MBIRIGA WENE 2 - Nanduk Ngget Tul Pidnak Wene

Musa ndet yidnak wene 2:1-10

¹ Nde, ereya tarem woragolar-e, Lewi nap misig-e Lewi kwe-t misik wanij-o.

² Wanurug-e, li ap misik ndaiga-o. Ndagurug-e, la na-ge mondok konak alama-ge, nderak kura nak woralar-e, waneya kenan woraiga-o.

³ Iri kwasa kura nak wolmomtag-e meya kwat yosola-ge, ija-nen lis mbararik, mul sum nggal yagurug-e, ombol nggwe yi ngguwa naru amburu mondok mbeyoksa muruksa ndarak purug-e, la na-ge iri na arem pil ngguruk, yi Nil arem waruk mberarik, yi eyak pem mbore ndumu kura bij-o.

⁴ Pamu-ge, la iri na ambab-e owot iri na ebem-e no nde kwat ma-o? luk ebe-ge mboksa ereba-nen towarak erengen woragij-o.

⁵ Worasoma-ge, nagawan Pirayon ara nde lobok yosolar-e, aboro mareyekluk yi ma mbij-o. Nde, at imin nugwi kwami-ge yi eyak nggwe waring kagola-ge, Pirayon ara na-nen ereya na-net yik kagaidnggal-e, mul sum nggal iri na-ge mbore ndumu irit yik kagaij-o. Karug-e, ndegel oboso kwe misik iri na yak tosolar-e: ”Mul sum nggal iri wok niril lobok yi-o” yak tij-o.

⁶ Wok til lobok yamu, Pirayon ara na-nen kuwara piridnggal-e la na-ge yip tosoma karug-e, abuwa kagaij-o. Abuwa karuk-nen yosolar-e: ”Yu-ge Iberani kweyap enla kagi-o” yij-o.

⁷ Yosoloma-ge, la iri na ambap-nen Pirayon ara ndugum iri na yak tosolar-e: ”La yu-ge kamanggim kamo mak togolat wolmakluk an-nen Iberani kweyap misik onkore yurag-e op, lak?” luk yak tij-o.

⁸ Yak tosoloma-ge, Pirayon ara na-nen-e ”Ob-o” yosoloma-ge, la na ambab-e la na ija eram-et yonggo mberamu, ija na lobok yosola-ge,

⁹ Pirayon ara na-nen kwe na yak tosolar-e: ”La yu waruk mburugundik, an namanggim kamo mak tosolat wolmin-o. Iri yosola-ge, abok onggo wok kirimin-o” yak tosoloma-ge, la na-ge waruk mberarik, kamo mak tosolat woragij-o.

¹⁰ Nde, la na siyak nggok alama-ge, Pirayon ara na eram pamu, at ambara nggal kwarak woragij-o. Pirayon ara na-nen yosolar-e: ”La yu-ge yi ma-nen lit kagirik me, unu-ge Musa-o” luk yarij-o.

Musa kwiye-nen Mirian wi mbiridnak wene 2:11-25

¹¹ Nde, Musa na indi worak lug-e, misik tarem-e at erem nap anggun panggun tak onpogolat yabu watsa wok indili ereba na nggesa wok indili iniyil mbirij-o. Mborosoma-ge, Mesira nap misik-nen Iberani nap Musa elem nap misik abu abu emera mberak posola karug-e,

¹² erengen ponok ponok lembena keya buruk, ap mondok lak ala karug-e, Mesira nap na-ge wosa sisiri arem kurasa yapma ibij-o.

¹³ Nde, kup Musa na mborosolat-nen yik kagaidnggal-e, it Iberani nap nak mberen yig nggukmu eneyarug-e, ”Kar-e noluk-nen kanggam wurusu-o?” luk at lugud tak kwarid iri na yak tij-o.

¹⁴ Yosoloma, ap iri na-nen Musa yak tosolar-e: ”Kar-e ta-nen nit-nen kene kologolat, nenpem wene mbarosolat wolmakluk mendak kebamu-o? Mesira nap wirigen iri na nggal an min-et nururak yusu-a?” yak tosoloma, Musa na-nen perasolar-e: An-nen kwarigi yu nde abu naru karu yidnak worasu kagi” perarug-e, kwiye kwarat ebem wok yij-o.

^15-16 At-nen kwaridnak iri Pirayon-nen kulurug-e, Musa na wururak tu kore yij-et nde, Musa na-ge kwiye mberarik Mirian woragij-o. Nde, o Mirian iri me tepan ombo unu-ge Yitero iri-ge ararag-e ndugum nak tuju irit woraiga-o. Nde, misik tarem-e Musa na-ge yi kenanggugwi sa eralu iri na me koreyak worasoma-ge, Yitero ararak ndugum yeba na-ge ineid owam kambing nde lomba nde yi kenangga posoma, naso ondoro ma ereba na me yi kenangga purak lobok yiga-o.

¹⁷ Alat nde, it ap wam yik karok woragwi erep yeba na-nen-e kweyap ndugum ereya na-ge langgara wirik inpiga-o. Nde, Musa-nen-e inmiri yosolat, onowam ereba na yi kenangga mak tosolat kwarij-o.

¹⁸ Nde, it kwami ndugum yeba na enma mborogola-ge, ineid-nen kin wok onposolar-e: ”Yawo kir-e noluk-nen ndag-et nak lobok yili-o?” luk yak indij-o.

¹⁹ Yosoloma, it-nen yogolar-e: ”Wam ndugurugwi nap-nen langgal neneyakmu, ap Mesira nap misik-nen ninmiri yosolat, nonowam na yi kenangga mak tosolat, yi kenang nondosolat kwarij-o” yak tiga-o.

²⁰ Yak togolikma, at-nen yosolar-e: ”Ap iri-ge ngge me worasu-o?” luk Yitero-nen-e ararak yak indij-o. ”Nde, kir-e noluk-nen keya buruk lobok yigeb-o? Totno at imin nunggwi mende nok-nen yonggo eber-o” luk yak indij-o.

²¹ Nde, Musa na-ge iri me wolmomtak ”Ob-er-o” yosola karug e, Yitero-nen-e ara Sipora na-ge Musa wok tij-o.

²² Wok tamu-ge Sipora-nen-e li ap misik ndagij-o. Ndagamu-ge, Musa-nen-e: ”An-e ap sal nggal yu me worasu-o” luk-nen la na unu yarosolar-e, Nggeresom irit yarij-o.

²³ Nde, olengen kwarat woraruk, Mesira nagawan na-ge wat yij-et nde, it Isarael nap na-ge anggun panggun tak onpogola, enarem-nen yip togolat-nen yogolar-e: ”Mbal Pem Nagawan wa-e. Yongga nindi-o” luk yogola, it enne pabok pabok enne iri-ge Mbal Pem Nagawan-nen kulij-o.

²⁴ Kulurug-e, at-nen Abarakam min Isak min Yakup min urul yak indid ereba na yebet kagij-o.

²⁵ Yebet karug-e, Mbal Pem Nagawan-nen-e it anggun panggun tak inpili ereba na eneyasolar-e, ”Yongga-t indimin-o” luk Indi-ge wat tak pij-o.