MBIRIGA WENE 20 - Nanduk Ngget Tul Pidnak Wene

Imiri mbarak pidnak wene sepulu 20:1-17

¹ Mbal Pem Nagawan-nen wene yosolat-nen yid wene ebe-ge yu-o:

² ”An-e kit anggun panggun tak kunpugwi sa Mesira-nen lesa wok kunpuruk lobok yigi nap Kenmbal Pem Nagawan, Nagawan Indo nen yusu-o.

³ Kir-e Mbal Pem Nagawan nin mbi tena wolmomtak pug-o. Alat nde, an nak kek tak nobogolat wolmer-o.

⁴ Kir-e mbal pem woraso mende min nggweyak pem woraso mende min yi nggweyak-urugwe nggwe arem woraso mende min ut memera kondomok kenmanggim ndak wosa purak pug-o.

⁵ An-e Nagawan Indo Kenmbal Pem Nagawan-nen yusu me, kininggi-nen ndak wiridnak mende iri kek tak purak pug-o. Nin mende nan mende min an ndak ndak tak nuburag-e mondok nimbir-o. An mondok insili rak mbili nab-e enpem angin worak posolar-e, lila bem lud, tabuh pem lud, ap tap kenan pem unpumu, iri na-t ap tap empat enpem lud yil mburuwa-o.

⁶ Alat nde, an nubud kagolat, an-nen yidnak yidnak kwarogolat kwatli nap iri na-ge an-nen enabuwa kaso elem iri na mirik onposolar-e, tabun pem lud, lila bem lud, ap tap wonarurak puk irit enabuwa kasolat woramin-o.

⁷ An-e Kenmbal Pem Nagawan, Nagawan Indo me, kir-e an nunu-ge we ereba-t yurak pug-o. Ta-nen nde an nunu we kasa ereba-t yuwa nab-e enpem angin worak pimin-o.

⁸ An we woragi tarem iri-ge yebet kagolar-e, ’Iri Tarem-e at amanggim lenak pidnak-nen yusu-o’ luk nggok tak purag-o.

⁹ Enam tarem-e an-nen kit keneyabu wanobokluk wok kindigi-t nde,

¹⁰ enam pem woraruk, tuju iri bem-e an namanggim nak kenpabok kwarogolat wolmomtak tarem-nen yusu-o. Nde, iri tarem-e ap misiger-o luk tet yabu mondok wanurak pug-o. Kit-nen na, kinlirak-nen na, ndegel kunpugwi nap-nen na, konowam-nen na, ap sal kit woragwi sa woragwi nap-nen na, mondok we nak wolmomtag-o.

¹¹ Nagawan Indo an-nen nggweyak min mbal min yi koma min ereya ebem woraso min oboksa ndak worosolar-e, enam pem nak ndak wurukmu-o. Alat nde, tuju bem-e nebabok kwarosolat, we worakmu-o. Iri bem-nen we woragi tarem iri-ge imbiringgat tak puruk, narik namanggim nak lenak pukmu-o.

¹² An-nen wok kindimin o iri me woragolat, kunluk mot pem-et woraboklug-e, kineid kiniya kek tak onpogolat wolmomtag-o.

¹³ Ap wururak pug-o.

¹⁴ Ap onkwe min nene yurak pug-o.

¹⁵ Yariya wanurak pug-o.

¹⁶ ’At iri-ge iri nggal kwaramu-o’ luk kennesiget enpem purak pug-o.

¹⁷ Ap misik arengge: uwi min ogwe min ndegel ubugwi min owam min egelerai wam min at arengge mende oboksa min ukwe yurak pug-o” yij-o.

Isarael nap kwiye yidnak wene 20:18-21

¹⁸ Nde, it-nen-e o nggu min mbapu ene pu min kologolat, obinel yosolat ndobo iri na kule lasolat, yosola karug-e, ir-e kwiye-nen yot kot mbogolar-e, erepma mboksa ereba-t mendak wiriga-o.

¹⁹ Iri yogolat-nen it-nen Musa yak togolar-e: ”Kat nak-nen yak nindi-o. Yak nondosola kulul-er-o. Alat nde, Mbal Pem Nagawan-nen yak nondosola-ge, wat mul-o luk at-nen mondok yak nundurak pug-o” luk yiga-o.

²⁰ Yogolikma, Musa-nen yak ondosolar-e: ”Kwiye kali-ge meyog-o. Kit-nen meya kwarigit lak, tugup lak worabokluk Mbal Pem Nagawan-nen kinndi kudtak pem nak lobok yusu-o” luk yak indij-o.

²¹ Iri yak indij-et nde, it ap ereba na-ge erepma mboksa ereba na-t mendak wiriga-o. Alat nde Musa arig-et nak nggan nggan mom kirak Mbal Pem Nagawan worasu sa iri na me panggosa mbirij-o.

Mbal Pem Nagawan amanggim wam wosa kan purak ondoro konurak wene 20:22-26

²² Nagawan Indo-nen Isarael nap enmanggim wene wosa Musa ebem posolar-e: ”Nagawan Indo an-nen mbal nggwe-nen wene yak kondosola kaigep nar-o.

²³ An worala-t nde, kir-e perak pem emas pem-nen erembel wanurak kugwi nin kondomok kenmanggim ndak wosa purak pug-o.

²⁴ An namanggim wam wosa kan purak ondoro nggweyak-nen kona ndamil li-o. Ndamuruk iri na bem-e kowam sapi min lomba min-e an namanggim wosa kan pogolat, an nimin kundurak pem wosa kan pogolat wolmomtag-o. Nde, an nerembel wanogolat wolmomtak ondoro an-nen lenak pidnak sa ereba na me an-e lobok yosolar-e, imbiringgat tak kinpimin-o.

²⁵ Kit-nen nde an namanggim wam wosa kan purak ondoro kerep mendaga ndamil lagolar-e, kerep ngarugwi mende bem-nen ngaridnak kerep iri bem-e an namanggim wosa kan purak ondoro-ge ndamurak pug-o. Nde, kerep ereba nde kerep ngarugwi mende bem-nen ngaridnak nde ala-ge, ondoro konugup iri me-ge an namanggim wam wosa mondok kan purak pug-o.

²⁶ Wam wosa kan purak ondoro iri-ge teram keksa ndamurug-e, mbera bem lagola enaboro inggiri worak iri na kujwa naru, keksa ndamigit lak, we tebesa-t ndamurag-o” luk yij-o.