MBIRIGA WENE 23 - Nanduk Ngget Tul Pidnak Wene

Lud tak mot mot nak kwarurak wene 23:1-9

¹ Nagawan Indo-nen yosolar-e: ”Kir-e we ebe lak ennesiget wene iri na wigarurak pug-o. Nde, meya kwarugwi nap enambigit yogolat, kennesiget wene yurak pug-o.

² Ap kwarat-nen meya kwarogolat, imiri mbarak pidnak wene iri na lugud tak puwokluk ennesiget wene yogola-ge, kir-e inmbirik lambu nak yurak pug-o.

³ Ap enpem wene mbenarogolar-e, silobulo lak nap iri na ambigir-e yurak pug-o. Wene mot mot nak mbarurag-o.

⁴ Kit-nen kunuwim nap onowam kelerai ala na, sapi ala na kabak yidnak waring kasola kagupndig-e, arengge ombo iri na-t wok til mbururag-o.

⁵ Kunuwim nap egelerai wam nde angin worak ombol pem pidnak ereba na angin-nen erare nggwe merakusa mbud tak karug-e, keya burak pug-o. Are, ombo iri na yongga worosolat, kenmberek-nen mendak purag-o.

⁶ Isilobulo lak nap-nen nde owene waruk wene mbenarugwi sa wok yosola-ge, at owene iri-ge mot mor-et mbenarurag-o.

⁷ An-nen-e meya kwarugwi nap iri-ge meya-t yik eneyaso me, kir-e kennesiget wene ap enpem purak pug-o. Meya kwarigit lak nap iri na mondok wururak pug-o.

⁸ No bem-nen nggok yimin?’ luk, uang lesa wanurak pug-o. Lesa wanugwi iri-ge mot mot kwarurak na-t nde, enlengen ngguru rak posolat, meya kwarigit lak nab-et nde, meya enpem poso-nen yusu-o.

⁹ Kir-e nanduk ap sal Mesira iri me woragolat abur-e kenaru irit me, kir-e ap sal-e lel unpurak pug-o” yij-o.

Olengen tuju bem tak pogolat-nen kwarurak wene min we woragwi tarem-nen kwarurak wene min 23:10-13

¹⁰ Nagawan Indo-nen yosolar-e: ”Kir-e olengen enam arem ereya woragolar-e, yabu wanurug-e, uwi yaguruk, ebe pidnak ereba na mbarogolat wolmomtag-o.

¹¹ Alat nde, olengen enam woraruk, tuju arem nggogolar-e, mondok yabu wanurak pug-o. Nde, keya buruk, olengen iri arem woragola, uwi erambet tup marik engen yidnag-e, mondok kir-e mbara ndok wururak pug-o. Iri-ge insilobulo lak nap enmanggim-nen yusu-o. It-nen mbarogolat keya buwa ereba na towe mgna amanggim-er-o. Keneyapmu anggut engen min saitun engen min na iri nggal-et kwarurag-o.

¹² Minggu misik arem kit-nen yabu wanogolar-e, enam tarem nak wanurag-o. Alat nde, tuju bem tak pogolar-e, konowam min kit ndegel kunpugwi nap min ap ngguru yabu wok kundugwi nap min enpabok kwaruwakluk kir-e kenpabok kwarogolat we wolmomtag-o.

¹³ Nagawan Indo an-nen yak kindigi wene-ge kwara yebet ker-o. Kir-e Mbal Pem Nagawan nin mbi erembel wanurak pug-o. Mondok unnu anggambut tet yurak pug-o” yij-o.

Yebet kagwi tarem ereba na sakolat kwarugwi wene 23:14-19

¹⁴ Nagawan Indo-nen yosolar-e: ”Pempa olengen ndak wosa an kek tak nobogolar-e, wene kenan yu yebet kagolat, sakolat wolmer-o.

¹⁵ ’Iri kwarurag-o’ luk wat tak pidnak tarem waneya nandug-et (Abib) iri bem-e kir-e Mesira keya bidnak me, an-nen yak kindigi iri na ndak ndag-et oroti lomboroso mende pigit lak, we woraga nonggolat tuju nene yurag-o. Nde, tuju tarem ereya woragolar-e, oroti lomboroso mende puruk woraidnak oroti-ge mondok norak pug-o. Kit-nen pempa an nerembel wil lobok yogolar-e, an namanggim pugwi mende pil lobok yogolat wolmer-o.

¹⁶ Nde, misig-e olengen iri nggoboksa lak yosola ndak ndag-e kit keneyapmu-nen yagidnak anggut engen min engen kerengen min mbara ndok worogolat ereya na-ge kir-e O Lije Engga Kerengga Wi Wutluk Sakwi Tarem yebet kudtag-o.

¹⁷ Olengen irit wosa wene kenan ereya yebet kagolar-e, kit ab-e oboksa Nagawan Indo Kenmbal Pem Nagawan an nak nerembel wil lobok yurag-o.

¹⁸ Kit-nen usu worak mende namanggim wosa kan pogolat tarem-e oroti lomboroso mende pidnak oroti-ge mondok an namanggim purak pug-o. Kit nen yebet kagwi tarem ereya yebet kagolat-nen namanggim wosa kan pugup omog-e mondok parugu nene yurak pug-o.

¹⁹ Pempa olengen ndak wosa kit nen yagidnak mbato anggul mbara mbarugub-e Nagawan Indo Kenmbal Pem Nagawan an nama pil lobok yurag-o. Lomba marik ala na, kambing wam marik ala na, ija agamo amburu min-e mondok sagurak pug-o” yij-o.

Urul yak ondosolat, kwarurak enpem posolat yidnak wene 23:20-33

²⁰ Nagawan Indo-nen yosolar-e: ”Kit mborogola, nggetlel kunpuruk mburuwakluk an-nen idnak aid nab-e nanduk kenabuwok pil lobok yumu, wok kunpuruk, o an-nen kenmanggim lud tak pigi sa kinpil mburuwa-o.

²¹ Kir-e kwara yebet karuk, at nen yidnak yidnag-et kwarurag-o. At iri-ge an-nen ibil lobok yimin me, kir-e at imin eyak wururak pug-o. Kit-nen eyak worogola-ge, at-nen-e mondok amberam tak puwa bug-o.

²² Kit-nen nde at-nen yidnak yidnak kwarogolat, an-nen kenpem pidnak iri na-t kwarogola-ge, kunuwim nap oboksa inmin-e an-nen wim mbarimin-o.

²³ An-nen idnak aid nab-e lit kunpuruk mburuwarik, Amori nap min Et nap min Peris nap min Kanaan nap min Ewi nap min Yebus nap min woragwi sa kinpil mburuwa-o. Nde, ir-e an nen labera lak tak inpimin-o.

²⁴ Erem nin nap-nen erembel wanugwi kugwiwak ereba erembel wanogolat, it-nen kek tak pogolat kwarugwi abage ereba na mondok kit-nen mumururak pug-o. Unkugwiwak it-nen erembel wanugwi ereba-ge yigisa keya bogolat, it-nen erembel wanugwi kerep mot ereba-ge ndamerak per-o.

²⁵ Kit-nen nde Nagawan Indo Mbal Pem Nagawan an nerembel wanogola-ge, yi min nunggwi mende min-e wog-et kindimin-o. Kugwi na kunduwa naru, oboksa lak tak pimin-o.

²⁶ Kit woragup sa-ge kweyap li tosogolat, yibiri yogolat mondok kwaruwa bug-o. Kunluk wolmomtak na mot pem tak kinpimin-o.

²⁷ Yi ap ndi ap kit kindil lobok yili nab-e an-nen kwiye rak inpimin-o. Iri yosola, an naye yuwa-o. An-nen inndi nil kil tak pumu-ge, kunuwim nap oboksa kwiye-nen nggilarak mbu ndi yuwa-o.

²⁸ Kunuwim nab-e nari wari rak inpimin-o. Ewi nap min Kanaan nap min Et nap min-e it konowak ket wuruwa naru, kendam-nen langgara wirik inpimin-o.

²⁹ Wirik onposolar-e, olengen misik arem nak ndegera wirik inpimin pug-o. O aptupo yosolat, ndakngge isilepma worak panggo panggo ngguwasolat ma naru, siyag-et siyag-et wirik inpimin-o.

³⁰ Nde, it wirik onposolar-e, siyag-et wirik unpuruk, siyag-et wirik unpuruk kwat tenak worasoma, o iri me wolmomtak kit kenpe kwarat ala perak mondok mbereksa wirik inpimin-o.

³¹ Nde, an-nen kit wolmomtak nggweyak mbal kondosolar-e, yi Akaba koma kuri-nen yi Eperat kuri iri-nen yi koma enggendumu (Laut Tenga) kuri-nen ap lak kuri irit mbal kindimin-o. Nde, kit-nen iri me woragwi nap wirik unpurak pem-e an-nen namawi wok kundumu, kit-nen it inmin wim mbarogolar-e, langgara wirik unpuruk, kit-nen nggweyak iri-ge tenakub-o.

³² Kir-e it inmin kondogolat, it unkugwiwak na erep kambok turak pug-o.

³³ It-nen kek tak pugwi unkugwiwak ereba na kit-nen erep wanogolat, an nimin meya yugup naru, it iri-ge kit woragwi sa-ge mondok keya unpurak pug-o. Kit-nen nde it unkugwiwak erembel wanogolar-e, mondok kenare pugub-o” luk yij-o.