MBIRIGA WENE 33 - Nanduk Ngget Tul Pidnak Wene

Nagawan Indo-nen Isarael nap ”Sinai Ndobo bem-nen mberer-o” yak tid wene 33:1-6

¹ Nagawan Indo-nen Musa yak tosolar-e: ”Yu me keyab buruk, kat-nen Mesira-nen inmin lobok yigen nap iri inmin luk, Abarakam min Isak min Yakup min it-nen wigarak min ’Wok kindimin-o’ luk urul yak indigi sa iri na me mberer-o.

² Mborogola-ge, kit lit kunpuruk mburuwakluk aid nap misik pil lobok yimin-o. Nde, an-nen-e Kanaan nap min Amori nap min Et nap min Peris nap min Ewi nap min Yebus nap min-e an-nen langgara wirik inpimin-o.

³ Kir-e o nggweyak amburu worak, yi mende ndi mende na kwarat mboroso sa mburugub-o. Alat nde, kit kenlem yu-ge kinndi amawi ala karuk, an-nen tundumu lak tak kinpimin naru mondok kinmin-e mbirimin pug-o” yij-o.

^4-6 Nagawan Indo-nen Isarael nap yak unduwakluk Musa-ge yu yak tij-o: ”Kit kinndi amawi kenlem yu-ge, an nde kinmin mborosolat nggal-e, yanem-et nak kir-e pendega lak tak kinpimin-o. Iri bem-e an-nen kit kwat kunpurak iri kayek-nen kit kinmirik kunmuruk pugwi mende ereba-ge abu abu mondok yonggora keya ber-o. Nde, an-nen kwat kunpurag-e nindi konimin-o” yij-o. Yosoloma, Nagawan Indo-nen met inpid iri na kulurug-e, anggam wat yosoma indi puru yoso nggal inndi puru kwarat luk, inmirik unmuruk yonggora abu abu keya biga-o. Iri luk, Sinai ndobo keya buruk mbiriga kuri-nen inmirik unmurug-e Isarael kweyab-e mondok pugwi buk irit woraiga-o.

Nagawan Indo uwi Isarael nap ennggendumu woragid wene 33:7-11

⁷ Nde, Isarael nap nde o lije wiril lobok yogola-ge, Musa-ge Nagawan Indo uwi lije iri na-ge mboksa erepma nggal woroso-o. Nde, o lije iri unu-ge Nagawan Indo Uwi Lije. Ta-nen nde Nagawan Indo imin lambuk yurak indi perasolar-e, o lije iri na me mburugwi-o.

⁸ Nde, Musa nde o lije iri na me mborosoma-ge, Isarael nab-e it unuwi lije tumende bem woragolat-nen Musa nggosola, yik karok woragwi-o.

⁹ Nde, Musa na nggosola-ge, nggan nggan lang tak mbi-ge o lije tumende bem mbuwasolar-e, iri me laringsa ndong yosolat, nggan nggan iri na arem-nene Nagawan Indo-nen-e Musa imin wene mbaroso-o.

¹⁰ Nde, it Isarael nap-nen nggan nggan lang tak iri na nde Nagawan Indo uwi lije iri na tumende bem laring tak worala-ge, ir-e ondomok tak unuwi tumende bem lombok-nen entare nggwe yud tud mbugwi-o.

¹¹ Nde, Nagawan Indo min Musa min-nen wene mbarogolar-e, ap-nen ennggam yik karok-nen wene ndurugwi nggal irit mbarugwi-o. Wene mbatlug-e, Musa na-ge tuguruk o lije worak sa mboroso-o. Alat nde, Musa yongga woroso nap ap sujwe Nun ambara Yosua na ge Nagawan Indo uwi lije ma iri na me-t indiyabu woraso-o.

Nagawan Indo-nen-e ”Isarael nap kinmin-et woramin-o” luk urul pidnak wene 33:12-23

¹² Misik tarem Musa-nen Nagawan Indo yak tosolar-e: ”Nagawan Indo wa-e. Kat nen-e an nimin-e ’Isarael nap yu lit eneyaruk, an-nen urul yak kindigi sa mbiri-o’ yak nurusu-t nde, kat-nen neyasolat, kalen nebem posolat na kwarusu-t nde, an yongga nururak nab-e ’At iri-nen yongga kururak wirik pil lobok yigi iri-o’ luk yak nurusu buk yu-ge ngge-o?

¹³ Iri ala-ge, Nagawan Indo wa-e. An-e pempa kat ndegel kobosolat kalen tak posolat worayek-nen kat-nen kwarurak kindi arem yemnak pigen iri mirik nibi-o. Nde, Isarael nap yu-ge kat-nen lena wok inpigen kat karengge nar-o” luk yak tij-o.

¹⁴ Yosoloma, Nagawan Indo-nen yosolar-e: ”An-nen urul yak kindigi nggweyak iri na wunde yobokluk an-nen kinmin-et mbirimin-o” luk yij-o.

¹⁵ Yosoloma, Musa-nen yosolar-e: ”Nagawan Indo kat nde nimin mbirigit lak yurak-nen-e ’Yu me keya buruk mberer-o’ yak nundurak pug-o.

¹⁶ Kat nde nit ninmin mbirigit lak yosolar-e, kat-nen an min kat kelem yu min-e kalen nenpem pusu iri-ge nggesa-nen it mbepme nggwe-nen enaru ma-o? Kat nit nennggendumu worasu iri bem-nen nit nggweyak ma yu me woragola-ge, yi ap ndi ap ennggendumu-net nde, nir-e arik lenak nunpusu-o” luk yak tij-o.

¹⁷ Yosoloma, Nagawan Indo-nen Musa yak tosolar-e: ”Kar-e an-e naru-o. Nalen kebem poso me, kat-nen nggi yak nirigen iri-ge abu kwat kibimin-o” luk yij-o.

¹⁸ Yosoloma, Musa-nen nggi yosolar-e: ”Nagawan Indo wa-e. Kar-e worasu-o luk naru yek-nen keyaya mirik nibi-o” luk yij-o.

¹⁹ Yosoloma, Nagawan Indo-nen yosolar-e: ”An lobok yosolar-e, an nabinal oboksa ge kat kerare nggwe mborosolat, an nunu mondok marak iri-ge kimbiri bem yil yil mbirimin-o. An-e Nagawan Indo-nen yusu-o. An-nen unpud kaso elem mirik onposolar-e, an-nen mondok len inpimin nap irit enabuwa kamin-o.

²⁰ Nde, an nerare-ge ap-nen kudtak na meya, nerare kaidnak nap-nen na uruk wolmomtak na meya-o. Iri ala karuk, kimbiri bem nerare nuk kamin pug-o.

²¹ Nde, an neralu ponok nggwe-ge kat mendak wolmomtak sa kerep ndobo amun mbi worasu-o.

²² An wok yosolat nabinal mborosola ge, an-nen kerep ndobo iri bem urumu mbi me kuburuk, ninggi-nen lumurak kuburuk woramindik, an lumu yosolat-net keya kibimin-o.

²³ Mborosolar-e, nombol nggwe nak kanokluk ninggi lit karuk mbirimin-o. Alat nde, nerare-ge mondok kagun pug-o” luk yak tij-o.