MBIRIGA WENE 24 - Nanduk Ngget Tul Pidnak Wene

Isarael nap-nen ”Mbal Pem Nagawan-nen yidnak wene-ge kwarul-er-o” luk watsa yidnak wene 24:1-11

¹ Nde, misik tarem-e Nagawan Indo-nen Musa yak tosolar-e: ”Kat min Arun min Nandap min Abiyu min Isarael nap ennggendumu enne kulugwi nap enpe tuju pulu (70) iri inmin luwagundik, ndobo eralu-ge keya buruk, erepma ereba mboksa woragolat, kek tak nobogolat, yud tud mber-o.

² Alat nde, kat nak perak an neram panggosa lobok yurag-o. Nde, ap ereb-e mondok lobok yurak pug-o. Nde, we nab-e mondok ndobo iri bem-e panggosa ludtak pug-o” luk yak tij-o.

³ Iri luk, Musa na it endam mberarig-e, Nagawan Indo-nen watsa yak indid wene min it-nen kwarurak mururak enpem pidnak wene oboksa min yak indij-o. Yak ondosoloma-ge, it-nen misik tarem-et nak enne leksa yogolar-e: ”Nagawan Indo-nen yid irit oboksa kwarul-o” yiga-o.

⁴ Yogolikma-ge, Musa-nen-e Nagawan Indo-nen yid wene ereba-ge engga bem mbatlug-e, kub-e ndobo ayo bem Mbal Pem Nagawan amanggim wam wosa kan purak ondoro-ge kerep duabelas pem-nen konij-o. Nde, kerep duabelas iri-ge Isarael nap enlem duabelas iri na ndak ndag-er-o.

⁵ Iri luk, Musa-nen-e ap sujwe erep wirik enpamu, it-nen-e Nagawan Indo amanggim wosa kan pugwi mende kan puruk, sapi wam erep wosa Mbal Pem Nagawan imin kondogolat kan piga-o.

⁶ Musa-nen-e sapi eyabi ereb-e yimbe arem wenenggasa posolat, ereb-e Mbal Pem Nagawan amanggim wam wosa kan pugwi ondoro bem kilik pij-o.

⁷ Iri rak purug-e, Nagawan Indo-nen urul yak indidnak wene mbarak iri na wanosolar-e, ap ereba na kuluwakluk ene nggoksa wonarosola-ge, it-nen yogolar-e: ”Nir-e pempa Nagawan Indo-nen yidnak yidnak kwarogolar-e, at-nen nenpem pidnak oboksa kwarogolat wulmul-o” yiga-o.

⁸ Yogola-ge, Musa-nen-e sapi eyabi yimbe arem kenanggo ereba na it enpem kolosolat-nen yosolar-e: ”Eyabi yu-ge Nagawan Indo-nen watsa yak kindidnak wene iri na bem-nen urul yak kindid iri na ebe kwarak pusu-o” luk yij-o.

⁹ Iri lug-e, Musa min Arun min Nandap min Abiyu min Isarael nap ennggendumu-nen enne kulugwi nap tuju pulu (70) ereya na inmin-e Sinai ndobo bem laigarik,

¹⁰ Isarael nap Enmbal Pem Nagawan iri na-ge kerep nilam-nen konidnak o kune o kibi bem kisikmbal erare ngal mbi bem mendak yik kaiga-o.

¹¹ Yik kaiga-t nde, enne kulugwi nap ereba na-ge Mbal Pem Nagawan-nen lak tak inpigit lag-o. Iri lug-e, nunggwi mende min yi min ningga-o.

Musa Sinai ndobo bem lagaid wene 24:12-18

¹² Iri luk, Nagawan Indo-nen Musa yak tosolar-e: ”Kar-e an neram ndobo bem luwasug-o. Yu me-nen an-nen imiri mbarak pidnak wene mbarak kerep abak mberen wok kirimin-o. Imiri mbarak pidnak wene oboksa mbarak iri-ge it enlem Isarael nap iri mirik unpurak pem irit wok kirimin-o” yij-o.

¹³ Yosoloma-ge, Musa min Musa ndegel oboso Yosua min-e lid lud tak purug-e, Musa na-ge Nagawan Indo woraso sa Sinai ndobo iri na me lagaij-o.

¹⁴ Lasolat-nen Musa-nen Isarael nap ennggendumu-nen enne kulugwi nap ereba na yak ondosolar-e: ”Kir-e worali sa yu me-t wolmer-o. Nir-e lobok yul-o. Nde, Arun min Ut min-e kinmin yu me-t wolma-o. Nde, ta-nen nde wene worala-ge, it-nen wene kona lak tak puwakluk it endam nak lobok yurag-o” luk yak indij-o.

¹⁵ Iri yak unduruk, Musa na Sinai ndobo bem lasola-ge, nggan nggan mbi-nen muruk tak ibij-o.

^16-17 Nde, Nagawan Indo woraso eyaya-ge ndobo iri na bem mbuwasola-ge, Isarael nap-nen yik kagolar-e, ndobo iri na anggul pem-e kan amare nggal kaiga-o. Nde, ndobo iri na nggan nggan-nen muruk tak woralar-e, enam pem woragij-o. Nde, tuju bem tak posolar-e, nggan nggan arem-nen Nagawan Indo-nen Musa wene mbo ibij-o.

¹⁸ Wene mbo obosoloma-ge, Musa na-ge lagarik, nggan nggan iri na arem nggwarik woralar-e, lengge-nen kubu-nen empat pulu bem irit woragij-o.