MBIRIGA WENE 3 - Nanduk Ngget Tul Pidnak Wene

Mbal Pem Nagawan-nen Musa wene mbo ibidnak wene 3:1-22

¹ Nde, misik tarem-e Musa-ge abak tepan ombo Mirian iri me woraso Yitero owam kambing min lomba min ereba na ndogorosolat woragij-o. Nde, Musa na wam ereba na ndugulug-e ele bem nggal ereba-t ndil lasolar-e, Ndobo Sinai, Mbal Pem Nagawan ondobo iri na me wok yij-o.

² Nde, iri na me wok yosoma-ge, Nagawan Indo-nen yidnak aid nab-e e sujwe ereba na enggendumu kan mare pagosola-ge, kan mare iri na arem-nen-e aid nab-e kenangga at imbiri bem nam yij-o. Nde, Musa-nen-e e suwje ereba na-ge pagosola kagij-et nde, kan-e ninggit lak kagij-o.

³ E sujwe-ge amare lasola-t nde, ninggit lak karug-e: ”Yu-ge kwiye worag-et kagi. Korok korok mbirimindik-nen kayeg-o” peragij-o.

⁴ Peraruk mborosoma-ge, Nagawan Indo-nen-e Musa na korok korok mborosola karuk, kan mare iri na enggendumu-nen Nagawan Indo-nen yosolar-e: ”Musa! Musa!” yosoloma, Musa-nen yosolar-e: ”An-e yu me-o” yij-o.

⁵ Kar-e yu me panggo yusu ge meyog-o. Kat mendak worasu iri me-ge an woraso nggweyak mondok lenak-nen yusu me, kuwok sum iri-ge yonggora keya bi-o.

⁶ An-e komborak Abarakam min Isak min Yakup min Enmbal Pem Nagawan nen yusu-o” yosoloma-ge, Musa na-ge Mbal Pem Nagawan kamin naru kwiye-nen erare kuragij-o.

⁷ Nde, Nagawan Indo-nen yosolar-e: ”Mesira iri me-nen an nilirak iri andi bandi rak inpili iri-ge an-e abu eneyagi-o. ’Nit anggun panggun tak ninpili nap ininggiyapma-nen wisirik nunpurag-o’ luk enne nggoksa nemengen mbarogola kuligi-o. It-nen andi bandi kali oboksa-ge an-e mondok ndemeret naru-o.

⁸ Iri ala karuk-nen an-e Mesira nap iri ininggiyapma-nen wisirik unpuruk, o terak wolmomtak sa mbi me inmin mbereyekluk-nen yu me mbuwagi-o. Nde, o iri me nggweyag-e mondok amburu worak, yi mende ndi mende na kwarar-o. Nde, yawo o iri me-ge Kanaan nap min Et nap min Amori nap min Peris nap min Ewi nap nim Yebus nap min worali-o.

⁹ Nde, it Isarael nap-nen yap tlli iri-ge an-e kuligi-o. Mesira nap-nen anggun panggun tak inpili iri na an-e eneyasur-o.

¹⁰ Nde, yawo-ge kar-e an nelem nap iri lit eneyaruk lobok yonokluk, an-nen Pirayon eram wirik kubusu-o” luk yij-et nde,

¹¹ Musa-nen Mbal Pem Nagawan yak tosolar-e: ”An nggal-net Pirayon eram mbirimindik, wene mbatluk Isarael nab-e Mesira-nen wok unpuruk lobok yurak ndag-a?” yij-o.

¹² Yosoloma, Mbal Pem Nagawan-nen yosolar-e: ”An-e yongga-t kirimin-o. Mbal Pem Nagawan-net wirik kebamu-o luk yenggerak kubuwaklug-e, kat-nen Isarael nap iri Mesira-nen lit yaga mengga wok unpuruk lobok yosolar-e, ndobo yu bem-nen an nerembel wanugub-o” luk yak tij-o.

¹³ Alat nde, Musa-nen onggo yosolar-e: ”An Isarael nap endam wok yimindik yak ondosolat: ’An-e kit konmborak Enmbal Pem Nagawan-nen kendam ndimirik nebamu-o’ yak ondosola-ge, it-nen kin wok nobogolar-e: ’Iri unu-ge ta-o?’ luk kin wok nobogola-ge, an-e wene onggo-ge no yimin-o?” yij-o.

¹⁴ Yosoloma, Mbal Pem Nagawan-nen yosolar-e: ”An-e AN-E WORASO-O. Wene yu-ge kar-e Isarael nap yak indi-o: ’Unu misig-e AN-E WORASO iri na-nen an-e kit kendam wirik nibil lobok yamu-o’ yak indi-o.

¹⁵ Kat-nen it yak ondosolar-e: Nagawan Indo an-e it onmborak Enmbal Pem Nagawan, Abarakam min Isak min Yakup min Enmbal Pem Nagawan an nak-nen it endam wirik kubusu-o. An nunu Nagawan Indo iri-ge pem-et woralik nalik irit wolma-o. Nde, an nunu Nagawan Indo iri-ge ap enlem oboksa nen ap pem lud pem yogolat wolma-o.

¹⁶ Nde, kar-e mburugundik, Isarael nap-nen enne kulugwi nap oboksa ndok worak unpuruk yak ondosolar-e: ’Nagawan Indo an-e kit konmborak Enmbal Pem Nagawan, Abarakam min Isak min Yakup min Enmbal Pem Nagawan iri na at ondomok-net an nimbiri bem nam luk-nen yosolar-e: ”An-e kit kendam lobok yigirik, Mesira nap-nen kwat kinpili iri-ge kasu-o” luk yij-o’ yak indi-o.

¹⁷ Nde, an-e it anggun panggun tak inpili Ia Mesira-nen lesa wok unpuruk, o nggweyak na amburu worak, yi mende ndi mende na kwarat sa mbi me wok unpuruk mbururak wat tak pigirik worasu-o. Nde, o iri me-ge Kanaan nap min Et nap min Amori nap min Peris nap min Ewi nap min Yebus nap min unuwi nggweyag-o.

¹⁸ An nilirak-nen-e kat kene-ge kuluwar-o. Kologola-ge, kat min Isarael nap ennggendumu enne kulugwi ereba inmin-e Mesira nagawan iri na eram mburugupndik, yak togolar-e: ’Iberani nap Nenmbal Pem Nagawan, Nagawan Indo nit nendam lobok yarik, ninmbiri bem nam yidnak me, nit-nen Mbal Pem Nagawan amanggim wam wosa emben wok togolat kan puwokluk mbogorolar-e, nembaga-ge tundumu mberen nene yuwok-nen kat-nen lerak ninpi-o, nab-o’ luk yak ter-o.

¹⁹ Yak tugub-et nde, an-e naru-o. Mesira nagawan iri-nen-e mondok lerak kunpuwa bug-o. Alat nde, watsa angin ebem pogola perak nde lerak kunpuwa-o.

²⁰ Alat nde, an namawi bem Mesira nap lak tak unpurak angin worak mende nin tak nan tak kwiye worak it enpem pil lobok yosola-n perak, at-nen-e ’Mberer-o’ luk lerak kunpuwa-o.

²¹ An-nen-e Mesira nab-e indi op tak pumu, kit mborogola-ge, silobulo kwarat wok kondogola, mburugub-o. Mondok we-ge mburugup pug-o.

²² Nde, Isarael kwami oboksa-nen-e it Mesira nap it totno lambuksa woragwi enpem na irit, o misiget arem woragwi kwami enpem na irit emas min perak min-nen konidnak unmuruk pugwi mende min sum min Mesira kweyap enpem nggi lug-e, kit-nen-e kinlirak li ap min li kwami min yirik unpugub-o. Iri nggal kwarogolar-e, Mesira nap enarengge mengga waruk mburugub-o” luk yij-o.