MBIRIGA WENE 15 - Nanduk Ngget Tul Pidnak Wene

Musa-nen ndawi yidnak wene 15:1-18

¹ Iri lug-e, Musa min Isarael nap min-nen ndawi yu-ge Nagawan Indo erembel wanogolat yiga-o: Nagawan Indo-ge kek tak ombol nggwe yidnak me, at amanggim ndawi yimin-o. Kura wam min ebem kore yidnak nap inmin-e oboksa yi koma arem mbo inpil nggwij-o.

² Nagawan Indo-ge an nambigit yoso amawi ambik-nen yusu-o. At-nen nimiri yamu-o. Ar-e Nembal Pem Nagawan-nen yusu-o. An-e at erembel wanusu-o. Nomborak-nen kek tak pugwi Mbal Pem Nagawan-nen yusu-o. An-e at kek tak ubusu-o.

³ Nagawan Indo iri-ge wim wari amawi worak-nen yusu-o. Unu-ge Nagawan Indo-o.

⁴ Mesira nap san ombomin onnggweyak koma min yi koma arem mbo inpil nggwij-o. Wim wari mondok enmawi worak yeba na-ge yi Nggelaga koma arem yubuksa lak tak inpij-o.

⁵ Kerep yi mondok yubuk tak ma mboso nggal ir-e yi koma mondok yubuk tak-nen nuruk lak tak inpij-o.

⁶ Nagawan Indo wa-e. Kat kinggi kigit amawi-ge ap-nen wi yugwi-nen yusu-o. Kat kinggi-nen wim nab-e yigisa lak tak inpigen-o.

⁷ Kat-nen nggok kek tak woraso bem-nen kat kimin wim mbarugwi nab-e oboksa lak tak inpigen-o. Kat kisilepma-ge kanduk nggal yere kere mbosolar-e, yeberangen pago pidnak nggal pak unpusu-o.

⁸ Kat-nen yi na pu yosola, yi yonggwera keya bosola, teram nggwe ket mbet laruk, pak nggal nggaseluk keya bosoma, ondoro nggwe-ge nugwi nde kwat yoso-o.

⁹ Wim nap-nen yogolar-e: ’It iri-ge inmbirik muk iniyulndik tena unpuruk, kabo lit kagolat, unlusu mbara lak tak unpuruk, enaringgi enarengge temaga tembesa wanuruk, yi mende ndi mende ukwe lak sa wolmog-o’ yiga-o.

¹⁰ Alat nde, Nagawan Indo-kat-nen kemnde age misik pem nak pu yigen pem yi koma-nen Mesira nap yemen inpij-o. Ir-e posid kerep angin worak yoboksa mboso nggal yi mondok yubuk tak kwiye worak ma lak yiga-o.

¹¹ Nagawan Indo kabinal worak kek tak wa-e. Nin Mbal Pem Nagawan ngge nggal-nen kat kimin ndak wuruwa-o? Nagawan Indo kat-nen kwiye worak mende min wi yurak mende min kwarusu yeba nggal-e ta nggal-nen kwaruwa-o?

¹² Kat-nen kinggi kigit ndimirik pigen pem wim nab-e o yu-nen nuruk lak tak inpij-o.

¹³ Kat-nen ’Irit kwat kinpimin-o’ luk tul pigen iri na ndak ndag-et kwarosolar-e, kat-nen inmiri yigen nab-e lit unpuruk mburusu-o. Kamawi nggok pem-nen nggetlel unpuruk, kat woraso sa lenak iri na me lit unpuruk mburusu-o.

¹⁴ Yi ap ndi ap-nen kulurug-e, kwiye-nen lele yili-o. Pilisin nap min Erom nap ennggendumu enne kulugwi nap min kwiye kwarat yili-o.

¹⁵ Moap nap enmawi worag-e kwiye-nen kot kot yili-o. Kanaan nab-e kwiye-nen inndi kabak yili-o.

¹⁶ Nagawan Indo amawi enlengen-nen kagolar-e, ir-e kwiye kwarat yili-o. Kat kelem nap kat-nen wisirik inpigen nap iri ndilagola-ge, wim nab-e pak purag-e meya yusu-o.

¹⁷ Isarael nab-e Nagawan Indo kat woraso sa kat-nen lenak pigen iri na me inmin mburusu-o. Ir-e kondobo marak iri na bem onposolat, kat kinggi-nen wirigen wi iri na me onposolat yusu-o.

¹⁸ Nagawan Indo wa-e. Kar-e pempa Nagawan o tena woraso-nen yusu-o” yiga-o.

Miriam-nen yidnak ndawi 15:19-21

¹⁹ Isarael nap yi koma ndilagolar-e, ogorak nggwe ndiliga-o. Alat nde, Mesira nab-e onggweyak koma min unkura wam min ebem kore yidnak nap min-e yi koma arem nggogola-ge, Nagawan Indo-nen yi na-ge tuguruk ondolma rak posola, yi ma yubuk yiga-o.

²⁰ Iri yogola-ge, Arun ambap Mbal Pem Nagawan ene lomboksa yoso kwe Miriam na-ge ene le nggwe yoso poba wanarik kot kasola-ge, kweyap erep oboksa na onpoba iri na mende-t wanuruk, at imbirik kot kil niga-o.

²¹ Miriam-nen ndawi imid lit karik-nen yosolar-e: ”Nagawan Indo-ge ombol nggwe yidnak amawi worak kek tak me, kura wam min ebem kore yidnak nap min oboksa yi koma arem mbo inpil nggwidnak pem ndawi-ge Nagawan Indo ebem nak ngarer-o” yij-o.

Yi ngari yidnak wene 15:22-27

²² Iri lug e, yi Nggelaga eyak pem-nen Musa-nen it Isarael nap ndegel unpurug-e Sut lid nggwe mbiriga-o. Lid nggwe mborogolar-e, yi mondok kagit lak nak irit mberen nene yiga-o.

²³ Mbirigarig-e, o mbi unu-ge Mara iri me wok yiga-o. Alat nde, yi iri me-ge ngari worak nak me, yi norag-e mondok meya ala karuk, o iri me unu-ge Mara yariga-o. (Nde, iri-ge ngari worag-o yogolar-o.)

²⁴ It ap ereba na-nen ujwa mbarogolat-nen Musa yak togolar-e: ”Nir-e yi-ge no nul-o?” yiga-o.

²⁵ Yogola, Musa-nen indi min-et kiri keresa Mbal Pem Nagawan emengen mbarij-o. Mbarosola-ge, Nagawan Indo-nen e ngguwak kalak marik mirik posoloma, e iri na yi ma mberak pil nggwidnggal-e, yi na-ge norak konak irit kwat yij-o. Nde, o iri me-nen e Nagawan Indo nen it-nen kwat tenak wolmomtak irit mirik onposolat, nde, iri me-net at-nen it inndi ngaramu-o.

²⁶ Nagawan Indo nen yosolar-e: ”Ndemeret kinndi-net an-nen yidnak yidnak kwarogolar-e, an-nen yik kasolat konag-et yik kudtak nak kwarer-o. An-nen ’Irit kwarurag-o’ yak kindidnak imbirik nak mbururag-o. Kit-nen nde irit kwarogola-ge, an-nen Mesira nap enpem mberak pigi kugi ereba mende-ge kenpem mberak pimin pug-o. An-e ki rak konposo Nagawan Indo-nen yusu-o” yij-o.

²⁷ Iri lug-e, it na-ge mbirigarik, o unu-ge Elim iri me wok yiga-o. Nde, iri me-ge yi ulusu-ge duabelas, nde, mbari nggal kuruma ari-ge tuju pulu (70) irit woragij-o. Ir-e yi ulusu ereya na manda iri na me o lije sum wi wutluk, woraiga-o.