MBIRIGA WENE 18 - Nanduk Ngget Tul Pidnak Wene

Yitero-nen Musa kil mbiridnak wene 18:1-12

¹ O Mirian tepan ombo, Musa abak Yitero-nen kulidnggal-e Mbal Pem Nagawan-nen Musa min Isarael nap min Mesira-nen lit unpuruk wasolat, kwiye worak kwat unpusu wene ereba na kulij-o.

² Kulurug-e, Yitero na-ge Musa ogwe Sipora Mirian wi keya bid iri na imin Musa eram ibil mbirij-o.

³ Mborosolar-e, Sipora ambararak Nggeresom min Elieset min inmin-et mbirij-o. Musa-nen yosolar-e: ”An-e ap sal nin nap enma narig-et worasu-o” yidnak me, ambara manggiya na unu-ge Nggeresom yarij-o.

⁴ Owot iri na unu Musa-nen yarosolar-e: ”Neid Embal Pem Nagawan-nen an yongga norosolat Pirayon eyalawi anggat emndam-nen nimiri yij-o” luk unu-ge Elieset yarij-o.

⁵ Yitero na mborosolar-e, Musa ogwe min ilirak mberen inmin-et ap lak ma Mbal Pem Nagawan ondobo eralu Musa worasu sa iri na me-t mbirij-o.

⁶ Mborogola-ge Musa yak togolar-e: ”Nit lobok yili-o” yidnak wene na yak tiga-o.

⁷ Yak togolikma-ge, Musa na mborosolar-e, Yitero na eram tud luk, men yosolar-e, paluksa wa yak turug-e, ”Kir-e nggesa worali-o?” luk it worali wene ereba na kin wok kerak mburug-e, Musa woraso o lije iri na arem nggwiga-o.

⁸ Nggurug-e, Musa-nen-e abak iri na yak tosolar-e, Isarael nap inmiri yosolat Nagawan Indo-nen Mesira nagawan min Mesira nap min kwat inpidnak wene ereba na ndindera yak tosolat, iri-nen tu ndumu Isarael nap-nen anggun pagggun kil lobok yidnak wene min Nagawan Indo-nen it inmiri yidnak wene min ereba na ndindera yak tij-o.

⁹ Wene ereba na kulurug-e, Yitero na-ge alen kasolat-nen

¹⁰ yosolar-e: ”Mesira nagawan min Mesira nap min ininggem-nen kinmiri yid Nagawan Indo iri nak erembel wanurag-o! Anggun panggun tak kubugwi sar-nen Isarael nap wisirik kinpid Nagawan Indo iri nak erembel wanurag-o!

¹¹ Ap-nen kek tak pugwi unkugwi erep ereba-ge tebek tag-et nde, Nagawan Indo iri perak terak minik kek tag-er-o luk naru yusu-o. Nde, ereba kwarid ereba-ge Mesira nap-nen Isarael nap lel onpogolar-e indi kek tak pem kwat onpogola-nen kwarij-o” luk yij-o.

¹² Iri luk Yitero-nen-e Mbal Pem Nagawan amanggim ebis-et kan pugwi mende min wosa mbara kan pugwi mende min siyak mbi Mbal Pem Nagawan amanggim pamu-ge, Arun min Isarael nap ennggendumu-nen enne kulugwi nap ereba na lobok yigarik Yitero imin lambuksa Mbal Pem Nagawan eram iri-nen ningga-o.

Musa-nen wene konurak nap mendak inpidnak wene 18:13-27

¹³ Nene luk, kub-e Musa-nen-e Isarael nap ennggendumu yuk puk yugwi wene ereba na mbenarosolar-e, aptusa kuplila-nen mbenat tenak iri-net o ndamuk yij-o.

¹⁴ Iri na kwarosola-ge, Yitero-nen lombot pidnggal-e, Musa-nen wanurak yabu-ge kwarat karug-e, Yitero-nen Musa yak tosolar-e: ”Kar-e Isarael nap ennggendumu yabu kwarat yu wanusu-a? Mondok kat karig-et nak-nen wanurak ala-n ap ereb-e kat-nen nggomo undurag-et nde, we mendak nak kuplila-nen tel kwiridnak keyama yusu-a?” yij-o.

¹⁵ Yosoloma, Musa-nen onggo yosolar-e: ”Nde, it ap ereba-ge we Mbal Pem Nagawan Indi-n pidnak enaru yurak pem nak lobok yili-o.

¹⁶ Nde, it-nen nde yuk puk mburug e, an-nen onowene iri mbenasa lak tak purak pem nak lobok yogolat, it-nen kwaruwakluk Mbal Pem Nagawan-nen enpem pidnak wene min Mbal Pem Nagawan-nen imiri mbarak pidnak wene min yak undurak pem nak lobok yugwi-o” yak tij-o.

¹⁷ Yosoloma, Yitero-nen yosolar-e: ”Iri nggal-e meya-o.

¹⁸ Iri nggal kwarosolar-e, kat na irit, it na irit, we kenmawi nak lak tak pili-o. Yabu kwarat iri-ge ap misik nak-nen wanurag-e meya-o.

¹⁹ Iri ala-ge, an-nen yak kirimin yu kwara kwarosola-ge, Mbal Pem Nagawan-nen-e yongga-t kuruwa-o. Ndemeret ap enlem yu Mbal Pem Nagawan imbiri bem onowene konosolat, it onowene waruk Mbal Pem Nagawan eram mburusu iri-ge ob-o.

²⁰ Kat-nen-e it-nen kwaruwakluk Mbal Pem Nagawan-nen enpem pidnak wene kona ndindera yak ondosolat, it konak nak wolmomtak wene min mondok it-nen kwarurak wene min mul undurag-o.

²¹ Iri-ge kwarosolar-et nde, eralu-ge kat-nen it ennggendumu ap indi nggat nggat worak lenak unpuruk, ereb-e ap seribu (1000) enanggul pem lenak unpuruk, ereb-e seratus (100) enanggul pem lenak unpuruk, ap ereb-e lima pulu (50) enanggul pem lenak puruk, ap ereb-e ap sepulu enanggul pem lenak onposolat kwari-o. Nde, it len unpugun iri-ge Mbal Pem Nagawan indi aye worak nap, ap erep-nen ob-er-o enperagwi nap, uang lesa wanugwi buk nap, ab-e iri nggal-et lenak unpurag-o.

²² Unpugunmu, ir-e Isarael nap ennggendumu enpem wene konugwi nap wolmag-o. Yabu-ge lena mbo wok undugunmu, kasa mbilak wanigit lak kona losa mbo irit wanuwag-o. Nde, wene nde nggog-et ala-ge, iri-ge kat yak kuruwag-o. Alat nde, marig-et yuk puk yugwi wene nde ala-ge, it ondomok-nen wene lak tak purag-o. It-nen nde nenpem pidnak yabur-o luk-nen nde kwarogola-ge, kat kebem nak angin wolma iri te rak kubuwa-o.

²³ Kat-nen nde iri nggal-et kwarosolat, Mbal Pem Nagawan-net ’Kwar-er-o’ luk nenpem pamu-o luk kwarosola-ge, kat-nen yabu yu wanurag-e ndak nde yosolat, it ap ereba onowene na ndag-et nak mbenarogola, it mborogolar-e, inndi yamuksa mburuwa-o” yij-o.

²⁴ Iri yosoloma-ge, Musa na-ge Yitero-nen kwarurak yak tid iri na-t kwarosolar-e,

²⁵ Isarael nap ennggendumu indi nggat nggat worak ereba na lenak unpurug-e, ereb-e ap seribu (1000) enanggul pem mendak onposolat, ereb-e ap seratus (100) enanggul pem mendak onposolat, ereb-e ap lima pulu (50) enanggul pem lenak onposolat, ereb-e ap sepulu enanggul pem lenak onposolat kwarij-o.

²⁶ Iri rak enpamu ap ereba na-ge Isarael nap ennggendumu ap enpem konugwi nap woragolar-e, yabu iri na wanogolat woraiga-o. Nde, wene nggok ala-ge, Musa ebem pogolat, nde yuk puk mbugwi wene marik ereba na-ge it ondomok-nen wene lak tak pogolat woraiga-o.

²⁷ Nde, Yitero na-ge Musa-nen lerak pamu, ama nggwe mbirij-o.