MBIRIGA WENE 13 - Nanduk Ngget Tul Pidnak Wene

Li manggiya Mbal Pem Nagawan amanggim purak wene 13:1-2

¹ Nagawan Indo-nen Musa yak tosolar-e:

² ”Li ap mangginya nderak oboksa an nemanggim purag-o. Isarael nap inlirak manggiya nderak li ap oboksa min wam mul mul nandug-et ndagidnak kusi oboksa min oboksa-ge an narengge-nen yusu-o” luk yij-o.

Oroti lomboroso mende pigit lak worakwi yebet kagwi wene 13:3-10

³ Musa-nen Isarael nap yak ondosolar-e: ”Nagawan Indo inggi amawi kwarat pem anggun panggun tak kunpugwi sa Mesira-nen wisirik kinpidnak tarem yu pempa yebet kagolar-e, oroti lomboroso mende pigit lak oroti iri nak woraga nonggolat wolmer-o.

⁴ Nde, tanggal satu waneya anggul-et (Abib) yu bem-e kir-e Mesira wi keya buruk mbitli-o.

⁵ Nagawan Indo-nen Kanaan nap min Et nap min Amori nap min Ewi nap min Yebus nap min unuwi nggweyak konmborak owak mbara yarik wok indid wi yi mende ndi mende na kwarat, nggweyak na amburu worak iri na me Nagawan Indo nen wok kunpuruk mburuwama woragolar-e, pempa olengen ndak wosa waneya Abib yu bem-e kir-e oroti lomboroso mende pigit lak oroti woraga nonggolat woragup na-e.

⁶ Oroti lomboroso mende pigit lak woragidnak oroti iri nonggolar-e, tuju bem wolmomtag-o. Nde, enam nene luk, tuju bem tak pogolar-e, Nagawan Indo kek tak pogolat nggok sakup na-e.

⁷ Iri kwarogolar-e, tuju bem ereya woragolar-e, oroti lomboroso mende pago oroti mondok norak pug-o. Kit kunuwi nggweyak pem-e oroti lomboroso mende min oroti lomboroso mende pidnak nin tak nan tak min mondok wolmomtak pug-o.

⁸ Oroti lomboroso mende pigit lak woraidnak nunggwi tarem anggul-et tel korogolat iri-ge kit-nen kenmbararak yak ondogolar-e: ’Yu kwatli yu oboksa-ge nanduk nit Mesira keya buruk mbirige tarem Nagawan Indo-nen nenmanggim kwaridnak pem-nen kwatli-o’ yak ender-o.

⁹ Oroti lomboroso mende pigit lak oroti nunggwi tarem yu-ge yenggerak purak mende ininggi bem min inmbiriwak pem min kamarak pugwi nggal kwat ma-o. Nde, Nagawan Indo-nen amawi kwarat pem kir-e Mesira wi-nen wisirik kinpidnak me, iri yidnak tarem yebet kagola-ge, iri-nen yeberak konposolar-e, Nagawan Indo-nen ’Irit kwarurag-o’ luk wat tak pidnak wene yogolat, kwara kenaru yogolat woragup na-e.

¹⁰ Oroti lomboroso mende pigit lak oroti nunggwi tarem yu-ge tanggal wat tak pidnak iri na bem lud yosola-ge, olengen ndak wosa sakolat wolmer-o” yak indij-o.

Li manggiya nderak wene 13:11-16

¹¹ Musa-nen Isarael nap yak ondosolar-e: ”Nagawan Indo-nen kit konmborak inmin owak mbara yak kindidnak wi iri me kinmin mburuwama, nggweyak iri nde kit winde luk woragolar-e,

¹² kinlirak manggiya nderak min konowam kusi mul mul ndagidnak min oboksa-ge Nagawan Indo arengge-nen yusu-o.

¹³ Alat nde, kelerai wam kusi mul mul ndagidnak oboksa ondolma-ge lomba wam misik wururag-o. Nde, kelerai wam iri nde ondolma purak kinmbit-nen-e mondok kelerai wam iri-ge undugunwak tenggerak purag-o. Nde, kinlirak manggiya nderak oboksa ondolmasa lomba wam wosa purag-o.

¹⁴ Abok-nen kinlirak-nen kin wok konpogolar-e: ’Yeba-ge ebe-ge ngge kwarag-o?’ luk kin wok konpogola-ge, kit-nen onggo-ge yu nggal yurag-o: ’Nagawan Indo amawi worak iri na bem-nen anggun panggun tak nunpugwi sa Mesira-nen wesera wok nunpuruk lobok yamu-o.

¹⁵ Mesira nagawan na-ge nit lerak nunpurag-e indi amawi yosola, Nagawan Indo-nen inlirak li ap manggiya min wam ija mul mul-nen ndagidnak kusi min endamu me, nir-e nonowam ija mul mul-nen ndagidnak kusi Nagawan Indo amanggim wosa pogolar-et nde, ninli ap manggiya ondolmasa lomba wam wosa pugwi-o.

¹⁶ Iri kwarugwi iri-ge yenggerak pugwi mende nininggi bem min ninmbiriwak pem min kamarak pidnak nggal woralat iri-nen yeberak nonposolat wolma-o. Iri nggal kwasa Nagawan Indo-nen-e amawi bem-nen Mesira-nen wisirik nenpamu-o luk ninndi yeberak nonposolat wolma-o’ yak undurag-o” luk yij-o.

Nggan nggan min kanduk min-nen lit iniyuruk mbiridnak wene 13:17-22

¹⁷ Mesira nagawan iri na-nen Isarael nap lerak enpamu-ge tu Pilisin nggwe mburugwi-ge koroga-t nde, tu iri nggwe-ge Mbal Pem Nagawan-nen-e inmin mbirigit lag-o. Nde, iri kwarid iri-ge Mbal Pem Nagawan-nen perasolar-e: ”It nde tu iri nggwe-t mburuwarig-e, mondok wim-et nggurak ala karuk, niri nera-nen yu nggwe lobok yige-o peraruk, tuguruk Mesira mburuwa-o” perasolat-nen kwarij-o.

¹⁸ Iri bem-e, Mbal Pem Nagawan-nen-e Isarael nap iri na lit unpurug-e, kwanungguruk, ap lak nggwe-nen yi Nggelaga arem nggwe mbiriga-o. Nde, Isarael nap Mesira-nen mborogolar-e, wim pem mburugwi nggal-et san ininggem mbiriga-o.

¹⁹ Nde, nanduk Yusup uruk woralar-e, ”Warug-et mburul-o luk owak mbarer-o” luk Isarael nap yak indidnak me, Musa na mborosolar-e, Yusup owak na-ge waruk mbirij-o. Nanduk Yusup-nen-e yu nggal yak indij-o: ”Nagawan Indo-nen nde wisirik konposola mborogolar-e, an nowag-e yu me nen waruk mbururag-o” luk yak indij-o.

²⁰ Isarael nap na-ge o Sukot keya buruk mbirigarik, nembaga maksa o Etam siri iri me o lije wiriga-o.

²¹ Mborogola-ge, Nagawan Indo-ge lengge ala-ge it enabuwog-e nggan nggan arem mborosolat, nde, kubu ala-ge tu mirik enpeyekluk kan mare nggal luk lit iniyuruk mbirij-o. Iri kwarosola ir-e kubu-nen lengge-nen mborogolat nak woraiga-o.

²² Lengge-ge pempa nggan nggan iri-nen enabuwok worala-t nde, kubu-ge kan mare nggal inmin woralat kwarij-o.