MBIRIGA WENE 32 - Nanduk Ngget Tul Pidnak Wene

Emas pem sapi wam misik ndak wiridnak wene 32:1-35

¹ Nde, it Isarael nap-nen-e Musa Sinai ndobo bem lagaid iri na ndag-et mbuwagit lag-et worala karug-e, Isarael nab-e Arun eram ndok worogolat-nen yak togolar-e: ”Mesira-nen lit nunpuruk lobok yid nap Musa na-ge yawo-ge ngge kwat yidnak worasu? Nit nenaru bug-o. Iri ala karuk, yawo nit lit nunpuruk mbururak mbi nenmanggim ndak wiri-o” yak tiga-o.

² Iri yogola-ge, Arun-nen yosolar-e: ”Konkwerak min kinlirak min eneyanggo sumbanok emas-nen konidnak ereba yonggora an wok niril lobok yer-o” yak indij-o.

³ Yosoloma, it ondomok tak eneyanggo sumbanok emas ereba na yonggora Arun eram pil lobok yiga-o.

⁴ Pil lobok yogola, Arun nen eneyanggo sumbanok emas ereba-n wanarig-e, kan ma woraburuk, yi nggal kwat yosola, sapi nggal ndak wosa labuk yoso sa iri na me pil nggwamu, emas-nen konidnak sapi misik ndak wosa labuk yij-o. Iri ala it-nen yogolar-e: ”Isarael nap wa-e. Yu-ge Mesira-nen lit nunpuruk lobok yid Nenmbal Pem Nagawan-e yur-o” luk yiga-o.

⁵ Iri rak purug-e, Arun-nen-e sapi emas-nen ndak wiridnak eralu-ge wam wosa kan purak ondoro kona ndama pil larug-e, at-nen yosolar-e: ”Kub-e Nagawan Indo kek tak pogolat saguwog-o” luk yak indij-o.

⁶ Yosoloma, nene luk, kub-e Isarael nab-e usu worak mende erep waruk lobok yogolar-e, wosa kan purak min worogolat, nde, ereb-e at imin kunduwokluk wirigarik, nonggolat, yi nonggolat kwarogoluk, men yogolar-e, kwe lak lak, ap lak lak keyari pogolat woraiga-o.

⁷ Iri yogola, Mbal Pem Nagawan-nen Musa yak tosolar-e: ”Kar-e ndag-et nak mbi-o. Kat kelem nap Mesira-nen lit unpuruk lobok yigen ereba na-ge meya kwatli-o.

⁸ Ir-e an-nen yidnak wene-ge keya buruk, lugud tak nggwe mborogolar-e, emas omok wosa sapi wam mbi ndak wutluk, kek tak pogolar-e, amanggim wam wosa pogolat-nen yogolar-e: ’Yu-ge Mesira-nen lit nunpuruk lobok yid Mbal Pem Nagawan iri nar-o’ luk yili-o.

⁹ Nde, it ap yu enlem yu-ge inndi-ge mondok kerep nggal-nen yusu-o luk an-e naru-o.

¹⁰ An-e larok tak nuburak pug-o. An nisilepma onposolat, mondok lak tak inpimin-o. Alat nde, kat min kat-nen wigarak min-e ap enlem nggok misik kwarak kinpimin-o” luk yij-o.

¹¹ Yosoloma, Musa nen Nagawan Indo Ambal Pem Nagawan emengen mbarosolat-nen yosolar-e: ”Nagawan Indo wa-e. It yu-ge kat-nen tena unpuruk kinggi amawi bem Mesira-nen inmiri yaga wok unpuruk lobok yigen na-t nde, kar-e noluk-nen iri kwat unpugun-o?

¹² Kat-nen nde it lak tak unpugunmu-ge, Mesira nap-nen yogolar-e: ’Enmbal Pem Nagawan-nen Mesira-nen it lit unpuruk mbirid na-ge ndobo worak sa ereba-nen unduruk pendaga lak tak enpeyekluk nen inmin mberamu-o’ luk yuwa me, Nagawan Indo wa-e. Iri nggal-e kwat unpurak pug-o. Iri kwarurak peraigen iri-ge mondok larok yi-o. Kat kelem nab-e lak tak unpurak pug-o.

¹³ Kat ndegel kubugwi nap Abarakam min Isak min Yakup min yebet eneyasolar-e, kat-nen urul owak mbara watsa yak ondosolar-e: ’Kit nen wigarag-e wonaru mbal pem abu nggal kwarat ma-o’ luk urul yak ondosolat, ’O iri na oboksa-ge kit-nen wigarak winde yuwarik, pem-et woralik nalik irit ombo wolma-o’ luk urul yak indigen iri na yebet ki-o’ luk yak tij-o.

¹⁴ Yak tosoloma-ge, Mbal Pem Nagawan-nen-e at elem nap enpem lak tak unpurak mende enpem mberak purak indi konid iri na-ge larok yij-o.

¹⁵ Nde, Musa na ndobo bem-nen mbuwasolar-e, kerep abak mberen Mbal Pem Nagawan-nen imiri mbarak pidnak wene ponok ponok mbarak irit waruk mbuwagij-o.

¹⁶ Kerep mberen ereya-ge Mbal Pem Nagawan ondomok-net kwarak puruk, imiri mbarak pidnak wene-ge at-net kerep ereya bem mbarij-o.

¹⁷ Nde, ndobo bem-nen mbuwagolar-e, Yosua-nen enne sa nggwa kulurug-e, Musa yak tosolar-e: ”Wim nggogolat enne nggu nggal o lije wiridnak sa-nen yili-o” luk yak tij-o.

¹⁸ Yosoloma, Musa-nen yosolar-e: ”Enne ereba-ge wim ngguruk ombol nggwe yuruk korang yugwi nggal na lak, urugwe nggwe rak onposoma-nen enne yugwi nggal na lak, are, ap-nen ndawi yili nde ma-o” luk yij-o.

¹⁹ Musa na o lije wiril lobok yidnak sa panggosa ndobo na ayo bem mbosolat-nen yik kagidnggal-e, emas pem sapi wam nggal ndak worak iri karuk, ab-endawi ndurukmu eneyarug-e, Musa na isilepma wu yosolar-e, iri na me-net kerep waruk mbuwagid iri na-ge mbo bidnggal ndamera labuk yij-o.

²⁰ Iri rak purug-e, Isarael nap-nen ndak wiriga sapi iri na wanosolar-e, kan ma woraga yigisa mabe rak pij-o. Iri rak purug-e, yi min naruk karuk tak puruk, Isarael nap mak indij-o.

²¹ Iri yosolat-nen Arun yak tosolar-e: ”It-nen-e kar-e no kwat kobogola-nen keya inpigenma, meya nggok yu-ge kwariga-o?” yak tij-o.

²² Yosoloma, Arun-nen erep nggarosolar-e: ”Kar-e an met nuburak pug-o. It ap yu-nen mondok meya kwarurak puruk inndi-ge karu nar-o.

²³ It-nen yak norogolar-e: ’Mesira-nen wok nunpuruk lobok yid Musa na-ge lag-et yu-ge, ngge kwat yidnak worasu-o? Nit lit nunpuruk mbururak mbi ndak wiri-o’ yogola,

²⁴ an-nen yak ondosolar-e: ’Kir-e kunmuruk pugwi mende emas-nen konidnak ereba ndegera an neram pil lobok yer-o’ yak ondosola-ge, it-nen neram pil lobok yogola, an-nen ndegera kan ma posola, yi nggal kwatluk, sapi yu ndak wosa labuk yij-o” yak tij-o.

²⁵ Yosoloma, Musa-nen yik kasolar-e, Arun-e Isarael nap iri-ge kwara yik eneyarok woragit lak, we mbilak ereba-t keya inpidnak irit kagaij-o. Iri kwarid iri-ge it unuwim nap-nen nda undurak irit kwarij-o.

²⁶ Karug-e, Musa na o lije wiridnak ma nggugwi tu ndanggi bem men yosolar-e: ”Ta-nen nde Nagawan Indo ambigit yosolar-e, yu nggwe lobok yurag-o” luk ene nggoksa yosoloma-ge, it enlem Lewi nab-e lobok yogolat Musa lop lop wiriga-o.

²⁷ Iri yogola, Musa nen it yak ondosolar-e: ”Isarael nap Enmbal Pem Nagawan, Nagawan Indo-nen kit kenarik tak kenpem posolar-e, kir-e yawo-t tu ndanggi yu me-nen ndanggi nin me kenkabo kud turuk, o lije wiridnak sa waring kagolat, kit konowe konowot min kenggamirak min kentalu woragwi nap min mondok undurag-o” luk Lewi nap yak ondosola-ge,

²⁸ it Lewi nap-nen-e yak indid iri na ndak ndag-et kwarogolar-e, iri na tarem-et ab-e tiga ribu (3.000) nggal abu indiga-o.

²⁹ Ondogolikma-ge, Musa-nen Lewi nap yak ondosolar-e: ”Yawo-net kir-e tepan ombo lena labuk yogolat, Nagawan Indo ndegel obogolar-e, kinlirak min konowe konowot min indigeb-o. Iri yigep pem-e Nagawan Indo-nen imbiringgat tak kinpij-o” luk yak indij-o.

³⁰ Nene luk kub-e Musa-nen Isarael nap yak ondosolar-e: Kir-e mondok meya nggok kwarigeb-et nde, an-e Nagawan Indo eram tuguruk ndobo bem lamin-o. Lamindig-e, kit-nen meya kwarigep iri-ge amberam tak kunpuwa nde ma-o” yak indij-o.

³¹ Iri luk, Musa na tuguruk Nagawan Indo eram lagarig-en yosolar-e: ”Isarael nap na-ge meya nggok misik kwarigarig-o. Iri-ge Mbal Pem Nagawan misik emas pem ndak wirigarik, erembel waniga-o.

³² Iri ala it meya kwariga iri-ge kamberam tak unpurag-o, nab-o. Nde, kamberam tak inpigit lak nde ala-ge, unluk wolmomtak engga bem-nen an nunu-ge korak purag-o” yak tij-o.

³³ Yosoloma, Nagawan Indo-nen yosolar-e: ”Unluk wolmomtak engga iri bem-nen unnu korak purak iri-ge an nimin meya kwarugwi nap unnu perak korak pimin-o.

³⁴ Kar-e mburugundik, it inmin luk o unu yak kirigi sa iri na me mbiri-o. Mborosola-ge, an-nen idnak aid nap-nen-e ndegel kuburuk mburuwa-t nde, it meya yidnak iri-ge an nen enpem wene mbarurak tarem-e awo worasu-o” luk yak tij-o.

³⁵ Iri lug-e, it-nen enne amawi bem watsa Arun yak togola, Arun-nen emas-nen konidnak sapi iri ndak wiridnak me, it ap ereba na-ge Nagawan Indo-nen-e lak tak unpurak mende enpem mbarak pij-o.