

¹⁶ Nde, Arun-e kat kondolmasa kat kene lomboksa yoso nap kwat yosolar-e, it ap iri wene yak unduwa-o. Nde, kar-e Mbal Pem Nagawan an nggal at wene emndam tak posolat wolmomtag-o.

¹⁷ Kar-e wangun iri waruk mburugundik, wangun iri bem-nen kwiye worak mende-ge kwarosolat woragun-o” luk yak tij-o.

Musa tuguruk Mesira wi mbiridnak wene 4:18-31

¹⁸ Wene iri na yak tosoloma-ge, Musa na-ge abak Yitero iri na ama lobok yarik, abak na yak tosolar-e: ”Nab-o. An-e nowe nowot unluk worali, lak? Are, ngge kwarak worali iniyil Mesira mbirimin yu-ge nunggwirig-o?” luk yak tij-o. Yosoloma, Yitero-nen yosolar-e: ”Nab-o. Kwara-t mbiri-o” yak tij-o.

¹⁹ Nde, Musa na o Mirian wi worala, Mbal Pem Nagawan-nen Musa yak tosolar-e: ”Kat kururak yugwi nab-e obok wat yikma me, kar-e tuguruk Mesira mbiri-o” luk yak tij-o.

²⁰ Musa-nen ogwe min elirak min ”Mburuwog-o” yak unduruk, elirak min ogwe min ndegera kelerai wam ombolwak pem inpil larug-e, Mesira wi mbiriga-o. Nde, wangun na-ge Mbal Pem Nagawan-nen yidnak yidnak kwarosolat, waruk mbirij-o.

²¹ Nagawan Indo-nen Musa yak tosolar-e: ”Kat-nen kwiye worak mende kwarurak amawi-ge abu wok kirigi irir-o. Nde, kat-nen nde tuguruk Mesira mburugundig-e, kwiye worak mende-ge Mesira nagawan iri imbiri bem kwarosolat wolmin-o. Alat nde, an-nen-e at indi amawi rak posola, ’Kit Isarael nab-e mberer-o’ luk yak kunduwa bug-o.

²² Iri yosola-ge, nagawan iri-ge yu nggal yak turag-o: ’Nagawan Indo at-nen yosolar-e: ”Isarael iri-ge an nambara manggiya nen yusu-o.

²³ Nde, an nene namawi min kat watsa kebem posolar-e, an nerembel wil mburuwak-nen an nambara iri-ge lera keya ibi-o yigi-t nde, kar-e tena unpusu me, yawo-ge kat kambara manggiya iri-ge wirimin-o” luk Nagawan Indo-nen yij-o’ yak turag-o” jak tij-o.

²⁴ Nde, Musa na Mesira mborosolat tundumu o sare misik me nene yosoma-ge, Nagawan Indo-ge Musa eram lobok yosolat, Musa na wereyekluk yij-o.

²⁵ Wereyekluk yosoma-ge, Musa ogwe Sipora-nen e nggibik kerep-nen konidnak anggat worak iri na bem ambara na iye ambesap mbararik, aboro mbaridnak erep iri na-ge Musa ujok pem posolat-nen yosolar-e: ”Nun kar-e eyabi wirik poso-nen yusu-o” luk yij-o.

²⁶ Nde, Sipora-nen yid iri-ge iniye ambasap mbarugwi bem yij-o. Nde, Nagawan Indo-nen Musa wururak yid iri na-ge keya bamu-o.

²⁷ Nde, iri kwarogola-ge, Nagawan Indo-nen Arun yak tosolar-e: ”Kar-e Musa imin lid pid yonok-nen nembaga nggwe mbiri-o” yosoloma-ge, Arun na-ge mberarik Nagawan Indo Mbal Pem Nagawan ondobo iri na bem owot Musa imin lambuk luk, wa yak tij-o.

²⁸ Iri lug-e, Musa-ge Nagawan Indo-nen Mesira ndimirik obosolat-nen yak tid ereba na-ge oboksa ndindera Arun yak tosolat, at-nen mondok kwarurak kwiye worak mende ereba na min-et oboksa pendega yak tij-o.

²⁹ Yak turug-e, Musa min Arun min mbirigarik, Mesira wok yogolar-e, it Isarael nap ennggendumu-nen enne kulugwi nap ereba na oboksa ndok worak unpurug-e,

³⁰ Arun-nen-e Nagawan Indo-nen Musa yak tidnak wene ereba na-ge it inmbiri bem kwarij-o.

³¹ Kwarosola-ge, it-nen-e ndemerer-o luk yebet kaiga-o. ”Nagawan Indo-nen kit lombot konposolat, kit anggun panggun tak kinpili na keneyasur-o” luk yak ondogola, kulurug-e, ir-e entare nggwe tud luk, Mbal Pem Nagawan erembel waniga-o.