MBIRIGA WENE 17 - Nanduk Ngget Tul Pidnak Wene

Kerep arem-nen yi wagid wene 17:1-7

¹ Nde, Isarael nap oboksa-ge o Sin lid iri na keya burug-e, Nagawan Indo-nen yak indid iri na ndak ndag-et nin me-nen-e nin me ya turuk ereba-t mbiriga-o. Mbirigarik, misik tarem-e o Arapirim iri me o sare wiril lobok yiga-t nde, o iri me yi lak alama,

² Musa met pogolar-e: ”Yi mak nindi-o” yogolikma, at-nen onggo yosolar-e: ”Kir-e noluk-nen kinsilepma yogolat, Nagawan Indo indi ngatli-o?” yak indij-o.

³ Alat nde, it ap ereba na-ge mondok yi nere kwarat ala karuk, Musa met pogolat-nen yogolar-e: ”Kar-e noluk-nen Mesira-nen yu me wok nunpuruk lobok yigen-o? Nit min nonkwela min nonowam min yi nere-nen yu me wat makluk ninmin lobok yigen-a?” yiga-o.

⁴ Yogolikma-ge, Musa na mondok kiri keresa Nagawan Indo emengen mbarosolat-nen yosolar-e: ”An-e ap it yu enmanggim-e no kwarimin-o? Mondok kerep nuruwokluk yili yu ki-o” luk yij-o.

⁵ Yosoloma, Nagawan Indo-nen Musa yak tosolar-e: ”Kar-e it ennggendumu-nen enne kulugwi nap yonggo unpugundik totno-nen it Isarael nap lit unpuruk mborosolar-e, kat kowangun yi Nil lel kaigen iri na min-et waruk mbiri-o.

⁶ An-e kat kabuwok Sinai Ndobo bem kerep nggok misik pem mendak woramin-o. Kar-e kerep iri lel ki-o. Lel kasola-ge, arem-nen yi wasola ir-e nujwa-o” yosoloma, Musa-nen-e Isarael nap ennggendumu enne kulugwi nap ereba na enlengen pem-et kerep na lel kagaij-o.

⁷ Iri me-nen Isarael nap-nen Nagawan Indo indi ngarogolar-e: ”Ndemeret Nagawan Indo-ge ninmin worasu, lak?” yidnak sa ala karuk, o iri na unu-ge Masa yariga-o. Nde, Isarael nap-nen Musa met pidnak sa ala karuk, unu misig-e Meriba yariga-o.

Amalek nap inmin wim mbariga wene 17:8-16

⁸ Iri lug-e, Amalek nap lobok yogolar-e, Isarael nap o Arapirim iri me worakmu inmin wim mbariga-o.

⁹ Iri yogola, Musa-nen Yosua yak tosolar-e: ”Kar-e Amalek nap inmin wim tumbururak nap siyak lini-o. Nde, kub-e an-e Nagawan Indo-nen ’Waruk mbiri-o’ yid wangun iri na ninggem tenaga ndobo bem mendak woramin-o” luk yak tij-o.

¹⁰ Yosoloma-ge, Yosua na-ge Musa nen yak tid iri na-t kwarosolar-e, Amalek nap inmin wim pil mborosola-ge, Musa min Arun min Ut min ya na-ge ndobo anggul pem laiga-o.

¹¹ Laigarik, Musa na inggi teram nggwe ligik puruk worala-ge, Isarael nap ombol nggwe yogolat, nde, inggi leyok tak posola-ge, Amalek nab-et ombol nggwe yogolat woraiga-o.

¹² Nde, iri kwarosolat Musa na inggi ababok lak yosola-ge, Arun min Ut min-nen-e kerep mbi wanigarik, Musa kore yuwakluk ondoro kona keya buruk, Musa eralu ponok ponok woragolat, at inggi kigit nggwe kware nggwe logo buruk woragola iri na-t o na mo woroksa mbij-o.

¹³ Iri kwariga bem-e Isarael nap-nen Amalek nab-e abu pinik indiga-o.

¹⁴ Iri luk, Nagawan Indo-nen Musa yak tosolar-e: ”Kit-nen ombol nggwe yigep iri-ge meme ma naru engga bem mbari-o. Yosua iri yak ti-o. ’Amalek nap iri-ge an-nen-e mondok lak tak inpimin-o luk yij-o’ yak ti-o” luk yij-o.

¹⁵ Iri lug-e, Musa-nen Mbal Pem Nagawan amanggim wam wosa kan purak ondoro kona mendaga keya buruk, unu yarosolar-e, ”Nagawan Indo iri-ge an-nen yenggerak purak mende-nen yusu-o (bendera)” luk yarij-o.

¹⁶ Musa-nen yosolar-e: ”Nagawan Indo-nen idnak yenggerak purak mende (bendera) iri-ge mondok kek sa tena buruk wolmer-o. Nagawan Indo-ge Amalek nap inmin wim mbal tenak pem irit wolma-o” yij-o.