MBIRIGA WENE 21 - Nanduk Ngget Tul Pidnak Wene

Onggo pidnak nap kwat unpugwi wene 21:1-11

¹ Iri luk, Nagawan Indo-nen Musa yak tosolar-e: ”Kwarurak mururak yu-ge Isarael nap-nen kwaruwakluk enpem pi-o:

² Kit-nen nde Isarael nab-et nde ndegel kunpuwakluk onggo pugupndig-e, ndegel konposolar-e, olengen enam nak woraruk, olengen tuju rak pogolar-e, lerak purak pem mondok onggo pigit lag-et we lerak purag-o.

³ Mumnggup manggim iri nde kwe wanigit lak pem-net onggo pidnak ala-ge, wirik pogolar-et nde, at ogwe-ge imin wirik purak pug-o. Alat nde, ogwe worak pem-nen nde mumnggup manggim onggo pidnak nde ala-ge, at lerak keya obogolar-e, ogwe iri-ge imin mbururag-o.

⁴ At onggo pid nap eid iri na-nen nde kwe misik wok turuk, ilirak ndaguwarik pem-nen nde mumnggup manggim iri na lerak keya obosolar-e, kwe iri na ilirak inmin-e un onggo pid nap eid iri na arengge-t me, un iri na imin lerak keya unpurak pug-o.

⁵ Alat nde, ndegel oboso nap iri na-nen nde: ’An-e nogwe min nilirak min nonggo pidnak nap iri na min enabuwa-nen ndowaga keya unpuruk mbururak nde nimbir-o’ yosola-ge,

⁶ onggo ibid nap iri na-nen imin luk mbutlug-e, Mbal Pem Nagawan ama wok yogolar-e, ndegel oboso nap iri na-ge, ’Kar-e tu mende bem ala na, owak tumende manda iri na eralu men min-o’ yak turuk, ndegel oboso nap iri na-ge owak mak mak eyanggo uru pulurag-o. Iri-ge nde pempa onggo pidnak nap iri na nak ndegel obosolat mumnggup manggim kwat yosolat-nen eyanggoru pulurag-o.

⁷ Nde, kit Iberani kwami nde eid-nen ap-nen mumnggup manggim onggo puwakluk wene wuruwama, onggo puwama-ge, olengen enam iri na worarug-e, lerak keya burak iri-ge ap mumnggup manggim onnggo pidnak nap lerak inpili na nggal-e kwami-ge lerak unpurak pug-o.

⁸ Kwe iri na-nen nde at wok ebeyekluk onggo pid nap ombo iri na nde kwara indi alen tak pigit lak ala-ge, mondok tuguruk kwe iri eid iri na bem-et onggo wanurag-o. Ndegel oboso ombo iri na-nen ’Irit kwat kibimin-o’ luk urul pidnak iri na ndak ndag-e kwarigit lak, lugud tak kwat ibidnak me, erem nin nap enpem-e mondok onggo wanurak pug-o.

⁹ Ta-nen nde mumnggup manggim kwami nde ambara na wok turak pem onggo purug-e, at-nen at ondomok ara kwat ibidnak nggal-et kwat obosolat wolmomtag-o.

¹⁰ Un iri na-nen nde anggup kwe wanuwa-t nde, nunggwi mende bem-nen na, yururak sum pem-nen na imin nene yurak pem-nen na erem kwe kwat oboso iri na-ge kwat obosolat wolmomtag-o.

¹¹ Un-nen nde wene kenan ereya kwat ibigit lak yosolar-e, inggi uwi yakit lak we irit lerak keya uburag-o” luk yij-o.

It-nen insilepma bem-nen kwaridnak pem onggo kwat unpurak wene 21:12-27

¹² Nagawan Indo-nen yosolar-e: ”Ta-nen nde ap misik abu min wuruwama, at na mondok abu min-et wururag-o.

¹³ Alat nde, indi-net usuwa woraguruk-nen wirigit lak-nen-e, kwiye an-nen ondoro misik mirik kinpimin sa mbutluk, inmiri yurak sa iri me wolmomtag-o.

¹⁴ Alat nde, insilepma kwarat yogolat-nen indi-net ap misik nde wutluk, Mbal Pem Nagawan amanggim kan pugwi sa kurak yil mburuwama-ge, wil mbutluk, mondok wururag-o.

¹⁵ Ta-nen nde eid ala na, ija ala na worosola-ge, mondok abu wururag-o.

¹⁶ Ta-nen nde ap misik kuraga wanuruk, ap enpem onggo wanuwama ala na, irit eram ama worasola na irit, ap iri kwaridnak nap iri-ge mondok wururag-o.

¹⁷ Ta-nen nde eid min ija min imbiri lamut tak onposola-ge, mondok wururag-o.

¹⁸ Nde, yig nggogolat-nen nde ap misik-nen ap misik kerep pem ala na, inggi ndumbuk pem ala na wuruwama-ge, wat nde yigit lak worala-ge, wuruwa nap iri na ebem-e angin worak purak pug-o. Nde, ap iri na-ge wiridnak iri na-nen ndowaga mbiringgik worarug-e,

¹⁹ abok men luk wangun sindok mborosola-ge, at wuruwa nap iri na-net ndegel tenak worasoma, ki yosola-net keya burag-o. At worak worasolat yabu wanigit lak me, onggo-ge at-net wok turag-o.

²⁰ Ta-nen nde ndegel oboso kwami ala na, ap ala na, worosola ereya na-t wat yosola-ge, at na mondok angin worag-et ebem purag-o.

²¹ Alat nde, ndegel oboso nap iri na nde misik pem nggal, mberen pem nggal erengenwak worala-ge, ombo onggo pidnak nap iri na-ge angin worak ebem purak pug-o. At ndegel oboso iri nde wat yuwama-ge, angin worak ebem pidnak nggal-e at iri onggo posolat arengge pid ereba na uwi yak tigit lak ma irir-o.

²² Ap erep yig nggogolat-nen nde ap misik-nen kwe abila misik lek kujwarikmu nde, wiridnak sa ereba-ge andi-ge lag-et nde, la nak tososola, un iri na-nen ’Onggo-ge iniksa wok nururag-o’ yosola, wene mbarugwi nap-nen na ’Ob-o’ yidnak nde ala-ge iri na ndak ndag-et wok turag-o.

²³ Alat nde, kwe wiridnak iri na nde angin-et ala-ge, at wat yosola-ge, at wiridnak nap na mondog-et wururag-o.

²⁴ Enlengen onggo-ge, enlengen-et purag-o. Eneyak onggo-ge eneyag-et purag-o. Ininggi onggo-ge ininggi-t purag-o. Unuwok onggo-ge unuwog et purag-o.

²⁵ Tirok tak inpidnak onggo-ge tirok tak unpurag-o. Mep tak inpidnak ala-ge, mep tag-et unpurag-o. Mep nderak onposoma-ge, mep nderag-et unpurag-o.

²⁶ Ta-nen nde ndegel oboso iri na erengen tigirik puwama, erengen ngguru yidnak ala-ge, erengen onggo nggal-e we lerak keya uburag-o.

²⁷ Ta-nen nde ndegel oboso iri na eyak yenggara wuruwama-ge, eyak iri na onggo-ge ndegel oboso iri na we lerak keya uburag-o” luk yij-o.

Enarengge mende-n kwarosoma, onggo kwarurak wene 21:28-36

²⁸ Nagawan Indo-nen yosolar-e: ”Sapi wam kusi-nen nde anggul ambo-nen ap misik wuruwama, wat yuwama-ge, sapi iri ombo ebem-e angin worak purak pug-o. Are, sapi iri na-ge kerep pem nak ninggit lak wosa mbo burag-o.

²⁹ Alat nde, sapi kusi na nde pempa ondoso ala-ge, sapi ombo iri na yak togolar-e: ’Kat kowam-e ap ondoso-o’ yak tidnag-et nde, ar-e wam iri na kwara yik karok woragit lak yidnak pem ap misik mondok wuruwama-ge, sapi na kerep pem wutluk, sapi ombo na min-et mondog-et wururag-o.

³⁰ Alat nde, sapi ombo iri na at ondomok indi imiri yosolar-e, ap inndi imiri yogolat pugwi onggo ndak ndag-et purag-o.

³¹ Sapi-nen wuruwa iri nde li ap ala na, li kwami ala na wuruwama-ge, onggo-ge yanem iri na ndak ndag-et kwasa purag-o.

³² Nde, wuruwama wat ma iri nde ndegel unpugwi kweyap ala na, ap ala na wuruwama-ge, sapi ombo-nen-e onggo-ge perak tol-e tiga pulu onggo pidnak nap ombo iri na wok turag-o. Nde, sapi kusi iri na-ge kerep pem nak wosa keya burag-o.

³³ Ta-nen nde yi kenanggurak ondoro nenaridnak iri na usurup wanuwama-nen ala na, usurup lak yaluwama-nen ala na, sapi ala na, kelerai ala na, yi emnde mbarak iri na arem mbuwama-ge,

³⁴ yi kenanggurak ondoro konidnak nap iri na-nen-e wam-e uwi yaga wam ombo wok turuk, wam wat yidnak iri na-ge at wanurag-o.

³⁵ Ap misik esapi kusi-nen ap misik esapi kusi misik wuruwama-ge, it sapi ombo ereya na lambuk yogolat, sapi uruk iri na onggo wanuruk, tol-e keyaga wanurag-o. Sapi worak puwa iri na enmbereg-et irik tak wururag-o.

³⁶ Alat nde, sapi kusi iri nde anggam worosola kagwi-net kwaridnak ala-ge, wam ombo iri-ge kwara yik karok woragit lak me, sapi kusi misik sapi worak pidnak iri na uwi yaga sapi ombo wok turuk, sapi worak pidnak iri na-ge at ondomok wanurag-o” luk yij-o.