MBIRIGA WENE 14 - Nanduk Ngget Tul Pidnak Wene

Yi Nggelaga mbariga wene 14:1-31

¹ Nde, misik tarem-e Nagawan Indo-nen Musa yak tosolar-e:

² ”Isarael nap iri yak indi-o. Isarael nab-e tuguruk mburuwarik, o Piairot panggosa iri me o lije sum wi wuruwag-o. Nde, o iri-ge o Mbal-sebon panggosa o Mikndol wok yi Nggelaga wok enggendumu-o.

³ Mesira nagawan iri na-nen perasolar-e: ’It Isarael nap o yeba waring kali iri-ge abog-e nembaga ereba me kabak ma-o’ luk yebet kujwa-o.

⁴ An-nen-e Mesira nagawan iri na indi amawi rah pumu, kit muk kiniyujwa-t nde, an-nen-e Mesira nagawan iri min at-nen idnak esan ombo ereba min an namawi mirik onposola, it-nen-e an nimin-e ’Ar-e ndemeret Nagawan Indo-net yusu-o’ luk enaru ma-o” yak tij-o. Yosoloma-ge, it Isarael nap ereba na-ge Mbal Pem Nagawan-nen yak indidnak ereba na ndak ndag-et kwariga-o.

⁵ Mesira nagawan iri na-nen kulidnggal-e: ”Isarael nap yeba na-ge kwiye-nen mbiriga-o” yogola kulurug-e, Pirayon min at eyabu wanugwi nap min-nen-e niri nera keya inpikma mbiriga-o luk-nen yogolar-e: ”Nir-e no kwarige-o? Noluk-nen nir-e Isarael nap iri-ge keya onpogola, mbirikma nit ndegel nunpurak nab-e nendam lak worali yu-ge ngge-o?” luk yiga-o.

⁶ Iri lug-e, Pirayon-nen e wim pugwi nggweyak koma min ap san ombo min lid lud tak inpij-o.

⁷ Iri rak puruk, at mborosolar-e, nggweyak koma konak lenak nak enam ratus (600) min at onggweyak koma oboksa ereba min ndak wosa san ombo ngguruk mbiriga-o.

⁸ Ndemeret Nagawan Indo-nen Mesira nagawan iri na indi amawi rak puruk, Isarael nap na-ge Nagawan Indo-nen lit iniyuruk mborosola, Pirayon-nen-e inmbirik muk eneyagaij-o.

⁹ Nde, Mesira nap san ombo nen Isarael nap muk eneyagolar-e, nggweyak koma arem ngguruk, kura wam oboksa lit iniyuruk mbirigarig-e, Isarael nab-e o Piairot min Mbal-sebon min koroga, yi koma Nggelaga eyak pem o lije sum wi wirigarik worakmu, wok yiga-o.

¹⁰ Nde, it Isarael nap-nen yik kaiganggal-e, Pirayon min at-nen idnak san ombo min lobok yogola karug-e, kwiye kwarat yogolat, enne nggoksa ”Yongga nindi-o” luk Nagawan Indo emengen mbariga-o.

¹¹ Iri yogolat, it-nen Musa yak togolar-e: ”Mesira iri me nit yapma nunpurak nggweyak lak ala-nen yu me-nen wat makluk ninmin lobok yigen-a? Kat-nen ninmin lobok yigen iri-nen ndowaga-ge yur-o!

¹² Nanduk nit Mesira-nen wene yu-ge kwar-et ma-o yige na-ge yur-o! Nir-e nit sil neneyasu meyog-o. Alat nde Mesira nap ndegel unpugwi nab-e wolmog-o yige nar-o! Nir-e nembaga yu me-nen wat momtak iri-ge meya-o. Are, Mesira nap ndegel unpugwi nab-et wolmog-o” yiga-o.

¹³ Iri yogolikma, Musa-nen onggo yosolar-e: ”Kwiye yili-ge meyog-o! Kinndi tugup lak wolmer-o. Nagawan Indo-nen kit kinmiri yosolat-nen kwaruwa-ge yanem kagub-o. Mesira nap yawo eneyali yeba-ge abog-e mondok eneyagup pug-o.

¹⁴ Kir-e kinndi abu nak wolmer-o. Nagawan Indo at-nen nak kondolmasa wim puwa-o” yij-o.

¹⁵ Nagawan Indo-nen Musa yak tosolar-e: ”Kar-e noluk-nen ’Yongga niri-o’ luk kene nggoksa yusu-o? ’Mburugwi komo nak yuwog-o’ luk Isarael nap iri yak indi-o.

¹⁶ Wangun wanugundik, yi koma ambigit nuk karuk wolmin-o. Iri yosola, yi koma iri-ge poksa ena nggwe piri, abam nggwe piri yuwa-o. Iri yuwama, Isarael nab-e ogorak nggwe ndilujwa-o.

¹⁷ Nde, Mesira nap ereba-ge an-nen inndi amawi rak pumu, mondok kit Isarael nap muk kiniyil lobok yuwa-o. An-nen-e Mesira nagawan iri min at-nen idnak ap kere ereba min onnggweyak koma min ebem koreyak ereba min enambigit an namawi wal kamin-o.

¹⁸ Iri yumu, Mesira nap-nen nebarogolar-e: ’Ar-e Nagawan Indo-net yusu-o’ luk yuwa-o” yij-o.

¹⁹ Iri lug-e, Isarael nap lit unpuruk mboroso aid nap iri na-ge tuguruk Isarael nap onmbol nggwe lobok yosola-ge, nggan nggan enabuwok worasu iri min-et Isarael nap onmbol nggwe lobok yosolar-e,

²⁰ nggan nggan iri na-nen-e Isarael nap min Mesira nap min ennggendumu ndamuk tak pamu, kubu iri-ge Mesira nap min Isarael nap min-e lambuk yurag-e meya irit woraiga-o.

²¹ Iri sa woragolar-e, Musa-nen-e yi koma ambigit inggi ndimirik posola-ge, Nagawan Indo-nen-e mo luwaso (timur) nggwe-nen o wija mondok amawi worak irit pil lobok yamu, tag-et kubu iri-ge puk kerenak woralar-e, yi koma na-ge puk kaga ogorak nak nde rak pij-o.

²² Iri yosolar-e, yi koma na-ge poksa mberen kwat yij-o. Yi pirisa mberen kwat yid iri na-ge it enmanggim pak nggal ponok ponok nggaserak worala ogorak nggwe ndiliga-o.

²³ Iri yogola-ge, Mesira nap unkura wa oboksa min onnggweyak koma min ebem koreyak ereba min-e Isarael nap inmbirik muk iniyil iniyil yi koma enggendumu nggwiga-o.

²⁴ O kil posola-ge, Nagawan Indo-ge nggan nggan min kanduk min iri na arem-nen Mesira nap ap kere ereba na mbel eneyagaidnggal-e, Mesira nap yeba na-ge mondok nari wari irit mbiga-o.

²⁵ Nagawan Indo-nen-e Mesira nap onnggweyak koma owak ereba na meya rak pamu, mbururak siri mbarogolat-nen yogolar-e: ”Yu-ge Nagawan Indo-nen Isarael nap ondolmasa nit nendeyekluk amawi kundusu kaige-o. Yu me-nen mondok mburuwog-o!” luk yiga-o.

²⁶ Nagawan Indo-nen Musa yak tosolar-e: ”Kinggi-ge yi koma ambigit ndimirik wolmin-o. Iri yosola-ge, yi-ge tuguruk amnuk yosolar-e, Mesira nap min onnggweyak koma min ebem kore yidnak nap min yi-nen yemen unpuwa-o” yij-o.

²⁷ Iri yosoloma, Musa na-ge inggi-ge yi koma ambigit nuk karuk worala-ge, o kil posola-ge, yi na-ge tuguruk ondolma amnuk yij-o. Nde, Mesira nap yeba na-ge mburuwog-o luk enmawi kundiga-t nde, Nagawan Indo-nen yi koma arem yubuksa lak tak inpij-o.

²⁸ Yi koma na tuguruk amnuk yosolar-e, nggweyak koma min ebem kore yidnak nap min Mesira nap ap kere Isarael nap muk iniyil yi koma arem nggwiga oboksa yemen enpamu, yi koma arem pip yonggok ndonggok mbiga-o. Misiget tet mondok mbirigit lag-o.

²⁹ Alat nde, Isarael nap na ndilagolar-e, yi koma na-ge ogorak nderak nggwe ndiliga-o. Ndilagola-ge, yi na-ge ponok ponok pak nggal nggaserak worala ndiliga-o.

³⁰ Iri tarem-e Nagawan Indo-nen-e Isarael nab-e Mesira nap ininggem-nen inmiri yij-o. Nde, Mesira nap yi-nen worak inpid ereba na-ge yi eyak pem liring kil lobok yamu, it enlengen-nen kaiga-o.

³¹ Isarael nap-nen yik kaiganggal, Nagawan Indo amawi nggok pem-nen Mesira nap indidnak iri karug-e, kwiye kwarat luk, Nagawan Indo ebem inndi-ge wat tak pogolat, ndegel oboso nap Musa ebem na inndi wat tag-et piga o.