MBIRIGA WENE 34 - Nanduk Ngget Tul Pidnak Wene

Tuguruk kerep mberen konidnak wene 34:1-9

¹ Missik tarem-e Nagawan Indo-nen Musa yak tosolar-e: ”Kerep nanduk mberen ereya na nggal koni-o. Konosola-ge, an-nen wene kerep nanduk kat-nen ndamera keya bigen ereya bem mbarak ereya na-t kerep konugun ereya bem tuguruk mbarak pimin-o.

² Iri ala, kar-e kub e an neram ndobo bem ludtak pem mondok lid lud tak puruk wolmin-o.

³ Ap misiger-o luk tet mondok kimin lorak puk. Ndobo iri eralu nggwe tet mondok wok yurak pug-o. Sapi na irit, lomba na irit, ndobo iri ayo bem tusuangge taruwakluk lerak nak keya burak pug-o” yij-o.

⁴ Yosoloma, Musa na-ge kerep abak mberen konurug-e, kub-e mondok kubu kabu Nagawan Indo-nen yak tid iri na ndak ndag-et kerep ereya na ge Sinai ndobo bem waruk lagaij-o.

⁵ Lasola-ge, Nagawan Indo-ge nggan nggan mbi arem mbuwasolar-e, Musa worasu sa iri na me men luk at unu marak Nagawan Indo iri na yij-o.

⁶ Iri luk, Nagawan Indo Musa erare nggwe mborosolat-nen ene nggoksa yosolar-e: ”Nagawan Indo an-e nindi konak Mbal Pem Nagawan, ap unpud kaso elem-nen yusu-o. An-e ap unpud mondok kwarat kaso, mot mot nak yoso, ndag-et nisilepma yoso buk-nen yusu-o.

⁷ An-nen enabuwa kasolar-e, ap nderak pem lud kwarat enabuwa yosolat, it meya yidnak nemberam tak inpimin-o. Alat nde, meya lugud tak kwatli nab-e mondok abu abu angin worak enpem posolar-e, ineidtak-nen meya yidnak pem-e at ilirak-nen na, oworak omborak-nen na, ap tap kenan pem ala na, tap empat pem ala na, mondok angin worag-et enpem posolat woramin-o” luk yij-o.

⁸ Yosoloma, Musa na-ge ereya na-net erare nggwe tud luk Nagawan Indo erembel wanosolat-nen yosolar-e:

⁹ ”Nagawan Indo wa-e. Kat nde ndemeret kalen nebem poso ala-ge, nab-o. Mondok ninmin mbururak kindi koni-o. Nde, ap enlem yu-ge wene kulugwi buk lem-nen yili-o. Alat nde, nit-nen lugud tak kwarugwi min meya kwarugwi min kamberam tak puruk, nir-e kat kelem nap tag-et nunpurag-o yij-o.

Urul yak indid ereba na ngget tak pidnak wene 34:10-28

¹⁰ Nagawan Indo-nen Musa yak tosolar-e: ”Yawo an-e Isarael nap urul yak indimin-o. An-nen-e nggweyak ma yu me-nen yi ap ndi ap oboksa ennggendumu kwat yosola kagwi buk mende kwarat it inmbiri bem kwarimin-o. Nagawan Indo an-nen-e kit kenmanggim-e kagwi buk mende kwiye worak kwarosola-ge, yi ap ndi ap-nen kujwa-o.

¹¹ An-nen imiri mbarak pidnak wene yawo wok kundusu yu-nen yidnak yidnag-et kwarurag-o. An-nen-e Amori nap min Kanaan nap min Et nap min Peris nap min Ewi nap min Yebus nap min inmin kit nde wim nggogola-ge, ananen wirik inpimin-o.

¹² Kit-nen ennggendumu nggugup nap ereba inmin-e mondok mondok kundurak pug-o. Kit-nen nde inmin kundugup ala-ge, kit wat yurak kondomok kenare pugub-o.

¹³ Iri ala, kir-e iri nggal-e kwarurak pug-o. Are, unkugwi amanggim pugwi ondoro-ge mijara keya bogolat, it unkugwiwak na ndamera keya bogolat, it-nen unkugwi Asyera iri erembel wanugwi e sindil lobok yidnak ereba-ge ndarak pogolat kwarurag-o.

¹⁴ Kir-e Mbal Pem Nagawan nin mbi erembel wanurak pug-o. Nagawan Indo Mbal Pem Nagawan an-e nin mende nan mende min ndak ndak tak nuburag-e mondok nisili-o.

¹⁵ It-nen unkugwiwak erembel wanogolat, amanggim wam wosa saguwarik, nonggolar-e: ’Ndak nog-o’ luk yak kondogola, nunggup naru, it inmin-e mondok are kundurak pug-o.

¹⁶ Kit kinlirak-nen nde erem nin kweyap wanogola-ge, onkwerak-nen ndowaga an keya nuburuk it unkugwiwak nde erembel wanuwa-o.

¹⁷ Posid pem-nen mbi ndak worak puruk, ndak wiridnak mende iri na erembel wanurak pug-o.

¹⁸ An-nen nanduk kit kenpem posolar-e waneya nandug-et (Abib) iri arem-e kir-e Mesira keya buruk mbiridnak me, ’Waneya iri arem-e Oroti Lomboroso Mende Pigit lak oroti nonggolar-e, tuju tarem wolmer-o’ yak kindigi na ndak ndag-et kwarogolat wolmer-o.

¹⁹ Nde, li ap manggiya min wam kusi nandug-et ndagidnak min oboksa-ge an narengge-nen yusu-o.

²⁰ Alat nde, kelerai marik kusi nandug-et ndagidnak iri na ondolma-ge lomba wam amarik misik namanggim Wosa kan purag-o. Nde, kelerai amarik kusi iri ondolma purak kinmbit ala-ge, kelerai iri-ge mondok urusuwak tenggerak purag-o. Nde, kinlirak manggiya nderak oboksa ondolmasa wam wosa an namanggim purag-o. An namanggim purak ininggem lak-nen-e ap misiger-o luk tet an neram mondok lobok yurak pug-o.

²¹ Yabu wanugwi tarem-nen na irit, ebe mbarugwi tarem-nen na irit, kininggi wanurak tarem-e enam tarem ya worasu-o. Nde, tuju bem tak pogolar-e, mondok yabu wanurak pug-o.

²² Kit-nen keneyapmu yagidnak mende ogore yosola-ge, Anggul-et Mbarugwi Tarem iri-ge yebet kagolat nggok sagurag-o. Iri yebet karuk, imbirik olengen iri nggobok yekluk yosola, kit-nen engen kerengen mbarugwi tarem-e Engga Kerengga Wi Wutluk Sakwi Tarem yebet kudtag-o.

²³ Olengen misik arem kenan pem kit ap oboksa-ge Nagawan Indo Isarael Enmbal Pem Nagawan an nerembel wil lobok yogolat wolmomtag-o.

²⁴ An-nen yi nap ndi nab-e kit kennggendumu-nen sera wirik onposolat, kondoro terak tak posolat kwarumu-ge, Oroti Lomboroso Mende Pigit Lak Worakwi Tarem min Yagidnak Mende Anggul-et Mbarugwi Tarem min O Lije Engga Kerengga Wi Wutluk Sakwi Tarem min yebet kil mburugupmu-ge, ap misiger-o luk tet-nen kwiye lag-et kunuwi nggweyak mangga wanuwa bug-o.

²⁵ Kit-nen wam urusu mbara an namanggim kan pugwi tarem-e oroti lomboroso mende min-nen konidnak oroti-ge mondok purak pug-o. Nde, Wot Kaidnak Tarem yebet kagolat-nen wiridnak mbarag-e yugu nene yurak pug-o. Mondok ndegera nak norag-o.

²⁶ Nagawan Indo Kenmbal Pem Nagawan an nama waruk lobok yogolar-e, konnggweyak pem yagidnak nandug-et mbaridnag-e olengen ndak wosa pempa waruk lobok yurag-o. Lomba amarik mbarak min kambing amarik mbarak min-e ambik ija agamo engen min-e sagurak pug-o” yij-o.

²⁷ Nagawan Indo-nen Musa yak tosolar-e: ”An-nen kat min Isarael nap min kinmin kondosolat-nen urul yak kundusu me, wene ereba-ge engga bem mbari-o” luk yak tij-o.

²⁸ Nde, Musa Sinai ndobo bem Nagawan Indo imin woralar-e, kubu-nen lengge-nen empat pulu tarem woralar-e, nunggwi mende min yi min mondok ninggit lak woragij-o. Mbal Pem Nagawan-nen urul yak indidnak imiri mbarak pidnak wene sepulu iri-ge kerep abak mberen iri na bem mbarij-o.

Musa Sinai ndobo bem-nen mbuwagid wene 34:29-35

²⁹ Nde, Musa Sinai ndobo bem-nen mbosolar-e, wene imiri mbarak pidnak wene sepulu mbarak iri na waruk mbij-o. Nde, Musa na-ge Nagawan Indo imin wene mbal tenak wiridnak me, at erare-ge abinal worak irit mbij-et nde, at ondomog-e nerare abinal worag-o luk aru buk irit mbuwagij-o.

³⁰ Nde, Arun min Isarael nap min oboksa min-nen-e Musa erare abinal worak iri na karug-e, Musa eram panggosa lorag-e kwiye kwarat yiga-o.

³¹ Alat nde, Musa-nen-e Arun min Isarael nap ennggendumu-nen enne kulugwi nap min wene mbo onposoloma-n perak Musa eram panggosa lobok yogola-ge, Musa-nen wene yak indij-o.

³² Iri lug-e, Isarael nap oboksa Musa eram ndok worogola-ge, Sinai ndobo bem-nen Nagawan Indo-nen ebem pid wene ereba na oboksa yak indij-o.

³³ Wene ndegera yak undurug-e, Musa na-ge erare-ge sum pem-nen lumurak pij-o.

³⁴ Pempa Musa nde Nagawan Indo imin wene mbareyekluk Nagawan Indo ama na nggosolar-e, erare lumurak pidnak sum na-ge waburuk, ngguruk, wasolat na iniksa-t wasoluk Nagawan Indo-nen yak indidnak wene oboksa yak ondosola-ge,

³⁵ it-nen-e Musa erare-ge abinal worak kagwi-o. Nde, wene yak undurug-e, tuguruk erare na-ge limirik puruk, nde, misik pem Nagawan Indo imin wene mbareyekluk nggosolar-e, sum na waboso-o.